ស្ងាត់ៗយូរហើយ! រ៉ូណាន់ ចេញមកអះអាងពីភាពយន្តថ្មី ដែលជិតចេញបញ្ចាំង

2019-03-12 08:29:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ស្ងាត់បាត់មុខយូរអស់មួយរយៈមក ទើបដឹង លោក ចាន់ណា រ៉ូណាន បានសម្ងំផលិតរឿងថ្មីឱ្យផលិតកម្មអិលឌីគឺរឿង «ឯណាខ្មោច?»ត្រៀមនឹងចាក់បញ្ចាំងឆាប់ៗនេះ។

ជាមួយការផ្ទុះព័ត៌មានរឿងថ្មីរបស់លោកត្រៀមនឹងចេញបញ្ចាំងនោះ ទន្ទឹមនឹងអ្នកធ្លាប់គាំទ្រស្នាដៃផលិតករវ័យក្មេងរូបនេះ បាន និងកំពុងងឿងឆ្ងល់ចំពោះភាពស្ងប់ស្ងាត់របស់លោក អស់រយៈកាលប្រមាណ១ឆ្នាំមកហើយ។ បែបនេះក្ដី លោកថា ពេលនេះ លោកវិលមកវិញហើយ ជាមួយនឹងរឿង រឿង «ឯណាខ្មោច?»។

ស្នាដៃថ្មីនោះ ត្រូវបានផលិតករ និងសិល្បកររំពឹងខ្ពស់ថា នឹងស្រូបបានអ្នកចូលទស្សនា ច្រើនកុះករនៅពេលខាងមុខ ព្រោះតែភាពយន្តនេះស្ថិតនៅ ក្រោមការសម្រិតសម្រាំងយ៉ាងពិសេស ពីផលិតករលោក ចាន់ណា រ៉ូណាន ដែលធ្លាប់ធ្វើឲ្យផ្ទុះកក្រើក វិស័យភាពយន្តលើរឿងជាច្រើនដូចជារឿង "កំណត់ហេតុនាងនាថ" និងរឿង "សសរកន្លោង" ជាដើម ។

រឿងនេះមានចូលរួមសម្តែងដោយតារា ប្រុសស្រីល្បីឈ្មោះជាច្រើនមាន ដូចជា លោក ទ្រី តារាវុធ កញ្ញា សួង ស៊ីធឿន លោក ភី ម៉ៃ កញ្ញា យេយេ លោក សាតាន់ លោក ដូ រីកូ ជាដើម ។ រ៉ូណាន បានបញ្ជាក់សាច់រឿងថា ភាពយន្តនេះនិយាយអំពីក្រុម និស្សិតមួយក្រុម ត្រូវមកចុះកម្មសិក្សា នៅមន្ទីពេទ្យបង្អែក ដែលគេល្បីថាមានខ្មោច លងសាហាវ ចំយប់ដែលគេបញ្ជូនសព តៃហោង កូនស្រីសេដ្ឋីម្នាក់ ស្លាប់ដោយសារក្រឡាប់ឡានធ្លាក់ជ្រោះរក្សាទុកក្នុងមន្ទីពេទ្យនោះ។

នាយប់ស្ងាត់ពួកគេបានជួបខ្មោច ដែលអ្នកស្រុកតែងនិយាយថា ចេញមកលងបន្លាចគ្រប់គ្នាៗ ពួកគេព្យាយាមរត់គេចខ្មោច ទាំងអស់លង តែបែរជាជួបខ្មោចកូនស្រីលោកសេដ្ឋី បង្ហាញខ្លួន ។ លោក បានបញ្ជាក់ថា ខ្សែភាពយន្តនេះពោរពេញដោយឈុតឆាកបន្លាច និងកំប្លែងសើចចុកពោះ ដែលវា គឺជាវណ្ណកម្មថ្មីតម្រូវចិត្ត អ្នកគាំទ្រស្នាដៃលោកកន្លងមក។

តាមការបញ្ជាក់របស់ រ៉ូណាន ភាពយន្តនេះនឹងចាក់បញ្ចាំងជាផ្លូវការនៅថ្ងៃទី២១ ខែមីនា ឆ្នាំ២០១៩ខាងមុខនេះ នៅគ្រប់រោងភាពយន្តនៅរាជធានី៕