សិង្ហបុរី ទិញយន្តហោះចម្បាំង F-35 ដើម្បីកសាងទ័ពអាកាសជំនាន់ថ្មី
- 2019-03-01 06:39:19
- ចំនួនមតិ 0 | ចំនួនចែករំលែក 0
សិង្ហបុរី ទិញយន្តហោះចម្បាំង F-35 ដើម្បីកសាងទ័ពអាកាសជំនាន់ថ្មី
ចន្លោះមិនឃើញ
ក្រសួងការពារជាតិសិង្ហបុរី ទិញយន្តហោះចម្បាំង F-35 ចំនួន ៤គ្រឿង ពីសហរដ្ឋអាមេរិក ក្នុងលក្ខខណ្ឌដែលអាចទិញបន្ថែម ៨គ្រឿងទៀត ក្នុងគោលបំណងដើម្បីបង្កើតកងទ័ពអាកាសជំនាន់ថ្មី។ នេះបើយោងតាមការបញ្ជាក់ពីលោករដ្ឋមន្ត្រីការពារជាតិសិង្ហបុរី Ng Eng Hen នៅថ្ងៃសុក្រ ទី១ ខែមីនា ឆ្នាំ២០១៩។
ការបញ្ជាក់រដ្ឋមន្ត្រីការពារជាតិរូបនេះ គឺបន្ទាបពីសភាអាមេរិក បានយល់ព្រមលក់យន្តហោះចម្បាំង F-35 ឲ្យសិង្ហបុរី។ លោករដ្ឋមន្ត្រីបន្តថា លោកប្រធានាធិបតីអាមេរិក ដូណាល់ ត្រាំ បានផ្ញើលិខិតមួយមកកាន់លោកនាយករដ្ឋមន្ត្រីសិង្ហបុរី Lee Hsien Loong កាលពីខែមុន ដើម្បីបង្ហាញការស្វាគមន៍សិង្ហបុរី ដែលគ្រោងទិញយន្តហោះចម្បាំងរបស់ខ្លួន។
សូមបញ្ជាក់ថា យន្តហោះចម្បាំង F-35 មានតម្លៃ ចាប់ផ្ដើមពី ៩០លានដុល្លារអាមេរិក ដល់ ១១៥លានដុល្លារអាមេរិក ក្នុងមួយគ្រឿង។
លោករដ្ឋមន្ត្រីការពារជាតិសិង្ហបុរីបន្តថា ក្រសួងការពារជាតិសិង្ហបុរីនឹងបង្កើតជាកងទ័ពអាកាសនៃសាធារណរដ្ឋសិង្ហបុរីថ្មីមួយ ដោយប្រើប្រាស់ F-35 និង យន្តហោះ F-15 ដែលគ្រោងចេញជារូបរាង នៅឆ្នាំ២០៣០។ លោកឲ្យដឹងទៀតថា ក្រសួងការពារជាតិសិង្ហបុរី គ្រោងទិញនាវាចម្បាំងទំនើបៗបន្ថែមទៀត សម្រាប់គម្រោងខាងលើនេះផងដែរ។ គម្រោងនេះ មានទាំងលើគោក អាកាស និងលើទឹក។
គួរជម្រាបថា F-35 ត្រូវបានផលិតដោយក្រុមហ៊ុន Lockheed Martin នៅអាមេរិក ជាយន្តហោះចម្បាំងជំនាន់ទី៥ ដែលមានសមត្ថភាពវាយប្រហារលើសត្រូវ នៅលើគោក និងលើអាកាស៕