រោងចក្រផលិតកាំភ្លើង AK រុស្ស៊ី បើកសម្ពោធជាផ្លូវការ នៅឥណ្ឌា

2019-03-04 10:14:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រោងចក្រផលិតកាំភ្លើង អាការបស់រុស្ស៊ី ត្រូវបានបើកសម្ពោធជាផ្លូវការ កាលពីថ្ងៃទី៣ ខែមីនា ឆ្នាំ២០១៩ នៅក្រុង Amethi រដ្ឋ Uttar Pradesh ប្រទេសឥណ្ឌា ក្រោមកិច្ចព្រមព្រៀងដែលចុះហត្ថលេខាដោយលោកប្រធានាធិបតីរុស្ស៊ី វ៉្លាឌឺមៀ ពូទីន និងលោកនាយករដ្ឋមន្ត្រីឥណ្ឌា ណារិនដ្រា ម៉ូឌី កាលពីឆ្នាំមុន។

ពិធីសម្ពោធរោងចក្រផលិតកាំភ្លើង AK-203 នៅក្រុង Amethi រដ្ឋ Uttar Pradesh ប្រទេសឥណ្ឌា

តាមផែនការ រោងចក្រនេះ នឹងផលិតកាំភ្លើង AK-203 ចំនួន ៧សែនដើម។ កងទ័ពឥណ្ឌា នឹងប្រើប្រាស់កាំភ្លើងស៊េរីថ្មីទាំងនេះ ជំនួសប្រភេទ INSAS ដែលខ្លួនកំពុងប្រើប្រាស់នាពេលបច្ចុប្បន្ន។

យោងតាមប្រសាសន៍របស់លោក ម៉ូឌី ក្នុងពិធីបើកសម្ពោធរោងចក្រផលិតកាំភ្លើងខាងលើ ឥណ្ឌាគ្រោងនាំចេញ AK-203 ទៅកាន់ប្រទេសទីបីផងដែរ តែលោកមិនបានបញ្ជាក់ថា ប្រទេសណាឡើយ។

ជាមួយគ្នានេះ សារលិខិតរបស់លោក ពូទីន ប្រធានាធិបតីរុស្ស៊ី ដែលត្រូវបានអានដោយរដ្ឋមន្ត្រីការពារជាតិឥណ្ឌា លោកស្រី Nirmala Sitharaman បានឲ្យដឹងថា តាមរយៈគម្រោងនេះ ឥណ្ឌានឹងអាចបំពេញតម្រូវការផ្នែកសន្តិសុខជាតិបន្ថែមទៀត ដោយបច្ចេកវិទ្យាចុងក្រោយទំនើបរបស់រុស្ស៊ី ហើយរោងចក្រផលិតកាំភ្លើងថ្មីនេះ ជានិមិត្តរូបនៃសម្ពន្ធភាពរវាងប្រទេសទាំងពីរ។

លោកប្រធានាធិបតីរុស្ស៊ីគូសបញ្ជាក់ក្នុងសារលិខិតទៀតថា ក្នុងរយៈពេលជាង ៧ទសវត្សរ៍ចុងក្រោយនេះ រុស្ស៊ីបានផ្គត់ផ្គង់អាវុធទៅឲ្យឥណ្ឌា និងបានបើករោងចក្រប្រមាណ ១៧០កន្លែង ក្នុងប្រទេសនេះ។

សូមជម្រាបថា AK-203 ជាអាវុធទំនើបចុងក្រោយ ដែលបន្តវេនពីប្រភេទ AK-47 ។ វាមានទម្ងន់ស្រាលជាង ប្រភេទ INSAS ដែលកងទ័ពឥណ្ឌាកំពុងប្រើប្រាស់ ដោយវាមានប្រសិទ្ធភាពខ្ពស់នៅចម្ងាយត្រឹម ៤០០ម៉ែត្រ។ AK-203 បំពាក់គ្រាប់ប្រវែង ៧,៦២ មិល្លីម៉ែត្រ ដោយ ១វិនាទី បាញ់បាន ១០គ្រាប់៕