សម្តេច ហ៊ុន សែន៖ កម្ពុជា មិនដែលដណ្តើមទីផ្សារកសិកម្មហ្វីលីពីន ឈ្នះថៃ និងវៀតណាមឡើយ

2019-03-14 04:35:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានលើកឡើងថា គ្រាន់តែទីផ្សារកសិកម្មនៅប្រទេសហ្វីលីពីនតែមួយប៉ុណ្ណោះ គឺកម្ពុជា មិនដែលដេញថ្លៃឈ្នះថៃ និងវៀតណាមឡើយ ខណៈហ្វីលីពីន ត្រូវការ១លានតោនក្នុង១ឆ្នាំ។ ការថ្លែងនេះ ធ្វើឡើងក្នុងពិធីបិទសន្និបាតបូកសរុបការងារឆ្នាំ២០១៨ និងលើកទិសដៅការងារឆ្នាំ២០១៩ របស់ក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃទី១៤ ខែមីនា ឆ្នាំ២០១៩។

សម្តេច ហ៊ុន សែន ថ្លែងនាពេលកន្លងមក

សម្តេចបញ្ជាក់ថា មូលហេតុខាងលើនេះ គឺដោយសារតែផលិតផលកសិកម្មរបស់កម្ពុជា មានតម្លៃខ្ពស់ជាងវៀតណាម និងថៃ។ សម្តេចបានជំរុញឱ្យរកវិធីរួមគ្នា ដើម្បីកាត់បន្ថយតម្លៃដើមរបស់កសិករដែលបានផលិត និងដើម្បីឱ្យតម្លៃដែលជ្រៀតចូលទីផ្សារនោះ អាចចូលរួមប្រជែងដេញថ្លៃបាន។

បើទោះបីជាមានការកើនឡើងគ្រឿងយន្តកសិកម្ម មានការកើនឡើងក៏ដោយ ក៏ប៉ុន្តែប្រមុខរាជរដ្ឋាភិបាល បានបង្ហាញក្តីបារម្ភ ការប្រើប្រាស់គ្រឿងយន្តក៏បណ្តាលឱ្យថ្លៃដើមផលិត កើនឡើងផងដែរ ដោយសារតែតម្លៃប្រេងសាំង។

ជាមួយគ្នានេះ សម្តេចនាយករដ្ឋមន្រ្តី បានជំរុញឱ្យក្រសួងកសិកម្ម និងក្រសួងពាណិជ្ជកម្ម ត្រូវធ្វើការរួមគ្នា ដើម្បីសម្រេចការនាំចេញអង្ករទៅកាន់ទីផ្សារប្រទេសចិន ប្រមាណ ៤០ម៉ឺនតោន និងទីផ្សារវៀតណាមប្រមាណ ៣០ម៉ឺនតោន។

តាមរបាយការណ៍ក្រសួងកសិកម្ម បានឱ្យដឹងថា វិស័យកសិកម្មឆ្នាំ ២០១៨-២០១៩ មានការរីកចម្រើនគួរឱ្យកត់សម្គាល់ ផលិតផលស្រូវ សរុបសម្រេចបានក្នុងបរិមាណ ១០,៨៧ លានតោន កើនលើសឆ្នាំមុនប្រមាណ ៣,៣៧% និងស្រូវមានចំនួនជាង ៥,៨ លានតោន ឬគិតជា អង្ករស្មើនឹងជាង ៣,៧លានតោន។ ដំណាំរួមផ្សំ និងដំណាំឧស្សាហកម្មផ្សេងៗទៀតសម្រចបាន ១៦,៧ លានតោន កើនលើសឆ្នាំមុន ប្រមាណ ២% ជាពិសេសផលិតកម្មកៅស៊ូមានកំណើនរហូតដល់ ១៤% ផលិតកម្មសត្វ ៣,៤% និងវារីវប្បកម្មកើនប្រមាណ ២២,៤% ធៀបនឹងឆ្នាំមុន៕

អត្ថបទ៖ សំភី