អាជ្ញាធរជាតិអប្សរា ឈ្នះពានរង្វាន់បេតិកភណ្ឌអង្គរគ្មានផ្សែងបារី

2019-02-28 06:28:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្ពន្ធត្រួតពិនិត្យថ្នាំជក់អាស៊ីអាគ្នេយ៍ និងអង្គការសុខភាពពិភពលោកប្រចាំអាស៊ីប៉ាស៊ីហ្វិក បានប្រគល់ពានរង្វាន់បេតិកភណ្ឌអង្គរគ្មានផ្សែងបារី ដល់អាជ្ញាធរជាតិអប្សរា នៅថ្ងៃទី២៧ ខែកុម្ភៈ ឆ្នាំ២០១៩។ នេះបើយោងតាមអត្ថបទព័ត៌មានរបស់អាជ្ញាធរជាតិអប្សរា ចុះផ្សាយថ្ងៃទី២៨កុម្ភៈនេះ។

ពិធីនេះ ត្រូវបានធ្វើឡើងនាសណ្ឋាគារអប្សរាផាលេស នៅក្នុងសិក្ខាសាលាស្តីពី «ការជំរុញទីក្រុងសៀមរាបជាទីក្រុងគ្មានផ្សែងបារី» ក្រោមអធិបតីភាពលោក ហោ សារុន អនុរដ្ឋលេខាធិការក្រសួងទេសចរណ៍ និងលោកស្រី ដូមីលី វីឡារេ តំណាងសម្ពន្ធត្រួតពិនិត្យថ្នាំជក់អាស៊ីអាគ្នេយ៍។

ក្នុងនាមអគ្គនាយកតំណាងទទួលពានរង្វាន់លោក ហង់ ពៅ បានសម្តែងនូវសេចក្ដីត្រេកអរចំពោះការផ្តល់ទំនុកចិត្ត និងកិត្តិយសដល់អាជ្ញាធរជាតិអប្សរា ក្នុងការលើកកម្ពស់បរិស្ថានក្នុងតំបន់អង្គរគ្មានផ្សែងបារី ដែលកិច្ចការនេះសម្រេចបាន គឺបានពីការចូលរួមទាំងអស់គ្នា ទាំងសាលាខេត្តសៀមរាប មន្ទីរបរិស្ថាន ក្រសួងសុខាភិបាល អង្គរគាំពារសុខភាព និងអ្នកពាក់ព័ន្ធផ្សេងៗទៀត។ តាមរយៈពានរង្វាន់នេះ អាជ្ញាធរជាតិអប្សរានឹងបន្តភារកិច្ច ហើយពង្រីកតំបន់គ្មានផ្សែងបារី ក្នុងរមណីយដ្ឋានអង្គរកាន់តែទូលំទូលាយជាងមុនបន្ថែមទៀត។

ថ្លែងក្នុងអង្គសិក្ខាសាលា លោក ហោ សារុន បានបញ្ជាក់ថា នៅខែតុលា ឆ្នាំ២០១៩ខាងមុខនេះ ខេត្តសៀមរាបនឹងក្លាយជាម្ចាស់ផ្ទះរៀបចំកិច្ចប្រជុំថ្នាក់តំបន់អាស៊ីប៉ាស៊ីហ្វិក លើកទី៧ នៃបរិស្ថានគ្មានផ្សែងបារីផងដែរ។

សូមបញ្ជាក់ដែរថា យោងតាមរបាយការណ៍របស់អង្គការសុខភាពពិភពលោក មានមនុស្ស ៧លាននាក់បានស្លាប់ជារៀងរាល់ឆ្នាំ (៦លាននាក់ជក់បារី ៨៦០ពាន់នាក់ស្រូបផ្សែងបារីពីគេ)។ ក្នុងនោះ ថវិកាចំនួន ១,៤ ពាន់លានដុល្លារបានខាតបង់ដោយការប្រើប្រាស់ថ្នាំជក់ (ព្យាបាលជំងឺ និងស្លាប់មុនពេលកំណត់ បាត់បង់កម្លាំងពលកម្ម)។

ចំពោះទំហំនៃការខាតបង់នៅកម្ពុជា គឺមនុស្ស ១ម៉ឺននាក់បានស្លាប់ក្នុងមួយឆ្នាំ (ប្រហែល ៣០នាក់ក្នុង១ថ្ងៃ) របាយការណ៍របស់ WHO។ ថវិកាប្រមាណ ២០០លានដុល្លារ ខាតបង់ដោយសារការទិញបារី (NIS 2015)។ រីឯថវិកាប្រមាណ ១៦២លានដុល្លារ ត្រូវចំណាយដើម្បីព្យាបាលជំងឺប្រាំមុខ (NCHP)៕

អត្ថបទ៖ លាភ.