ជប៉ុន ផ្តល់កម្ចីជាង ៣៣លានដុល្លារ លើគម្រោងធារាសាស្រ្ត ដែលអាចស្រោចស្រពលើផ្ទៃដីជិត ១៣ម៉ឺនហិកតា
- 2019-02-28 08:32:39
- ចំនួនមតិ 0 | ចំនួនចែករំលែក 0
ជប៉ុន ផ្តល់កម្ចីជាង ៣៣លានដុល្លារ លើគម្រោងធារាសាស្រ្ត ដែលអាចស្រោចស្រពលើផ្ទៃដីជិត ១៣ម៉ឺនហិកតា
ចន្លោះមិនឃើញ
រដ្ឋាភិបាលជប៉ុន បានផ្តល់ឥណទានសម្បទានចំនួន ៣៣,៥លានដុល្លារ សម្រាប់គម្រោងស្តារឡើងវិញនូវប្រព័ន្ធស្រោចស្រព និងប្រព័ន្ធដោះទឹកខាងលិចទន្លេសាប (ជំហានទី២)។ ពិធីចុះហត្ថលេខានេះធ្វើឡើងរវាងលោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងលោក Yuichi SUGANO ប្រធាន JICA ប្រចាំនៅកម្ពុជា កាលពីថ្ងៃទី២៦ ខែកុម្ភៈ ឆ្នាំ២០១៩ នៅទីស្តីការក្រសួងសេដ្ឋកិច្ច។
យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច បានឱ្យដឹងថា គម្រោងនេះមានទិសដៅសាងសង់ និងជួសជុលប្រព័ន្ធធារាសាស្រ្ត ដែលនឹងអាចស្រោចស្រពលើផ្ទៃដីកសិកម្មសរុបប្រមាណ ១២ ៧៦០ហិកតា។
តាមរយៈគម្រោងនេះ កម្ពុជា នឹងរៀបចំបង្កើត និងពង្រឹងសហគមន៍ កសិករប្រើប្រាស់ទឹក និងផ្សព្វផ្សាយស្តីពីការគ្រប់គ្រងកសិកម្ម នៅតាមតំបន់ជនបទចំនួន៦ អនុគម្រោងនៃខេត្តចំនួន៣ នៅភាគខាងលិចបឹងទន្លេសាប រួមមាន៖ អនុគម្រោងលំហាច (ខេត្តកំពង់ឆ្នាំង), អនុគម្រោងដំណាក់អំពិល, អនុគម្រោងវត្តល្លួង និងអនុគម្រោងវត្តជ្រៃ (ខេត្តពោធិ៍សាត់), អនុគម្រោងរៀមគុន និងអនុគម្រោងប្រឡាយពោធិ៍ (ខេត្តបាត់ដំបង) ជាដើម។
គម្រោងនេះនឹងចូលរួមចំណែកផងដែរ ក្នុងការបង្កើនផលិតកម្មកសិកម្មយ៉ាងខ្លាំង ក្នុងតំបន់គោលដៅ និងបង្កើតវិស័យទេសចរណ៍ធម្មជាតិ ដែលជាកត្តាជួយធ្វើឱ្យប្រសើរឡើងនូវស្ថានភាពរស់នៅតាមជនបទ កាន់តែខ្លាំង។
សូមបញ្ជាក់ថា ក្រៅពីកិច្ចព្រមព្រៀងខាងលើនេះ ភាគីទាំង២ ក៏បានចុះហត្ថលេខាលើហិរញ្ញប្បទានឥតសំណងចំនួន ១១,៨លានដុល្លារផងដែរ សម្រាប់គម្រោងប្រព័ន្ធផ្លាស់ប្តូរទិន្នន័យអគ្គិសនីនៅកំពង់ផែ ដើម្បីការធ្វើទំនើបកម្មកំពង់ផែ។
លោកឧបនាយករដ្ឋមន្រ្តី អូន ព័ន្ធមុនីរ័ត្ន បានថ្លែងឱ្យដឹងថា រាប់ទាំងកិច្ចព្រមព្រៀងទាំង២ ខាងលើនេះ ក្នុងឆ្នាំសារពើពន្ធជប៉ុន២០១៨ រដ្ឋាភិបាលជប៉ុន តាមរយៈអង្គការ JICA បានចុះហត្ថលេខាលើឯកសារស្តីពីជំនួយអភិវឌ្ឍន៍ផ្លូវការរបស់ជប៉ុន ជាមួយរាជរដ្ឋាភិបាលកម្ពុជាសរុបចំនួន ១៣២,២៧លានដុល្លារ។ ក្នុងនោះជំនួយឥតសំណងប្រមាណ ១៤,៩១លានដុល្លារ និងឥណទានសម្បទានប្រមាណ ១១៧,៣៦លានដុល្លារ៕