ប្រធានអង្គការមួយរបស់ UN រួចជីវិត ដោយសារខកជើងយន្តហោះដែលធ្លាក់

2019-03-11 04:02:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានសមាគមសំណល់រឹងអន្តរជាតិ ដែលជាអង្គការមួយក្រោមដំបូលអង្គការសហប្រជាជាតិ (UN) លោក Antonis Mavropoulos បានរួចផុតពីសេចក្ដីស្លាប់ បន្ទាប់ពីខកជើងហោះហើរ ដែលបានធ្លាក់ពេលចាកចេញពីព្រលានយន្តហោះក្រុង Addis Ababa ប្រទេសអេត្យូពី កាលពីថ្ងៃទី១០ ខែមីនា ឆ្នាំ២០១៩។

លោក Mavropoulos ដែលមានសញ្ជាតិក្រិក បានរៀបរាប់លើផុសមួយ ក្នុងបណ្ដាញទំនាក់ទំនងសង្គមហ្វេសប៊ុកដូច្នេះថា៖ «ខ្ញុំបានខឹងយ៉ាងខ្លាំង ព្រោះមិនមាននរណាម្នាក់ជួយនាំរូបខ្ញុំទៅកាន់ច្រកឡើងយន្តហោះទាន់ពេលវេលា»។

ប្រធានសមាគមសំណល់រឹងអន្តរជាតិ របស់ UN បានទៅដល់ច្រកឡើងយន្តហោះ យឺត ២នាទី ក្រោយទ្វារត្រូវបានបិទ។ លោកបានកក់ជើងហោះហើរ មួយផ្សេងទៀត បន្ទាប់ពីបុគ្គលិកក្រុមហ៊ុនអាកាសចរណ៍ រារាំងមិនឲ្យលោកឡើងយន្តហោះ។

«ពួកគេបាននាំខ្ញុំទៅប៉ុស្តិ៍ប៉ូលិស ក្នុងព្រលានយន្តហោះនោះ។ ប៉ូលិសបានណែនាំខ្ញុំ ឲ្យឈប់តវ៉ាទៀតទៅ ហើយអរគុណព្រះ ព្រោះខ្ញុំគឺជាអ្នកដំណើរតែម្នាក់គត់ដែលមិនបានជិះលើជើងហោះហើរ ET302 ដែលបានបាត់ចេញពីរ៉ាដា»។ លោក Mavropoulos បន្ត។

យោងតាមសេចក្ដីរាយការណ៍ ឲ្យដឹងថា អ្នកជិះ ១៥៧នាក់នៅលើយន្តហោះដែលជួបឧបទ្ទវហេតុខាងលើ មានចំនួនជាង ៣០សញ្ជាតិ ក្នុងនោះសញ្ជាតិកេនយ៉ា កាណាដា និងអេត្យូពី មានច្រើនជាងគេ។ ជាមួយគ្នានេះ ក៏មានបុគ្គលិកមកពី UN មួយចំនួនផងដែរ៕