ដូណាល់ ត្រាំ ថាការលុបចោលសមយុទ្ធជាមួយកូរ៉េខាងត្បូង មិនពាក់ព័ន្ធនឹង គីម ជុងអ៊ុនទេ

2019-03-05 02:19:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីអាមេរិក លោក ដូណាល់ ត្រាំ បានច្រានចោលនូវការលើកឡើងថា ការលុបចោលសមយុទ្ធយោធារវាងអាមេរិក និងកូរ៉េខាងត្បូង គឺជាការធ្វើសម្បទានឱ្យមេដឹកនាំកូរ៉េខាងជើង លោក គីម ជុងអ៊ុន។

ជំនួបត្រាំ-គីម លើកទី២ នៅវៀតណាម កាលពីសប្តាហ៍មុន (រូបថត៖ ផ្តល់សិទ្ធិដោយ Reuters)

លោក ដូណាល់ ត្រាំ បានបង្ហោះនៅលើបណ្តាញ Twitter នៅថ្ងៃទី៥ ខែមីនា ឆ្នាំ២០១៩នេះ ដោយបញ្ជាក់ថា លោកបានសម្រេចចិត្តលុបចោលសមយុទ្ធនេះជាយូរមកហើយ ដោយសារតែត្រូវចំណាយលុយច្រើនពេក។ លោកថា ជុំវិញការធ្វើសមយុទ្ធនេះ មិនត្រូវបានលើកយកមកពិភាក្សាជាមួយលោក គីម ជុងអ៊ុន ក្នុងអំឡុងជំនួបកំពូលលើកទី២ នៅវៀតណាម កាលពីសប្តាហ៍មុននោះឡើយ។

កាលពីថ្ងៃទី២មីនា មន្ទីរបញ្ចកោណអាមេរិក បានប្រកាសជាផ្លូវការថា ខ្លួនបានលុបចោលសមយុទ្ធប្រចាំឆ្នាំមួយជាមួយកូរ៉េខាងត្បូង ដែលសមយុទ្ធនេះត្រូវបានហៅថា «Foal Eagle and Key Resolve»។ ក្នុងសេចក្តីប្រកាសនោះ បានបញ្ជាក់ថា ការលុបចោលសមយុទ្ធនេះ គឺដើម្បីខិតខំបង្កើតទំនាក់ទំនងជាមួយកូរ៉េខាងជើង និងឱ្យប្រទេសនេះ បោះបង់នុយក្លេអ៊ែរ។

ជារឿយៗ ការធ្វើសមយុទ្ធយោធារវាងអាមេរិក និងកូរ៉េខាងត្បូង តែងតែត្រូវបានកូរ៉េខាងជើងចាត់ទុកថា ជាការហ្វឹកហាត់ដើម្បីត្រៀមឈ្លានពានខ្លួន៕

ប្រភព៖ Channelnewsasia ប្រែសម្រួល៖ សំភី