រាជរដ្ឋាភិបាល បង្កើតតំបន់ទេសចរណ៍ពិសិដ្ឋដើម្បីទាក់ទាញភ្ញៀវទេសចរ និងវិនិយោគ
- 2019-03-11 01:37:06
- ចំនួនមតិ 0 | ចំនួនចែករំលែក 0
រាជរដ្ឋាភិបាល បង្កើតតំបន់ទេសចរណ៍ពិសិដ្ឋដើម្បីទាក់ទាញភ្ញៀវទេសចរ និងវិនិយោគ
ចន្លោះមិនឃើញ
រាជរដ្ឋាភិបាលកម្ពុជា បានចេញអនុក្រឹត្យមួយក្នុងការបង្កើតតំបន់ទេសចរណ៍ពិសិដ្ឋ គឺក្នុងគោលបំណងជំរុញការអភិវឌ្ឍផលិតផលទេសចរណ៍ ទាក់ទាញភ្ញៀវទេសចរជាតិ អន្តរជាតិ និងជំរុញការវិនិយោគលើវិស័យទេសចរណ៍ ដើម្បីរួមចំណែកអភិវឌ្ឍសេដ្ឋកិច្ច សង្គមកម្ពុជា។ អនុក្រឹត្យនេះ មានគោលដៅកំណត់វិធាន និងយន្តការក្នុងការបង្កើត និងគ្រប់គ្រងតំបន់ទេសចរណ៍ពិសិដ្ឋ។ នេះបើយោងតាមអនុក្រឹត្យចុះថ្ងៃទី០៧ ខែមីនា ឆ្នាំ២០១៩ ដែលចុះហត្ថលេខាដោយសម្តេចនាយករដ្ឋមន្ត្រី ហ៊ុន សែន។
ម្ចាស់តំបន់ទេសចរណ៍ពិសិដ្ឋ ឬហៅថា ម្ចាស់តំបន់ សំដៅដល់បុគ្គលមានសញ្ជាតិខ្មែរ ឬបរទេសដែលបានទទួលការអនុញ្ញាតពីរាជរដ្ឋាភិបាល ឲ្យបង្កើត អភិវឌ្ឍន៍ និងគ្រប់គ្រងតំបន់ទេសចរណ៍ពិសិដ្ឋណាមួយក្នុងព្រះរាជាណាចក្រកម្ពុជា។ ដៃគូតំបន់ទេសចរណ៍ពិសិដ្ឋ ឬហៅថាដៃគូតំបន់សំដៅដល់បុគ្គលសញ្ជាតិខ្មែរ ឬបរទេសដែលចូលរួមការអភិវឌ្ឍតំបន់ទេសចរណ៍ពិសិដ្ឋ ក្នុងនោះ រួមមានទេសចរណ៍ពិសេសផងដែរ។
ទេសចរណ៍ពិសេស សំដៅដល់ទេសចរអន្តរជាតិ ដែលទទួលបានការអនុញ្ញាត ចូលចេញ និងស្នាក់នៅក្នុងតំបន់ទេសចរណ៍ពិសិដ្ឋ ស្របតាមច្បាប់នៃព្រះរាជាណាចក្រកម្ពុជា។ បុគ្គលសំដៅដល់រូបវន្តបុគ្គល ឬនីតិបុគ្គល។
តំបន់ទេសចរណ៍ពិសិដ្ឋ ត្រូវបានអនុញ្ញាតឱ្យបង្កើតឡើងនៅលើទឹកដីនៃព្រះរាជាណាចក្រកម្ពុជា នៅតាមតំបន់សក្តានុពលទេសចរណ៍សមស្របប្រកបដោយយុទ្ធសាស្ត្រស្របតាមច្បាប់ជាធរមាន និងការសម្រេចរបស់រាជរដ្ឋាភិបាលកម្ពុជា ដោយអនុក្រឹត្យ។
តំបន់ទេសចរណ៍ពិសិដ្ឋ អាចផ្តួចផ្តើមបង្កើតឡើងដោយរដ្ឋ ឬឯកជន ឬរដ្ឋចម្រុះឯកជន ការបង្កើតតំបន់ទេសចរណ៍ពិសិដ្ឋត្រូវអនុលោមទៅតាមលក្ខខណ្ឌដូចតទៅ៖
-ត្រូវមានទំហំដីចាប់ពី ១០០ហិកតាឡើងទៅដោយត្រូវមានទីតាំងព្រំប្រទល់ភូមិសាស្រ្ត និងនិយាមការច្បាស់លាស់។
-ត្រូវមានផែនការមេអភិវឌ្ឍតំបន់ទេសចរណ៍ពិសិដ្ឋ។
-ត្រូវមានសម្បទាសេវាកម្មទេសចរណ៍ដូចជាសេវាកម្មស្នាក់នៅទេសចរណ៍ និវេសនដ្ឋានទេសចរណ៍ សេវាកម្មម្ហូបអាហារ និងភេសជ្ជៈ សេវាកម្មមណ្ឌលកម្សាន្តទេសចរណ៍។
-មណ្ឌលសម្រាកលំហែកម្សាន្តទេសចរណ៍ មណ្ឌលកីឡាទេសចរណ៍ មណ្ឌលពាណិជ្ជកម្មមណ្ឌលផ្តល់សេវាថែទាំសុខភាពទេសចរណ៍ មណ្ឌលសេវាកម្មទេសចរណ៍ពាក់ព័ន្ធផ្សេងៗទៀតជាដើម។
-ត្រូវមានហេដ្ឋារចនាសម្ព័ន្ធគាំទ្រនានាដូចជា ប្រព័ន្ធផ្លូវគមនាគមន៍ ប្រព័ន្ធទឹកស្អាត អគ្គិសនីបណ្ដាញប្រៃសណីយ៍ ទូរគមនាគមន៍ ប្រព័ន្ធប្រតិកម្មសម្អាតសំណល់រាវ និងការគ្រប់គ្រងសំណល់រឹងត្រឹមត្រូវ មានវិធានការការពារបរិស្ថាន ហេដ្ឋារចនាសម្ព័ន្ធដទៃទៀតជាដើម។
-ត្រូវមានម្ចាស់តំបន់ និងដៃគូតំបន់ចូលរួមការអភិវឌ្ឍក្នុងតំបន់ទេសចរណ៍ពិសិដ្ឋបុគ្គលទាំងឡាយ ដែលមានបំណងបង្កើតតំបន់ទេសចរណ៍ពិសិដ្ឋ នៅក្នុងតំបន់សក្តានុពលទេសចរណ៍ណាមួយ។
-ត្រូវធ្វើសំណើសុំគោលការណ៍អនុញ្ញាតឲ្យបង្កើត និងអភិវឌ្ឍតំបន់ទេសចរណ៍ពិសិដ្ឋពីរាជរដ្ឋាភិបាល តាមរយៈគណៈកម្មការអភិវឌ្ឍន៍តំបន់ទេសចរណ៍ ដែលជាសេនាធិការគណៈកម្មការអភិវឌ្ឍទេសចរណ៍ មានភារកិច្ចធ្វើការសិក្សាវាយតម្លៃ និងសន្និដ្ឋានលើសំណើសុំ ហើយលើកយោបល់ជូនរាជរដ្ឋាភិបាលពិនិត្យសម្រេច៕