នគរបាលកម្ពុជា ដាក់ផែនការការពារសុវត្ថិភាពប្រធានាធិបតីកូរ៉េខាងត្បូង
- 2019-03-13 03:51:05
- ចំនួនមតិ 0 | ចំនួនចែករំលែក 0
នគរបាលកម្ពុជា ដាក់ផែនការការពារសុវត្ថិភាពប្រធានាធិបតីកូរ៉េខាងត្បូង
ចន្លោះមិនឃើញ
កាលពីថ្ងៃទី១២ ខែមីនា ឆ្នាំ២០១៩នេះ នៅនាយកដ្ឋានអង្គរក្ស លោកនាយឧត្តមសេនីយ៍ ទូច ណារ៉ុថ អគ្គស្នងការរងនគរបាលជាតិ និងជាប្រធាននាយកដ្ឋានអង្គរក្ស បានដឹកនាំកិច្ចប្រជុំផែនការការពារសុវត្ថិភាព សន្តិសុខ សណ្តាប់ធ្នាប់ ជូនគណៈប្រតិភូជាន់ខ្ពស់សាធារណរដ្ឋកូរ៉េ ដឹកនាំដោយលោក មូន ចេអ៊ីន ប្រធានាធិបតី នៃសាធារណរដ្ឋកូរ៉េ និងលោកស្រី។ នេះបើយោងតាមការចុះផ្សាយរបស់វេបសាយអគ្គស្នងការដ្ឋាននគរបាលជាតិ។
លោកនាយឧត្តមសេនីយ៍ ទូច ណារ៉ុថ អគ្គស្នងការរង និងជាប្រធាននាយកដ្ឋានអង្គរក្ស ក្នុងនាម លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានមានប្រសាសន៍សង្កត់ធ្ងន់ណែនាំឲ្យកងកម្លាំងទាំងអស់ យកចិត្តទុកដាក់ឲ្យបានម៉ឺងម៉ាត់បំផុត ក្នុងការការពារសុវត្ថិភាព សន្តិសុខ សណ្តាប់ធ្នាប់ ជូនលោក មូន ចេអ៊ីន និងលោកស្រី ព្រមទាំងប្រតិភូអមដំណើរផងដែរ។
លោកអគ្គស្នងការរងនគរបាលជាតិ ក៏បានដាស់តឿន ក្នុងការសម្រួលចរាចរណ៍តាមដងផ្លូវដែលប្រតិភូឆ្លងកាត់, យកចិត្តទុកដាក់គ្រប់គ្រងកាមេរ៉ាដ្រូន, យកចិត្តទុកដាក់ខ្ពស់តាមគោលដៅសំខាន់ៗ និងតាមចំណុចខ្ពស់, ដាក់ពង្រាយកម្លាំងអន្តរាគមន៍ទាំងអស់នៅទីតាំងជាក់ស្តែង ដើម្បីងាយស្រួលឆ្លើយតបទាន់សភាពការណ៍ដែលកើតឡើងភ្លាម និងដើម្បីឲ្យមានប្រសិទ្ធភាព។
លោកនាយឧត្តមសេនីយ៍ ទូច ណារ៉ុថ បានមានប្រសាសន៍ជំរុញដល់កម្លាំងទទួលផែនទាំងអស់ ត្រូវបែងចែកការទទួលខុសត្រូវឲ្យបានច្បាស់លាស់ ជាពិសេសប្រមូលផ្តុំព័ត៌មានពាក់ព័ន្ធនឹងសន្តិសុខ សណ្តាប់ធ្នាប់ ដើម្បីចាត់វិធានការបង្ការ បង្រ្កាបបទល្មើសគ្រប់ប្រភេទបានទាន់ពេលវេលា។
លោក មូន ចេអ៊ីន និងលោកស្រី នឹងអញ្ជើញបំពេញទស្សនកិច្ចផ្លូវការ នៅព្រះរាជាណាចក្រកម្ពុជា រយៈពេល ៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមីនា ឆ្នាំ២០១៩៕