ស្វែងយល់ពីខេត្តកំពង់ឆ្នាំង ខណៈបុណ្យទន្លេជិតមកដល់

2019-03-13 08:32:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កំពង់ឆ្នាំង ជាខេត្តមួយដែលស្ថិតនៅភាគកណ្តាល នៃប្រទេសកម្ពុជា និងមានចម្ងាយ៩១គីឡូម៉ែត្រពីរាជធានីភ្នំពេញ។ ខេត្តនេះមានខេត្តចំនួនបួននៅព័ទ្ធជុំវិញ។ខាងកើតជាប់ខេត្តកំពង់ចាម, ខាងជើងជាប់ខេត្តកំពង់ធំ ,ខាងលិចជាប់ខេត្តពោធិ៍សាត់ ហើយខាងត្បូងមានព្រំប្រទល់ជាប់ខេត្តកំពង់ស្ពឺ និងមានកេរ្តិ៍ឈ្មោះល្បីល្បាញតាមរយៈសិប្បកម្មស្មូន ក្អម ថូ និងឆ្នាំងដី ដោយដៃយ៉ាងល្អវិចិត្រ។

ខេត្តដែលជាប់ជាមួយសាវតារឿងព្រេងភ្នំនាងកង្រីនេះ មានផ្ទៃដី៥៥២.១០០ហិកតា និងមានក្រុងចំនួនមួយ ស្រុកចំនួនប្រាំពីរឃុំចំនួន៦៩និង៥៦៥ភូមិ។ខេត្តកំពង់ឆ្នាំងក្រៅពីមានភាពល្បីល្បាញផ្សារភ្ជាប់ប្រវត្តិសាស្ត្រនៃបន្ទាយលង្វែក ស្ថិតនៅក្នុងស្រុកកំពង់ត្រឡាច ដែលជាអតីតរាជធានីរបស់ខ្មែរកាលពីសតវត្សរ៍ទី១៥នោះ ខេត្តមួយនេះក៏មានតំបន់ទេសចរណ៍កម្សាន្តជាច្រើនកន្លែង ដែលក្នុងនោះរួមមានតំបន់ប្រាសាទបុរាណចំនួន១១ តំបន់ភ្នំចំនួន១១ ទីប្រជុំជនផ្សារចំនួន១៥ និងវត្តអារាមចំនួន២៩។ តំបន់ដែលទាក់ទាញភ្ញៀវទេសចរច្រើនជាងគេ គឺតំបន់ភូមិបណ្ដែតទឹកចំនួន២ ស្ថិតនៅលើផ្ទៃទន្លេសាបដ៏ធំល្វឹងល្វើយ ដែលបច្ចុប្បន្នគ្រប់គ្រងដោយ លោកឈួរ ចាន់ឌឿន ជាអភិបាលនៃគណៈអភិបាលខេត្តនាពេលបច្ចុប្បន្ននេះ។

ជាមួយនឹងភាពល្បីល្បាញ ខេត្តកំពង់ឆ្នាំងក៏មានបទចម្រៀងជាច្រើនបទ ដែលត្រូវបានអ្នកនិពន្ធតាក់តែងឡើង ដើម្បីបង្អួតពីសម្រស់ដ៏ត្រកាលនៃតំបន់នានា ដែលក្នុងនោះរួមមានដូចជាបទ កំពង់ឆ្នាំងដែលខ្ញុំស្រមៃ, កំពង់ឆ្នាំងជាស្រុកកំណើត, ចំប៉ាផ្សារលើ, រំដួលលង្វែក ,ផ្នូរនាងកង្រី, ពង្រស្វាយជ្រុំ, បុប្ផាកំពង់ហាវ ភ្នំក្រាំងដីមាស។ល។

ភ្នំក្រាំងដីមាស

ចំពោះស្ថានភាពសេដ្ឋកិច្ចនៅក្នុងខេត្តទាំងមូលវិញ ភាគច្រើន ប្រជាជនប្រមាណជាង៨៥ភាគរយប្រកបមុខរបរជា កសិករបង្កបង្កើនផលលើវិស័យកសិកម្ម។ ប្រមាណជាងប្រាំពីរភាគរយ ជាពាណិជ្ជករ ។ជាងប្រាំមួយភាគរយ ជាអ្នកនេសាទ និងមួយភាគរយ ជាមន្ត្រីរាជការ។

