មហាធៀ ប្រាប់ទៅហ្វីលីពីន៖ ប្រយ័ត្នឲ្យមែនទែនជាមួយកម្ចីរបស់ចិន

2019-03-11 08:14:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក មហាធៀ មហាម៉ាត់ នាយករដ្ឋមន្ត្រីប្រទេសម៉ាឡេស៊ី បានព្រមានចំពោះប្រទេសហ្វីលីពីន ពីបញ្ហាកម្ចីរដ្ឋាភិបាលចិន ដោយលោកលើកឡើងពីគម្រោងហេដ្ឋារចនាសម្ពន្ធដែលមិនស្មើភាពដែលម៉ាឡេស៊ី ធ្លាប់មានបទពិសោធកន្លងមក។

ថ្លែងក្នុងកិច្ចសម្ភាសមួយក្នុងកម្មវិធីទូរទស្សន៍មួយ អំឡុងដំណើរទស្សនកិច្ចផ្លូវរដ្ឋនៅក្រុងម៉ានីល កាលពីពេលថ្មីៗនេះ លោក មហាធៀ បានផ្ដល់ដំបូន្មានឲ្យហ្វីលីពីន មិនត្រូវដើរតាមគន្លងរបស់ប្រទេសមួយចំនួនដែលដើរខុស តាមរយៈការវិនិយោគហេដ្ឋារចនាសម្ព័ន្ធពីចិន ដែលបង្កើតជាបំណុលដែលប្រទេសទាំងនោះមិនអាចមានលទ្ធភាពសង។

លោក មហាធៀ ប្រាប់ដូច្នេះថា៖ «បើអ្នកខ្ចីច្រើនពីចិន ហើយអ្នកមិនមានលទ្ធភាពសងទេនោះ អ្នកដឹងទេបើអ្នកជាអ្នកខ្ចី អ្នកនឹងស្ថិតក្រោមការគ្រប់គ្រងរបស់ម្ចាស់បំណុល។ ដូច្នេះពួកយើងត្រូវតែប្រុងប្រយ័ត្នឲ្យមែនទែនពីបញ្ហានេះ»។

ជាការឆ្លើយតប នៅថ្ងៃទី១១ ខែមីនា ឆ្នាំ២០១៩នេះ អ្នកនាំពាក្យ Salvador Panelo របស់លោកប្រធានាធិបតី Rodrigo Duterte បានថ្លែងថា ហ្វីលីពីននឹងយកដំបូន្មានរបស់លោក មហាធៀ មកពិចារណា ហើយនឹងធ្វើការវាយតម្លៃទៅលើគ្រប់កម្ចីទាំងអស់ពីចិន។

សូមជម្រាបថា ម៉ាឡេស៊ី បានលុបចោលគម្រោង ៣ពាន់លានដុល្លារអាមេរិក ដែលខ្លួនបានចុះហត្ថលេខាជាមួយចិន ដើម្បីតភ្ជាប់បណ្ដាញបញ្ជូនប្រេង និងឧស្ម័ន ក្រោយពីលោក មហាធៀ ឡើងជានាយករដ្ឋមន្ត្រីកាលពីខែឧសភា ឆ្នាំ២០១៨៕

អត្ថបទទាក់ទង ម៉ាឡេស៊ី លុបចោលគម្រោងតម្លៃជិត៣ពាន់លានដុល្លារ ដែលខ្លួនបានចុះជាមួយចិន

ប្រភព៖ rappler ប្រែសម្រួល៖ លាភ.