សម្តេច ហ៊ុន សែន ប្រកាសគម្រោងពង្រីកផ្លូវជាតិលេខ៤៨ ទៅជាផ្លូវហាយវេ
- 2019-03-13 01:59:34
- ចំនួនមតិ 0 | ចំនួនចែករំលែក 0
សម្តេច ហ៊ុន សែន ប្រកាសគម្រោងពង្រីកផ្លូវជាតិលេខ៤៨ ទៅជាផ្លូវហាយវេ
ចន្លោះមិនឃើញ
សម្តេចនាយករដ្ឋមន្រ្តី ហ៊ុន សែន បានប្រកាសនាព្រឹកថ្ងៃទី១៣ ខែមីនា ឆ្នាំ២០១៩នេះថា ផ្លូវជាតិលេខ៤៨ (ផ្លូវបំបែកស្រែអំបិល-ទីរួមខេត្តកោះកុង) នឹងត្រូវពង្រីកទៅជាផ្លូវហាយវេ ដោយប្រើថវិការបស់សាធារណរដ្ឋកូរ៉េ។ ការថ្លែងនេះ ធ្វើឡើងក្នុងពិធីសំណេះសំណាលជាមួយកម្មករ-កម្មការិនីជាង ១ម៉ឺន៣ពាន់នាក់ នៅតំបន់សេដ្ឋកិច្ចពិសេសខេត្តកោះកុង ស្ថិតក្នុងភូមិនាងកុក ឃុំប៉ាក់ខ្លង ស្រុកមណ្ឌលសីមា ខេត្តកោះកុង។
ជាមួយគ្នានេះ សម្តេច ហ៊ុន សែន ក៏បានបង្ហាញមហិច្ឆតាក្នុងការសាងសង់ផ្លូវភ្ជាប់ពីខេត្តកោះកុង ទៅថ្មដា ខេត្តពោធិ៍សាត់ បាត់ដំបង និងប៉ៃលិនផងដែរ ដើម្បីជួយសម្រួល និងចំណេញពេលវេលា ដល់ការធ្វើដំណើររបស់ប្រជាពលរដ្ឋ។
រាជរដ្ឋាភិបាលកម្ពុជា នឹងចំណាយថវិកាប្រមាណ ៧៥លានដុល្លារ សម្រាប់លើកកម្ពស់ផ្លូវជាតិលេខ៤៨ ទៅជាប្រភេទបេតុងកៅស៊ូ (AC) ក្នុងពេលឆាប់ៗនេះ។ ក្នុងនោះ ៦៧លានដុល្លារជាកម្ចីរបស់សាធារណរដ្ឋកូរ៉េ និង៨លានដុល្លារ ជាថវិកាបដិភាគរបស់រាជរដ្ឋាភិបាលកម្ពុជា។ ក្រសួងសាធារណការ ឱ្យដឹងថា គោលបំណងនៃការលើកកម្ពស់គុណភាពផ្លូវនេះ គឺដើម្បីរក្សាបានភាពយូរអង្វែង អាចទ្រទម្ងន់បានប្រសើរជាងមុន និងចូលរួមចំណែកក្នុងការសម្រួលដល់ការធ្វើ ដំណើររបស់ប្រជាពលរដ្ឋ ព្រមទាំងការដឹកជញ្ជូន ឱ្យកាន់តែប្រសើរមួយកម្រិតទៀត៕