ដោយឡែកសម្រាប់ឆ្នាំ២០១៩នេះ ភាពទាក់ទាញរបស់ខេត្តកំពង់ឆ្នាំងត្រូវបានក្រសួងទេសចរណ៍សម្រេច ជ្រើសយកធ្វើជាទីតាំងប្រារព្ធបុណ្យទន្លេលើកទី៥ ដែលមានរយៈពេលបីថ្ងៃ ចាប់ពីថ្ងៃទី១៥-១៦-១៧ ក្រោមប្រធានបទ «ទន្លេផ្សារភ្ជាប់សន្តិភាព ប្រជាជន និងទេសចរណ៍» ដោយមានការចូលរួមពីសំណាក់សម្ដេច អគ្គមហាសេនាបតី តេជោ ហ៊ុន សែន និងសម្ដេច កិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន រួមជាមួយនឹងបណ្តាថ្នាក់ដឹកនាំជាន់ខ្ពស់ជាច្រើនរូបទៀត។

ការបង្កើតឱ្យមានពិធីបុណ្យទន្លេនេះ ធ្វើឡើងក្នុងគោលបំណងផ្សព្វផ្សាយ និងលើកកម្ពស់នៃការយល់ដឹងសាធារណៈ អំពីភាពស្អាត និងបៃតង ការថែរក្សាបរិស្ថានទន្លេ បរិស្ថានទីក្រុង សណ្តាប់ធ្នាប់ល្អ លើកកម្ពស់គុណភាពផលិតផល និងសេវាទេសចរណ៍ឱ្យបានល្អដើម្បីធ្វើយ៉ាងណាអូសទាញភ្ញៀវទេសចរជាតិ-អន្តរជាតិឱ្យមកកម្សាន្តនៅក្នុងខេត្តកំពង់ឆ្នាំងកាន់តែច្រើន។

លោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំង ក៏បានបញ្ជាក់ពីការយកចិត្តទុកដាក់ខ្ពស់ទៅលើការរៀបចំមហាព្រឹត្តិការណ៍បុណ្យទន្លេប្រចាំឆ្នាំ២០១៩ នេះ ដែលធ្វើយ៉ាងណាឱ្យពិធីមួយនេះមានដំណើរការប្រកបដោយភាពរលូន និងមានភាពទាក់ទាញបំផុត។

ដោយឡែក លោក ឈួរ ចាន់ឌឿន អភិបាលខេត្តកំពង់ឆ្នាំង ក៏បានបង្ហាញពីមោទនភាពរបស់ខេត្តកំពង់ឆ្នាំង ដែលបានក្លាយជាម្ចាស់ផ្ទះក្នុងការរៀបចំបុណ្យទន្លេប្រចាំឆ្នាំ២០១៩លើកទី៥ផងដែរ។

