រដ្ឋសភាពិនិត្យនីតិវិធី ដើម្បីទទួលជំនួយវៀតណាម ២៥លានដុល្លារ មកសាងសង់អគាររដ្ឋបាល

2019-03-06 06:52:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ងួន ញ៉ិល អនុប្រធានទី១នៃរដ្ឋសភា នាព្រឹកថ្ងៃទី៦ ខែមីនា ឆ្នាំ២០១៩ បានដឹកនាំកិច្ចប្រជុំជាមួយ គណៈកម្មការចំពោះកិច្ច និងគណៈកម្មការប្រតិបត្តិរបស់រដ្ឋសភា ដើម្បីរៀបចំនីតិវិធីក្នុងការទទួលជំនួយរបស់ប្រទេសវៀតណាម មកសាងសង់អគាររដ្ឋបាលរដ្ឋសភាកម្ពុជា ដែលមានតម្លៃ២៥លានដុល្លារ។

កិច្ចប្រជុំនេះ គឺដើម្បីពិនិត្យលើរបៀបវារៈមួយចំនួនដូចជា៖

-រៀបចំនូវនីតិវិធីសម្របសម្រួល ក្នុងការទទួលជំនួយ ដែលមានចែងក្នុងមាត្រា២ នៃអនុស្សារណៈយោគយល់ MOU រវាងក្រសួងហិរញ្ញវត្ថុវៀតណាម និងអគ្គលេខាធិការដ្ឋានរដ្ឋសភាកម្ពុជា ដែលតម្រូវឲ្យភាគីកម្ពុជា ត្រូវជូនដំណឹងដល់ភាគីវៀតណាម អំពីអ្នកសម្របសម្រួលតំណាងឲ្យរាជរដ្ឋាភិបាលនៃព្រះរាជាណាចក្រកម្ពុជា ដើម្បីធ្វើសហប្រតិបត្តិការជាមួយភាគីវៀតណាម ក្នុងការត្រៀមរៀបចំកិច្ចព្រមព្រៀងផ្ដល់ជំនួយ និងធ្វើជាតំណាងឲ្យរាជរដ្ឋាភិបាលកម្ពុជា ក្នុងការអនុវត្តកិច្ចព្រមព្រៀង។

-ចាត់ចែងការត្រួតពិនិត្យជាក់ស្ដែងនូវការអនុវត្តគម្រោងសាងសង់តាមមធ្យោបាយដែលមាន និងជ្រើសរើសយកក្រុមហ៊ុនកុងស៊ុលតង់បរទេស មកធ្វើសវនកម្មត្រួតពិនិត្យលក្ខណៈបច្ចេកទេស និងបញ្ហាផ្សេងៗ។

សូមជម្រាបថា ពិធីចុះហត្ថលេខាលើអនុស្សារណៈយោគយល់ MOU នេះ ត្រូវបានធ្វើឡើងក្នុងអំឡុងពេលដែល លោក ង្វៀន ភូជុង ប្រធានរដ្ឋវៀតណាម បានបំពេញទស្សនកិច្ចជាផ្លូវរដ្ឋនៅក្នុងព្រះរាជាណាចក្រកម្ពុជា ពីថ្ងៃទី២៥ ដល់ ២៦ ខែកុម្ភៈ ឆ្នាំ២០១៩កន្លងទៅនេះ។

លោក ងួន ញ៉ិល បានជំរុញឱ្យពន្លឿននីតិវិធីមួយចំនួនឱ្យចប់សព្វគ្រប់ ដើម្បីផ្តើមការសាងសង់អគារដ៏មានសារៈសំខាន់ ដែលជាកន្លែងធ្វើការរបស់មន្រ្តីអគ្គលេខាធិការដ្ឋានរដ្ឋសភានេះ៕