ទូតក្រិច៖ កម្ពុជា-ក្រិច នៅឆ្ងាយពីគ្នាមែនពិត តែមានចំណុចរួមគ្នាច្រើន

2019-03-13 06:44:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក នីកូឡូស កៃមែនណាគីស ( Nicolaos Kaimenakis) ឯកអគ្គរដ្ឋទូតប្រទេសក្រិចប្រចាំកម្ពុជា បានលើកឡើងថា ទោះបីកម្ពុជា និងក្រិច មានភូមិសាស្ត្រឆ្ងាយពីគ្នាក្តី ប៉ុន្តែចម្ងាយឆ្ងាយនៃភូមិសាស្ត្រនេះ មិនមែនជាឧបសគ្គនៃកិច្ចសហប្រតិបត្តិការនោះទេ គឺប្រទេសទាំងពីរ មានចំណុចរួមគ្នាច្រើនដូចជា វប្បធម៌ និងប្រពៃណី គឺជាសមាសភាពសំខាន់ៗ ដែលជាមូលដ្ឋានសម្រាប់ជំរុញ និងលើកកម្ពស់កិច្ចសហប្រតិបត្តិការ និងទំនាក់ទំនងប្រទេសទាំងពីរ។ លោកថ្លែងដូច្នេះ ក្នុងជំនួបជាមួយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នាព្រឹកថ្ងៃទី១៣ ខែមីនា ឆ្នាំ២០១៩ នៅទីស្តីការក្រសួង។

លោក កេត សោផាន់ អ្នកនាំពាក្យក្រសួងការបរទេស បានថ្លែងប្រាប់អ្នកកាសែតបន្ទាប់ពីជំនួបចប់ថា លោកឧបនាយករដ្ឋមន្ត្រី ប្រាក់ សុខុន សង្ឃឹមថា ដោយផ្អែកលើបទពិសោធន៍ ក៏ដូចជាភាពរួមគ្នាប្រពៃណី វប្បធម៌ នៃប្រទេសទាំងពីរ ឯកអគ្គរដ្ឋទូតក្រិច និងខិតខំជំរុញទំនាក់ទំនង និងកិច្ចសហប្រតិបត្តិការរវាងប្រទេសទាំងពីរឲ្យកាន់តែរីកចម្រើន។

ជាការឆ្លើយតបឯកអគ្គរដ្ឋទូតក្រិច ក៏បានបញ្ជាក់ពីការខិតខំប្រឹងប្រែងឲ្យអស់ពីកម្លាំងកាយចិត្ត ដើម្បីលើកកម្ពស់ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ។

អ្នកនាំពាក្យក្រសួងការបរទេសបានបន្តថា នៅក្នុងជំនួបពិភាក្សានេះ លោក ប្រាក់ សុខុន បានស្នើឡើងនូវចំណុចមួយចំនួន ជូនឯកអគ្គរដ្ឋទូតក្រិចសម្រាប់ទិសដៅ នៃកិច្ចសហប្រតិបត្តិការរវាងប្រទេសទាំងពីរ គឺ៖

ទី១. ស្នើសុំឲ្យមានការបង្កើតនូវយន្តការពិគ្រោះយោបល់នយោបាយរវាងក្រសួងការបរទេសទាំងពីរ

និងទី២. ស្នើបង្កើតកុងស៊ុលកិត្តិយសនៅក្នុងប្រទេសក្រិច ក៏ដូចជានៅកម្ពុជាបន្ថែមទៀត ដើម្បីធ្វើយ៉ាងណាជំរុញនូវទំនាក់ទំនងសេដ្ឋកិច្ច ក៏ដូចជាចំណងទាក់ទងផ្នែកវប្បធម៌ ក៏ដូចជា ប្រជាជន និងប្រជាជន។

បន្ថែមពីនេះ ភាគីកម្ពុជា ក៏បានស្នើជំរុញវិស័យទេសចរណ៍ ដោយហេតុថា ប្រទេសទាំងពីរមានវប្បធម៌ អរិយធម៌ធំៗក្នុងលោក និងជាគោលដៅទេសចរណ៍សម្រាប់ពិភពលោក។ ប៉ុន្តែដោយកន្លងមកនេះ ឃើញថាមានការផ្លាស់ប្តូរជាពិសេសទេសចរណ៍ក្រិច និងកម្ពុជា នៅតិចតួចនៅឡើយ។

ឯកអគ្គរដ្ឋទូតក្រិច បានឯកភាពទាំងស្រុងនូវការបង្កើតកិច្ចសន្ទនានយោបាយថ្នាក់ក្រសួងការបរទេស ដោយភាគីទាំងពីរបានឯកភាពគ្នាឈានទៅដល់ការរៀបចំការចុះ MOU ដើម្បីបង្កើតនូវយន្តការនៃកិច្ចសន្ទនានយោបាយរវាងក្រសួងការបរទេសទាំងពីរ។

ពាក់ព័ន្ធនឹងកុងស៊ុលកិត្តិយស លោក នីកូឡូស កៃមែនណាគីស ក៏បានឯកភាពដែរ ដោយសារតែវាមានសារៈសំខាន់ និងជាគំនិតមួយដ៏ល្អ។ ហើយដោយហេតុថា មានតំណាងនៅទីនោះ វាជាចំណុចមួយដែលអាចយល់បញ្ជាក់បន្ថែមអំពីស្ថានការណ៍ ក៏ដូចជាវឌ្ឍនភាពផ្សេង ដែលកំពុងតែកើតឡើងនៅក្នុងប្រទេសនីមួយៗ៕

រូបថត៖ ក្រសួងការបរទេស

អត្ថបទ៖ សោភា