ចិន ផ្អាកហោះហើរយន្តហោះ 737 Max គ្រប់ក្រុមហ៊ុនអាកាសចរណ៍ទាំងអស់

2019-03-11 02:09:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋាភិបាលចិន បានចេញការណែនាំដល់ក្រុមហ៊ុនអាកាសចរណ៍ទាំងអស់ ធ្វើការផ្អាកការហោះហើរប្រភេទយន្តហោះ Boeing 737 Max ទាំងអស់ បន្ទាប់ពីយន្តហោះនេះរបស់ក្រុមហ៊ុនអាកាសចរណ៍អេត្យូពី Ethiopian Airlines បានធ្លាក់កាលពីថ្ងៃអាទិត្យ ទី១០ ខែមីនា ឆ្នាំ២០១៩ នៅប្រទេសអេត្យូពី។

ជើងហោះហើរលេខ ET302 ខាងលើ បានធ្លាក់ ក្រោយចាកចេញពីក្រុង Addis Ababa ប្រទេសអេត្យូពី តែប៉ុន្មាននាទីប៉ុណ្ណោះ អំឡុងហោះហើរទៅក្រុង Nairobi ប្រទេសកេនយ៉ា ដែលសម្លាប់មនុស្សចំនួន ១៥៧នាក់។

នេះជាឧបទ្ទវហេតុលើកទី២ ក្នុងរយៈពេល ៥ខែ ដែលបានកើតឡើងចំពោះយន្តហោះ Boeing 737 Max របស់ក្រុមហ៊ុនអាមេរិក ប៊ូអ៊ីញ។ កាលពីខែតុលា ឆ្នាំ២០១៨ យន្តហោះដូចគ្នារបស់ក្រុមហ៊ុនឥណ្ឌូណេស៊ី Lion Air បានធ្លាក់នៅសមុទ្រចាហ្វា ប្រទេសឥណ្ឌូណេស៊ី បណ្ដាលឲ្យស្លាប់ ១៨៩នាក់។ មូលហេតុធ្លាក់ជើងហោះហើរ Lion Air នេះ គឺដោយសារបញ្ហាបច្ចេកទេសរបស់យន្តហោះ។

សូមជម្រាបថា យន្តហោះ 737 Max ជាម៉ូដែលផលិតដោយ ប៊ូអ៊ីញ ដែលត្រូវបានដាក់ឲ្យដំណើរការហោះហើរ ជាលើកដំបូង កាលពីឆ្នាំ២០១៧។ ប៊ូអ៊ីញ បានបញ្ជូនយន្តហោះម៉ូដែល 737 Max ចំនួន ២១៩គ្រឿង ទៅឲ្យក្រុមហ៊ុនអាកាសចរណ៍នានា។ ហើយក្រុមហ៊ុនដដែលទទួលបានការកុម្ម៉ង់ចំនួន ៤៥០០ ពីក្រុមហ៊ុនអាកាសចរណ៍ជាច្រើន។

យោងតាមក្រុមហ៊ុនប៊ូអ៊ីញ គិតត្រឹមខែមករា ឆ្នាំ២០១៩ ក្រុមហ៊ុនចិន ដែលបានទិញយន្តហោះ 737 Max ពីប៊ូអ៊ីញ មានដូចជា Southern Airlines មាន ១៦គ្រឿង (កំពុងកុម្ម៉ង់ថែម ៣៤គ្រឿង), Eastern Airlines មាន ១៣គ្រឿង និង Air China មាន ១៤គ្រឿង ព្រមទាំងក្រុមហ៊ុន២ទៀត ដែលមិនត្រូវបានបញ្ជាក់ពីចំនួនយន្តហោះ៕

អត្ថបទទាក់ទង ប៊ូអ៊ីញ ចេញការណែនាំឲ្យប្រុងប្រយ័ត្នប្រព័ន្ធ Sensor ក្រោយការធ្លាក់យន្តហោះ Lion Air

ប្រភព៖ Straits Times ប្រែសម្រួល៖ លាភ.