ជាការត្រៀមខ្លួនស្វាគមន៍ពិធីដ៏ធំប្រចាំឆ្នាំ និងជាលើកដំបូងរបស់ខ្លួនគណៈគ្រប់គ្រងខេត្ត និងគណៈអភិបាលខេត្ត បានរួមសហការជាមួយមន្ទីរទេសចរណ៍រៀបចំសណ្ដាប់ធ្នាប់ តុបតែងលម្អក្រុងទាំងមូលដែលជាទីកន្លែងប្រារព្ធពិធី រួមមានការលម្អសួនច្បារតាមដងវិថីនានាការរៀបចំលម្អដោយពន្លឺភ្លើងពណ៌នាពេលរាត្រីជាពិសេសការតុបតែងរៀបចំជាខ្លោងទ្វារនៅច្រកចូលក្រុងក្នុងរូបភាពជាឆ្នាំងដីយ៉ាងស្រស់ស្អាតនិងគួរជាទីទាក់ទាញក្រោមការប្រឹក្សាផ្តល់យោបល់ពីសំណាក់ក្រុមហ៊ុន អ្នកជំនាញផ្នែករៀបចំមហាព្រឹត្តិការណ៍នានា ព័ត៌មាន សកម្មភាព(Media Action) ។ បន្ថែមពីនេះ ក៏មានការបែងចែកទីតាំងផ្សេងៗទៀតជាច្រើន ដូចជា ទីតាំងសម្រាប់ការដាក់តាំងបង្ហាញផលិតផល និងទំនិញផ្សេងៗ ដែលបង្ហាញពីសក្ដានុពលក្នុងស្រុក(ភូមិមួយផលិតផលមួយ)ដែលជាប្រភេទកសិផលក៏ដូចជាផលិតផលសិប្បកម្មដែលធ្វើឡើងដោយដៃជាដើម ហើយក៏មានទីតាំងសម្រាប់ការប្រគំតន្ត្រី រាំរបាំ ការបង្ហាញម៉ូតបែបបុរាណ-ទាន់សម័យ និងទីតាំងសម្រាប់លេងល្បែងប្រជាប្រិយខ្មែរដែលគ្រប់បណ្តាភ្ញៀវទេសចរជាតិ-អន្តរជាតិសុទ្ធតែអាចចូលរួមកម្សាន្ដបានទាំងអស់។

រដ្ឋមន្ត្រីក្រសួងទេសចរណ៍ លោកថោង ខុនបានមានប្រសាសន៍ថា ពិធីបុណ្យទន្លេនៅខេត្តកំពង់ឆ្នាំងដែលនឹងចាប់ ផ្តើមពីថ្ងៃទី១៥ដល់១៧មីនាខាងមុខនេះ រំពឹងថានឹងមានមនុស្សចូលរួមប្រមាណ៥០ម៉ឺននាក់ នឹងមកលេងបុណ្យនេះ។

ផេកផ្លូវការរបស់ក្រសួងទេសចរណ៍បានសរសេរថាគណៈកម្មការអន្តរក្រសួងដើម្បីរៀបចំពិធីបុណ្យបានរៀបចំកិច្ចការងាររបស់ខ្លួនរួចជាស្រេចហើយ ក្នុងការស្វាគមន៍វត្តមានប្រជាពលរដ្ឋ និងភ្ញៀវទេសចរមកពីគ្រប់ទិសទី។ ពិធីបុណ្យទន្លេលើកទី៥នេះ ធ្វើឡើងក្រោមប្រធានបទ «ទន្លេៈ ផ្សារភ្ជាប់សន្តិភាព ប្រជាជន និងទេសចរណ៍»។ពេលនេះ ការតុបតែងលម្អនៅតាមដងផ្លូវនៃក្រុងកំពង់ឆ្នាំង ពិតជាមានភាពស្រស់ស្អាតគួរឱ្យទាក់ទាញមែនទែន រីឯប្រជាពលរដ្ឋ និងភ្ញៀវទេសចរ ក៏បានមកទស្សនាកម្សាន្តបណ្ដើរៗផងដែរ។

ការងារត្រៀមរៀបចំបុណ្យទន្លេនេះបានឆ្លងកាត់ការប្រជុំត្រួតពិនិត្យជាច្រើនលើកដើម្បីរៀបចំព្រឹត្តិការណ៍ទេសចរណ៍ដ៏ធំប្រចាំឆ្នាំនេះ ឱ្យប្រព្រឹត្តទៅដោយភាពរលូន ប្រកបដោយភាពអធិកអធ័ម។ តួយ៉ាងនាថ្ងៃទី១១ ខែមីនា លោក ថោង ខុន រដ្ឋមន្ត្រីក្រសួងទេសចរណ៍ រួមជាមួយលោក ឈួរ ច័ន្ទឌឿន អភិបាលខេត្តកំពង់ឆ្នាំង និងលោកស្រី ដោក សទ្ធាប្រធាន ក្រុមប្រឹក្សាខេត្តកំពង់ឆ្នាំងបានដឹកនាំមន្ត្រីរាជការក្រោមឱវាទបើកកិច្ចប្រជុំត្រួតពិនិត្យការងារត្រៀមរៀបចំចុងក្រោយ។

