វៀតណាម កាត់បន្ថយចំនួន ស្រុក-ខណ្ឌ ឃុំ-សង្កាត់
- 2019-03-14 03:32:14
- ចំនួនមតិ 0 | ចំនួនចែករំលែក 0
វៀតណាម កាត់បន្ថយចំនួន ស្រុក-ខណ្ឌ ឃុំ-សង្កាត់
ចន្លោះមិនឃើញ
គណៈកម្មាធិការអចិន្ត្រៃយ៍រដ្ឋសភាវៀតណាម បានឯកភាពលើសេចក្ដីសម្រេចមួយ កាលពីថ្ងៃពុធ ទី១៣ ខែមីនា ឆ្នាំ២០១៩ ដើម្បីបង្កើតមូលដ្ឋានច្បាប់ សម្រាប់កាត់បន្ថយអង្គភាពរដ្ឋបាលកម្រិតស្រុក-ខណ្ឌ ឃុំ-សង្កាត់។
គណៈកម្មាធិការកណ្ដាលទី១២ នៃគណៈបក្សកុម្មុយនិស្ត វៀតណាម បានចេញសេចក្ដីសម្រេចលេខ 18-NQ/TW ចុះថ្ងៃទី២៥តុលា ឆ្នាំ២០១៧ ព្រមទាំងការិយាល័យនយោបាយ បានចេញសេចក្ដីសម្រេចលេខ 37-NQ/TW ចុះថ្ងៃទី២៤ ធ្នូ ឆ្នាំ២០១៨ ហើយគណៈកម្មាធិការអចិន្ត្រៃយ៍រដ្ឋសភាវៀតណាម បានយល់ស្របលើសេចក្ដីសម្រេចមួយ ដើម្បីរៀបចំឡើងវិញនូវអង្គភាពរដ្ឋបាលកម្រិតស្រុក-ខណ្ឌ ឃុំ-សង្កាត់ សម្រាប់ឆ្នាំ២០១៩-២០២១ ដើម្បីកាត់បន្ថយចំនួនអង្គភាពរដ្ឋបាលកម្រិតស្រុក-ខណ្ឌ ឃុំ-សង្កាត់។
សេចក្ដីសម្រេចរបស់ គណៈកម្មាធិការអចិន្ត្រៃយ៍រដ្ឋសភាវៀតណាម មាន ៣ជំពូក ១៨មាត្រា ដោយបញ្ជាក់យ៉ាងច្បាស់ពីការរៀបចំឡើងវិញនូវគោលការណ៍ រចនាសម្ព័ន្ធ និងចំនួនមន្ត្រី។
អនុប្រធានរដ្ឋសភាវៀតណាម លោក Uong Chu Luu បញ្ជាក់ថា ស្រុក-ខណ្ឌ ឃុំ-សង្កាត់ ដែលមិនអាចឆ្លើយតបនឹងលក្ខណៈវិនិច្ឆ័យដែលត្រូវបានសម្រេច នឹងត្រូវរៀបចំឡើងវិញ ក្នុងឆ្នាំ២០១៩។ ចំណែកនៅសេសសល់ នឹងរៀបចំនៅ ២ឆ្នាំបន្ទាប់។
យោងតាមក្រសួងកិច្ចការផ្ទៃក្នុងវៀតណាម ការរៀបចំឡើងវិញអង្គភាពរដ្ឋបាល អំឡុងកំណែទម្រង់សេដ្ឋកិច្ចនេះ នឹងបង្កផលវិជ្ជមាន ក្នុងការជំរុញការអភិវឌ្ឍសង្គម-សេដ្ឋកិច្ច ការវិនិយោគហេដ្ឋារចនាសម្ពន្ធក្នុងស្រុក និងធ្វើឲ្យសេវាសាធារណៈកាន់តែខិតជិតប្រជាជនរបស់ខ្លួន៕