កម្ពុជា នឹងមានជម្រើសថ្មី ជើងហោះហើរពីភ្នំពេញទៅបាងកក
- 2019-03-15 02:24:02
- ចំនួនមតិ 0 | ចំនួនចែករំលែក 0
កម្ពុជា នឹងមានជម្រើសថ្មី ជើងហោះហើរពីភ្នំពេញទៅបាងកក
ចន្លោះមិនឃើញ
ក្រុមហ៊ុនអាកាសចរណ៍អេមីរ៉ាត់ (Emirates) នៃប្រទេសអារ៉ាប់រួម គ្រោងនឹងបើកជើងហោះហើរថ្មី ដើម្បីតភ្ជាប់រាជធានីភ្នំពេញ ទៅកាន់រាជធានីបាងកក ប្រទេសថៃ ដោយចាប់ពីដើមខែកក្កដា ឆ្នាំ២០១៩ ខាងមុខ ជាមួយជម្រើសជើងហោះហើរប្រចាំថ្ងៃកាន់តែច្រើន បន្ថែមលើការហោះហើរទៅកាន់គោលដៅជាង ១៥០កន្លែង នៅក្នុងប្រទេសចំនួន ៨៣។
នៅក្នុងជំនួបជាមួយលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នាទីស្តីការក្រសួង កាលពីរសៀលថ្ងៃទី១៤ ខែមីនា ឆ្នាំ២០១៩នេះ លោក អាប់ឌុលឡា អេតណាន់ (Abdulla Adnan) នាយកក្រុមហ៊ុនអេមីរ៉ាត់ ប្រចាំប្រទសកម្ពុជា បានគូសបញ្ជាក់ថា៖ «អេមីរ៉ាត់» ចង់ធ្វើឲ្យទីក្រុងឌុយបៃ ក្លាយជាវេទិកាតភ្ជាប់ប៉ែកខាងកើត ទៅកាន់ខាងលិច ហើយតាមរយៈជើងហោះហើរថ្មីនេះ ក្រុមហ៊ុននឹងប្រើប្រាស់យន្តហោះធុនបូអីង ៧៧៧ និងអ៊ែបើស A៣៨០ ដើម្បីដឹកនាំគណៈប្រតិភូកម្ពុជា ទៅកាន់ពិព័រណ៍ពិភពលោកឌុយបៃឆ្នាំ២០២០ ជាមួយបច្ចេកវិទ្យាទំនើប គ្មានទំនាញផែនដី។
ជាការឆ្លើយតប លោក ប៉ាន សូរស័ក្តិ បានសម្តែងការស្វាគមន៍ ចំពោះការបើកឲ្យមានជើងហោះហើរថ្មី របស់ក្រុមហ៊ុនអេមីរ៉ាត់ ដែលនឹងផ្តល់ភាពងាយស្រួលសម្រាប់ភ្ញៀវទេសចរ និងវិនិយោគិន ទាំងនៅក្នុងប្រទេសកម្ពុជា និងប្រទេសថៃ។ លោករដ្ឋមន្ត្រី បានថ្លែងអំណរគុណដល់រដ្ឋាភិបាលនៃប្រទេសអារ៉ាប់រួម ដែលបានគាំទ្រ និងជួយសម្របសម្រួលការចូលរួមរបស់កម្ពុជា នៅក្នុងព្រឹត្តិការណ៍ពិព័រណ៍ពិភពលោកឌុយបៃឆ្នាំ២០២០ នាពេលខាងមុខ។
លោករដ្ឋមន្ត្រី ប៉ាន សូរស័ក្តិ បានបង្ហាញជំនឿថា តាមរយៈពិព័រណ៍ពិភពលោកឌុយបៃឆ្នាំ២០២០ ប្រទេសទាំងពីរនឹងអាចពង្រឹងកិច្ចសហប្រតិបត្តិការជាមួយគ្នាលើវិស័យសំខាន់ៗដូចជា៖ សេដ្ឋកិច្ច ពាណិជ្ជកម្ម កសិកម្ម បច្ចេកវិទ្យា និងការបណ្ដុះបណ្ដាលធនធានមនុស្ស ហើយក្រសួងពាណិជ្ជកម្ម នឹងរង់ចាំសម្របសម្រួលរាល់គម្រោងវិនិយោគ ស្នើដោយរដ្ឋាភិបាល ឬវិនិយោគិន នៃប្រទេសអារ៉ាប់រួម។
សូមជម្រាបថា ក្រុមហ៊ុនអាកាសចរណ៍អេមីរ៉ាត់ បានធ្វើប្រតិបត្តិការហោះហើរ មកកាន់រាជធានីភ្នំពេញដំបូង នៅក្នុងខែកក្កដា ឆ្នាំ២០១៧ ដែលគិតមកទល់បច្ចុប្បន្ន ក្រុមហ៊ុនអាកាសចរណ៍មួយនេះ បានដឹកអ្នកដំណើរប្រមាណ ១០ម៉ឺននាក់ និងបានឈ្នះពានរង្វាន់ជាប់គ្នាយ៉ាងច្រើន។ ជាក់ស្តែងកាលពីឆ្នាំមុន ក្រុមហ៊ុនអេមីរ៉ាត់ បានទទួលពានរង្វាន់ឆ្នើមចំនួន ៣ នៅក្នុងពិព័រណ៍អន្តរជាតិ APEX Asia និងបានជាប់ឈ្មោះជា ក្រុមហ៊ុនអាកាសចរណ៍ឆ្នើមប្រចាំឆ្នាំ២០១៨ សម្រាប់ពានរង្វាន់ការដឹកជញ្ជូនតាមយន្តហោះ៕