ហេតុអ្វីប្រធានាធិបតីកូរ៉េខាងត្បូង មកធ្វើទស្សនកិច្ចនៅកម្ពុជា និងប្រទេស២ទៀតនៅអាស៊ាន?

2019-03-13 06:24:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីកូរ៉េខាងត្បូង លោក ម៉ូន ចេអ៊ីន បាននឹងកំពុងធ្វើទស្សនកិច្ចនៅតំបន់អាស៊ាន ក្នុងនោះរួមមាន៖ ប្រទេសប្រ៊ុយណេ ម៉ាឡេស៊ី និងចុងក្រោយគឺកម្ពុជា។ នេះគឺជាទស្សនកិច្ចនៅក្រៅប្រទេសជាលើកដំបូងរបស់លោក នៅក្នុងឆ្នាំ២០១៩នេះ។

យោងតាមការចុះផ្សាយរបស់សារព័ត៌មាន Global Times បានលើកឡើងនូវហេតុផលមួយចំនួនដែលលោក ម៉ូន ចេអ៊ីន ធ្វើទស្សនកិច្ចនៅតំបន់អាស៊ាននាពេលនេះ។

រូបថត៖ Reuters

ទី១. រដ្ឋបាលម៉ូន ចេអ៊ីន កំពុងជំរុញគោលនយោបាយដ៏ធំ២របស់លោក គឺគោលនយោបាយឆ្ពោះមកទិសខាងត្បូង (NSP) ពោលគឺជាតំបន់អាស៊ាននេះតែម្តង និងគោលនយោបាយឆ្ពោះទៅទិសខាងជើង ដែលជាតំបន់ភាគឦសានប្រទេសចិន និងប្រទេសរុស្ស៊ី។ ក្នុងនាមជាប្រទេសដែលពឹងផ្អែកទៅលើការនាំចេញ ប្រទេសកូរ៉េខាងត្បូងចាំបាច់ត្រូវពង្រីកកិច្ចសហប្រតិបត្តិការពាណិជ្ជកម្មចម្រុះ។

ទី២. ជំនួបកំពូល ដូណាល់ ត្រាំ-គីម ជុងអ៊ុន ទាំង២លើក សុទ្ធតែបានធ្វើឡើងនៅអាស៊ានគឺនៅសិង្ហបុរី និងវៀតណាម ហើយមានប្រទេសអាស៊ានមួយចំនួន នៅតែរក្សាទំនាក់ទំនងមិត្តភាពជាប្រពៃណីជាមួយកូរ៉េខាងជើង។ ក្រុងសេអ៊ូល ចង់ទទួលបានការគាំទ្រពីប្រទេសសមាជិកអាស៊ាន ដើម្បីនាំយកសន្តិភាពនៅឧបទ្វីបកូរ៉េ។

ទី៣. កូរ៉េខាងត្បូង ចង់ប្រជែងឥទ្ធិពលជាមួយចិន និងជប៉ុន ខណៈដែលចិន កំពុងប្រើយុទ្ធសាស្រ្ត គម្រោងផ្លូវ១ ខ្សែក្រវាត់១ ឯជប៉ុន បានព្យាយាមពង្រីកឥទ្ធិពលចូលមកតំបន់នេះ តាំងពីយូរមកហើយ។

លោក ម៉ូន ចេអ៊ីន ចាប់ដៃជាមួយស្តេចប្រ៊ុយណេ (រូបថត៖ Yonhap News)

សារព័ត៌មានដដែលនេះ បន្ថែមថា តំបន់អាស៊ាន គឺជាតំបន់យុទ្ធសាស្រ្ត និងភូមិសាស្រ្តនយោបាយដ៏សំខាន់សម្រាប់កូរ៉េខាងត្បូង។ តំបន់នេះ ជាមជ្ឈមណ្ឌលនៃពាណិជ្ជកម្ម ការវិនិយោគ និងជាតំបន់ឆ្លងកាត់។

ទំហំពាណិជ្ជកម្មរវាង កូរ៉េខាងត្បូង និងអាស៊ាន ក្នុងរយៈពេល ៩ខែដំបូងនៃឆ្នាំ២០១៨ មានចំនួន ១២០ពាន់លានដុល្លារ កើនឡើង ៦% បើប្រៀបធៀបនឹងឆ្នាំ២០១៧។ ក្រុងសេអ៊ូល ចង់បង្កើនទំហំពាណិជ្ជកម្មនេះ ឱ្យបានដល់ ២០០ពាន់លានដុល្លារ នៅត្រឹមឆ្នាំ២០២០៕

អត្ថបទទាក់ទង៖

ប្រភព៖ Global Times ប្រែសម្រួល៖ សំភី