លោក ត្រាំ គ្រោងដកប្រព័ន្ធអនុគ្រោះពន្ធ GSP ពីឥណ្ឌា
- 2019-03-05 03:43:24
- ចំនួនមតិ 0 | ចំនួនចែករំលែក 0
លោក ត្រាំ គ្រោងដកប្រព័ន្ធអនុគ្រោះពន្ធ GSP ពីឥណ្ឌា
ចន្លោះមិនឃើញ
លោកប្រធានាធិបតីអាមេរិក ដូណាល់ ត្រាំ កាលពីថ្ងៃទី៤ ខែមីនា ឆ្នាំ២០១៩ បានឲ្យដឹងថា លោកគ្រោងដកប្រព័ន្ធអនុគ្រោះពន្ធ GSP លើទំនិញនាំចូលពីប្រទេសឥណ្ឌា ដែលមានទំហំទឹកប្រាក់ប្រមាណ ៥,៦ពាន់លានដុល្លារអាមេរិក។
លោក ត្រាំ បានថ្លែងថា ជំហររបស់លោក ក្នុងការដកប្រព័ន្ធអនុគ្រោះពន្ធនេះ ដោយសាររដ្ឋាភិបាលឥណ្ឌា មិនបានផ្ដល់នូវលក្ខខណ្ឌដែលស្មើភាព និងសមស្របមួយ ដើម្បីឲ្យទំនិញអាមេរិកចូលទៅកាន់ទីផ្សារឥណ្ឌា។
ឥណ្ឌាបានកំណត់ពន្ធខ្ពស់ ចំពោះទំនិញដែលនាំចូលពីអាមេរិក មានដូចជា ផ្កា កៅស៊ូ យានយន្ត ភេសជ្ជៈមានជាតិអាល់កុល និង ផលិតផលវាយនភណ្ឌ ជាដើម។
ពាក់ព័ន្ធនឹងបញ្ហានេះ ការិយាល័យតំណាងពាណិជ្ជកម្មអាមេរិក បានបញ្ជាក់ថា ការដកប្រព័ន្ធអនុគ្រោះពន្ធ GSP ពីឥណ្ឌា នឹងចូលជាធរមានក្នុងពេលយ៉ាងតិច ៦០ថ្ងៃ ក្រោយការជូនដំណឹងទៅកាន់សភាអាមេរិក និងរដ្ឋាភិបាលឥណ្ឌា។
យោងតាមរបាយការណ៍ពីការិយាល័យតំណាងពាណិជ្ជកម្មអាមេរិក បង្ហាញថា ឱនភាពពាណិជ្ជកម្មអាមេរិក-ឥណ្ឌា មានទំហំទឹកប្រាក់ ២៧,៣ពាន់លានដុល្លារអាមេរិក ក្នុងឆ្នាំ២០១៧។
សូមជម្រាបថា ពន្ធអនុគ្រោះ GSP ផ្ដល់សម្រាប់ផលិតផលមកពីជាង ១២០ប្រទេស ដែលនាំចូលទីផ្សារអាមេរិក ក្នុងនោះ ក៏មានឥណ្ឌាផងដែរ៕