នាយករដ្ឋមន្ត្រី សម្រេចដកមុខតំណែងអភិបាលរងខេត្តព្រះសីហនុចំនួន២រូប
- 2019-03-01 04:11:51
- ចំនួនមតិ 0 | ចំនួនចែករំលែក 0
នាយករដ្ឋមន្ត្រី សម្រេចដកមុខតំណែងអភិបាលរងខេត្តព្រះសីហនុចំនួន២រូប
ចន្លោះមិនឃើញ
សម្តេចនាយករដ្ឋមន្រ្តី ហ៊ុន សែន បានចេញអនុក្រឹត្យនៅថ្ងៃទី១ ខែមីនា ឆ្នាំ២០១៩នេះ សម្រេចបញ្ចប់មុខតំណែងអភិបាលរងខេត្តព្រះសីហនុចំនួន២រូប គឺ៖
១. លោក ស្រ៊ុន ស្រ៊ន់ ឋានន្តរស័ក្តិឧត្តមមន្រ្តីថ្នាក់លេខ៣
២. លោក ផៃ ប៊ុនវណ្ណៈ ឋានន្តរស័ក្តិឧត្តមមន្រ្តី ថ្នាក់លេខ៥។
សម្តេច ហ៊ុន សែន បានហៅការបញ្ចប់មុខតំណែងនេះថា ជាការបង្ខំចិត្តអនុវត្តអភិក្រមទី៥ គឺការវះកាត់។ «ខ្ញុំត្រូវតែយកគ្រាប់គ្រួស និងខ្សាច់ចេញពីស្បែកជើង ទើបអាចដើរទៅមុខទៀតបាន។ ខ្ញុំគ្មានពេលនិយាយច្រើនជាមួយមន្ត្រីខិលខូចទៀតទេ ព្រោះខ្ញុំបានអប់រំពួកគេច្រើនហើយ។ ដល់ពេលនេះខ្លាក៏ត្រូវវាយ ពស់ក៏ត្រូវវាយ កណ្តុរក៏ត្រូវវាយ រុយក៏ត្រូវវាយ ឱ្យតែបំពានលើផលប្រយោជន៍ប្រជាជន»។
ការបញ្ចប់តំណែងអភិបាលរងខេត្តព្រះសីហនុទាំងពីររូបនេះ គឺមួយថ្ងៃ បន្ទាប់ពីសម្តេច ហ៊ុន សែន បានព្រមានដកអភិបាលរងខេត្តពីរនាក់ និងមេទ័ពខេត្តព្រះសីហនុម្នាក់ ពាក់ព័ន្ធនឹងការចុះអនុវត្តសាលដីការបស់តុលាការកំពូលស្ថិតនៅចំណុចពយម៉ាចូវ ភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ រហូតឈានដល់ការផ្ទុះអាវុធ បណ្តាលឱ្យប្រជាពលរដ្ឋរងរបួស ជាពិសេស កម្លាំងប៉េអឹម និងយោធា បានប្រើហិង្សាទៅលើប្រជាពលរដ្ឋទាំងដៃជាប់ចំណង។ ការព្រមាននេះ បានធ្វើឡើងនៅក្នុងកិច្ចប្រជុំឧត្តមក្រុមប្រឹក្សាពិគ្រោះ និងផ្តល់យោបល់ កាលពីថ្ងៃទី២៨ ខែកុម្ភៈ ឆ្នាំ២០១៩ នៅវិមានសន្តិភាព៕