ឧទ្យានជាតិរាម ជាដីដែលគ្មានជនណាម្នាក់មានសិទ្ធិកាន់កាប់ឡើយ ទោះមានការទទួលស្គាល់ពីអាជ្ញាធរ
- 2019-03-14 08:07:50
- ចំនួនមតិ 0 | ចំនួនចែករំលែក 0
ឧទ្យានជាតិរាម ជាដីដែលគ្មានជនណាម្នាក់មានសិទ្ធិកាន់កាប់ឡើយ ទោះមានការទទួលស្គាល់ពីអាជ្ញាធរ
ចន្លោះមិនឃើញ
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានបញ្ជាក់ថា ឧទ្យានជាតិរាមជាដីសាធារណៈរបស់រដ្ឋ គ្មានជនណាម្នាក់មានសិទ្ធិរុករានទន្ទ្រានកាន់កាប់ដីព្រៃរដ្ឋ និងទិញលក់ដីរដ្ឋឡើយ ទោះបីជាមានការបញ្ជាក់ពីមេឃុំ ឬចៅហ្វាយស្រុកក៏ដោយ។ ការបញ្ជាក់នេះ បន្ទាប់ពីមានចលនានៃការកាន់កាប់ រុករាន ទន្ទ្រានដីរដ្ឋដោយខុសច្បាប់ពីសំណាក់ក្រុមជនខិលខូច នៅតែបន្តកើតមាន ទោះបីជាអាជ្ញាធរគ្រប់ជាន់ថ្នាក់ខិតខំប្រឹងប្រែងក្នុងការទប់ស្កាត់បង្ក្រាបក៏ដោយ។
លោក នេត្រ ភក្ត្រា បន្តថា ក្រុមការងារបានណែនាំអ្នកទាំងនោះ ឱ្យចាកចេញពីតំបន់ហាមឃាត់ និងមិនអនុញ្ញាតឱ្យចូលក្នុងតំបន់ហាមឃាត់នេះទៀតឡើយ ហើយប្រសិនបើបំពាននឹងបំរាមនេះ នោះមន្ត្រីមានសមត្ថកិច្ចនឹងចាត់វិធានការតាមផ្លូវច្បាប់ ក្រោយពីការអប់រំណែនាំមិនស្តាប់។
លោកបន្តថា ក្រោយពីស្តាប់ការអប់រំណែនាំ អ្នកដែលប៉ុនប៉ងកាប់ឆ្ការរុករានកាន់កាប់ដីរដ្ឋដោយខុសច្បាប់នេះ បានចាកចេញពីតំបន់ហាមឃាត់អស់ហើយនៅល្ងាចថ្ងៃទី១៣។
រដ្ឋលេខាធិការ និងជាមន្ត្រីនាំពាក្យក្រសួងបរិស្ថានរូបនេះ បានគូសបញ្ជាក់ពីវិធានការក្តៅមួយចំនួនចំពោះការរុករានទន្ទ្រានកាន់កាប់ដីដោយខុសច្បាប់នៅតំបន់ឧទ្យានជាតិរាម ក៏ដូចជានៅតាមតំបន់ការពារធម្មជាតិនានាថា៖ «ការរុករានទន្ទ្រានកាន់កាប់ដីព្រៃ ក៏ដូចជាទិញលក់ដីធ្លីនៅឧទ្យានជាតិ ឬតំបន់ការពារធម្មជាតិដែលជាតំបន់អភិរក្ស គឺជាទង្វើខុសច្បាប់ទាំងស្រុង។ ក្រសួងបរិស្ថាន បាននឹងកំពុងតែពិនិត្យនីតិវិធីច្បាប់ប្រឆាំងជនល្មើស ដែលទិញលក់ដីខុសច្បាប់ទៅកាន់តុលាការ និងដកហូតយកដីទាំងនោះមកធ្វើជាសម្បត្តិរដ្ឋវិញ»។
លោក នេត្រ ភក្ត្រា បានបញ្ជាក់ទៀតថា ការទន្ទ្រានរុករានកាន់កាប់ដីដោយខុសច្បាប់ របស់បងប្អូនប្រជាពលរដ្ឋខ្លះ ត្រូវបានធ្វើឡើងក្រោមការបំផុសពីឈ្មួញរកស៊ីដីធ្លី ដែលពួកគេបានញុះញង់ឱ្យប្រជាពលរដ្ឋនៅមូលដ្ឋានរំលោភបំពានច្បាប់ និងបំផ្លាញធនធានធម្មជាតិក្រោមច្រើនរូបភាព ដូចជា ការដាំដំណាំចេក ស្វាយ ខ្លុរ អាកាស្យា.. ជាដើម ដើម្បីបន្លំថាជាដី និងដំណាំដែលខ្លួនបានកាន់កាប់ និងអាស្រ័យផលជាកម្មសិទ្ធិ ឬខ្លួនបានគ្រប់គ្រងជាយូរមកហើយ។
«ល្បិចកលនៅក្នុងការបំផ្លាញធនធានធម្មជាតិខ្លះ ដែលជនខិលខូចខ្លះបាន ធ្វើក្នុងការទន្រ្ទានកាន់កាប់ដីព្រៃខុសច្បាប់នោះ គឺដូចជាការបោះព្រំដី ការត្រាយព្រៃតូចៗឱ្យងាប់ រួចដុតសម្អាត សម្រាប់ដាំដំណាំតាមរដូវ ដូចជា ពោត ដំឡូង សណ្តែក បន្លែ ។ល។ ក្នុងរូបភាពអាស្រ័យផល និងឈានទៅដាក់ស្នើសុំការវាស់វែងផ្តល់កម្មសិទ្ធិជូនពួកគាត់ទៅអាជ្ញាធរដែនដី ស្ថាប័នជំនាញពាក់ព័ន្ធ ជាពិសេសស្នើទៅរដ្ឋាភិបាលជាបន្តបន្ទាប់»។ លោករដ្ឋលេខាធិការបន្ថែម៕