ក្នុងកិច្ចប្រជុំខាងលើនេះលោករដ្ឋមន្ត្រី ថោង ខុន បានសង្កត់ធ្ងន់អំពីការពង្រឹងសុវត្ថិភាពទូទៅ សុវត្ថិភាពចរាចរណ៍ សន្តិសុខសណ្ដាប់ធ្នាប់ក្នុងពិធីនិងទូទាំងក្រុងកំពង់ឆ្នាំងពិសេសគឺត្រូវសម្រួលចរាចរណ៍និងថែរក្សាសុវត្ថិភាពជូនប្រជាពលរដ្ឋ ថ្នាក់ដឹកនាំ និងគណៈអធិបតីឱ្យបានល្អប្រសើរ។បានណែនាំឱ្យក្រុមការងារបន្ថែមការតុបតែងភ្លើងលម្អ នៅកន្លែងមួយចំនួនទៀតពិសេសភ្លើងលម្អនៅតាមដើមឈើទីសាធារណៈជាដើមខណៈការតុបតែងលម្អនៅកន្លែងនានា ក្រុមការងារក៏បានខិតខំធ្វើយ៉ាងល្អប្រសើរមកហើយដែរ។ពិសេសលើសពីនេះលោករដ្ឋមន្ត្រីថោងខុនក៏បានស្នើដល់អគ្គិសនីកម្ពុជា សូមកុំឱ្យមានការដាច់ភ្លើងអគ្គិសនីក្នុងពេលពិធីបុណ្យទន្លេ រយៈពេលបីថ្ងៃនោះឱ្យសោះ។

ចំពោះកម្មវិធីសម្ដែងសិល្បៈការរៀបចំព្រឹត្តិការណ៍កីឡាជាដើមនោះគឺមានការត្រៀមរួចរាល់អស់ខណៈដែលក្រុមការងារនៅតែហាត់សមរៀល់ថ្ងៃដើម្បីញ៉ាំងបរិយាកាសក្នុងពិធីបុណ្យទន្លេខាងមុខនោះឱ្យកាន់តែអធិកអធម។ការរៀបចំព្រឹត្តិការណ៍សិល្បៈនេះទៀតសោតក៏មានការសម្ដែងសិល្បៈពីក្រុមសិល្បកររបស់ប្រទេសឥណ្ឌូនេស៊ីផងដែរដើម្បីអបអរសាទរខួបអនុស្សាវរីយ៍លើកទី៦០ នៃទំនាក់ទំនងការទូតរវាងកម្ពុជា-ឥណ្ឌូណេស៊ី។

លោករដ្ឋមន្ត្រីបានណែនាំដល់ភោជនីយដ្ឋានអាហារដ្ឋានទាំងអស់ក្នុងក្រុងកំពង់ឆ្នាំងត្រូវស្លៀកពាកកឯកសណ្ឋានឱ្យបានស្អាតបាតត្រឹមត្រូវដើម្បីត្រៀមទទួលភ្ញៀវទេសចរដែលមកទស្សនាកម្សាន្តក្នុងពិធីបុណ្យទន្លេព្រមទាំងសូមចូលរួមក្នុងយុទ្ធនាការ«គ្មានសំរាមក្រោមតុនៅតាមភោជនីយដ្ឋាន-អាហារដ្ឋាន»ឱ្យបានសស្រោកសស្រាំង។ លោករដ្ឋមន្ត្រីនៅតែជំរុញឱ្យយុវជន ក៏ដូចជាអ្នកមានគូស្រករ គប្បីចូលរួមដាំដើមឈើក្នុងពិធីបុណ្យទន្លេ ទុកជាអនុស្សាវរីយ៍ឱ្យបានកុះករ ដើម្បីចូលរួមដល់ការការពារបរិស្ថាន៕

ប្រភព៖ រស្មីកម្ពុជា ប្រែសម្រួល៖ សំភី