សភាអាល្លឺម៉ង់ សន្យាផ្តល់ព័ត៌មានពិតរបស់កម្ពុជា ទៅភាគីពាក់ព័ន្ធជុំវិញបញ្ហា EBA
- 2019-03-05 04:01:50
- ចំនួនមតិ 0 | ចំនួនចែករំលែក 0
សភាអាល្លឺម៉ង់ សន្យាផ្តល់ព័ត៌មានពិតរបស់កម្ពុជា ទៅភាគីពាក់ព័ន្ធជុំវិញបញ្ហា EBA
ចន្លោះមិនឃើញ
សមាជិកសភាអាល្លឺម៉ង់ លោក Manfred Grund បានសន្យាថា នឹងផ្តល់ព័ត៌មានពិតពីកម្ពុជា ទៅដល់ភាគីពាក់ព័ន្ធជុំវិញការដកប្រព័ន្ធអនុគ្រោះពន្ធ EBA ។ ការលើកឡើងនេះ ធ្វើឡើងក្នុងជំនួបពិភាក្សារវាងលោក Manfred Grund និងលោក ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា កាលពីថ្ងៃទី៤ ខែមីនា ឆ្នាំ២០១៩។
លោក Manfred Grund បានបញ្ជាក់ថា ដំណើរទស្សនកិច្ចរបស់លោកមកកាន់កម្ពុជា គឺដើម្បីសិក្សាស្វែងយល់ និងថ្លឹងថ្លែង បញ្ហា EBA ដើម្បីឲ្យមានការទទួលបានព័ត៌មានស្មើគ្នាពីគ្រប់ភាគីពាក់ព័ន្ធ។ ដំណើរទស្សនកិច្ចនេះ ក៏ដើម្បីពង្រឹងកិច្ចសហប្រតិបត្តិការរវាងសភាអាល្លឺម៉ង់ និងសភាកម្ពុជា ឲ្យកាន់តែល្អប្រសើរឡើងថែមទៀតផងដែរ។
លោក ឈាង វុន បានជម្រាបអំពីស្ថានការណ៍នយោបាយនៅកម្ពុជា ពិសេសសុខសន្តិភាព និងការអភិវឌ្ឍដល់លោក Manfred Grund។ លោកលើកឡើងថា កម្ពុជាបានអនុវត្តគោលនយោបាយដឹកនាំប្រទេសតាមបែបលទ្ធិប្រជាធិបតេយ្យសេរីពហុបក្ស។ កម្ពុជាបានរៀបចំការបោះឆ្នោត រៀងរាល់ប្រាំឆ្នាំម្តង ដោយមានគណបក្សជាច្រើនចូលរួមប្រកួតប្រជែងដោយសេរី និងយុត្តិធម៌។
លោក ឈាង វុន បន្ថែមថា សហគមន៍អឺរ៉ុបមិនគួរយកបញ្ហា EBA ដែលជាបញ្ហាពាណិជ្ជកម្ម មកធ្វើជារឿងនយោបាយនៅកម្ពុជានោះទេ។ ជាមួយគ្នានេះលោកក៏បានស្នើដល់សភាអាល្លឺម៉ង់ បន្តជួយកម្ពុជាទៅលើគ្រប់វិស័យ និងការបណ្តុះបណ្តាលយុវជនជំនាន់ថ្មីផងដែរ៕
រូបថត៖ ហ្វេសប៊ុករដ្ឋសភាជាតិ