ពិព័រណ៍អត់ឈ្មោះរបស់ ឯម រៀម បង្កប់គំនិតឲ្យមនុស្សស្រលាញ់បរិស្ថាន វប្បធម៌ សុភមង្គលគ្រួសារ

2019-03-11 08:43:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បណ្ដុំស្នាដៃសិល្បៈបង្កើតថ្មីចំនួន១៧របស់បណ្ឌិតច្នៃម៉ូដមកពីស្រុកបារាំងលោក ឯម រៀម ត្រូវបានដាក់តាំងលើកដំបូងឲ្យចូលទស្សនាដោយសេរីរយៈពេលជិតមួយខែនៅវិចិត្រសាលវិទ្យាស្ថានភាសាបារាំងក្នុងរាជធានីភ្នំពេញ។

ស្នាដៃចម្លាក់ដែលប្រើរយៈពេលជិត២ឆ្នាំក្នុងការគិត និងផលិត។ ស្នាដៃសិល្បៈចម្លាក់ទាំងអស់វិចិត្រករល្បីក្នុងឆាកអន្តរជាតិរូបនេះគឺផលិតចេញពី ឈើ ដែក ចាស់ៗដែលប្រើប្រាស់រួច និងសម្ភារៈផ្សេងៗដែលសន្សំទុកនិងរបស់របរដែលគេបោះចោល។

វិចិត្រករជើងចាស់លោកឯម រៀម បានលើកឡើងថា ពិព័រណ៍លើកនេះគឺជាពិព័រណ៍ចម្លាក់ អត់ឈ្មោះ តែវាបង្កប់គំនិតឲ្យមនុស្សចេះស្រលាញ់បរិស្ថាន ធនធានធម្មជាតិ វប្បធម៌ ចេះបង្កើតថ្មី ទាន់សម័យតែមានផលប៉ះពាល់តិច និងបង្កើតសុភមង្គលក្នុងគ្រួសារ។

លោក ឯម រៀម បញ្ជាក់ថា មូលហេតុដែលលោកមិនដាក់ឈ្មោះពិព័រណ៍នេះ គឺចង់ឲ្យអ្នកមើលរៀនគិត រៀនពិចារណា និងដាក់ឈ្មោះខ្លួនឯង ហើយអ្នកដែលមកមើលទាំងនោះគាត់អាចយល់ និងដឹងពីអត្ថន័យនៃស្នាដៃសិល្បៈដែលបានដាក់បង្ហាញទាំងអស់នេះច្រើនជាងសិល្បករដែលជាអ្នកផលិតទៅទៀត។

ពិព័រណ៍អត់ឈ្មោះរបស់ឯម រៀម ដែលបង្កប់គំនិតយ៉ាងជ្រាលជ្រៅឲ្យមនុស្សស្រលាញ់បរិស្ថាន វប្បធម៌ សុភមង្គលគ្រួសារនេះត្រូវដាក់តាំងនៅវិទ្យាស្ថានភាសាបារាំងចាប់ពីថ្ងៃ ៧ ខែមីនា រហូតដល់ថ្ងៃ៣១មីនាឆ្នាំ២០១៩។ ហើយនៅឆ្នាំបន្ទាប់ស្នាដៃសិល្បៈទាំងនេះគ្រោងនឹងយកទៅដាក់តាំងបង្ហាញនៅលើទឹកដីអង្គរ ខេត្តសៀមរាបផងដែរ៕