នគរគោកធ្លក មានដើមកំណើតនៅអង្គរធំ

2019-03-15 06:48:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកបុរាណវិទ្យាបានអះអាងថា នគរគោកធ្លកមានដើមកំណើតនៅអង្គរធំ ដោយផ្អែកលើការធ្វើវិភាគវិទ្យាសាស្រ្តទៅលើសំណល់បុរាណវត្ថុសំខាន់ៗ ដែលគេបានប្រទះឃើញ ក្នុងការធ្វើកំណាយអស់រយៈពេលជាង ២០ឆ្នាំកន្លងមកនេះ។ អ្វីដែលជាភស្តុតាងមួយដែលអ្នកស្រាវជ្រាវភ្ញាក់ផ្អើលខ្លាំង ហើយមិនដែលជួបប្រទះនោះ គឺការធ្វើកំណាយថ្មីៗនេះ ដោយបានរកឃើញដើមធ្លកកប់ពីក្រោមនៃប្រាសាទភិមានអាកាសក្នុងតំបន់អង្គរធំ។

ថ្លែងទៅកាន់ AKP កាលពីថ្ងៃទី១៤ ខែមីនា ឆ្នាំ២០១៩ លោក អ៊ឹម សុខរិទ្ធី អ្នកស្រាវជ្រាវនៃអាជ្ញាធរជាតិអប្សរា បានឱ្យដឹងថា កាលពីប៉ុន្មានឆ្នាំមុននៃការរកឃើញដើមធ្លកនេះ លោកសាស្រ្តាចារ្យ អាំង ជូលាន នរវិទូនៃអាជ្ញាធរជាតិអប្សរា និងជាគ្រូបង្រៀននៅមហាវិទ្យាល័យបុរាណវិទ្យា បានសិក្សាស្រាវជ្រាវផ្នែកនរវិទ្យា និងប្រវត្តិសាស្រ្តជាច្រើនឆ្នាំនៅអង្គរ បានប្រទះឃើញភស្តុតាងជាច្រើន ដែលទាក់ទងនឹងរឿងនគរគោកធ្លកនេះ។

បើតាមលោក អ៊ឹម សុខរិទ្ធី បន្ថែមថា លោក Jacques Gaucher (ហ្សាក់ ហ្គូសេ) ប្រធានគម្រោងស្រាវជ្រាវ MoDaThom (ម៉ូដាធំ) ក៏បានបញ្ជាក់ថា តាមរយៈនៃការស្រាវជ្រាវជិត២០ឆ្នាំកន្លងមកនេះ រឹតតែធ្វើឱ្យដឹងកាន់តែច្បាស់ថា ក្នុងអតីតព្រះបរមរាជវាំងនេះ ប្រហែលមានកំណើតរៀបចំតាំងពីសតវត្សរ៍ទី៩ ហើយបន្តប្រើប្រាស់រហូតដល់សតវត្សរ៍ទី១៦។ ហើយលើសពីនេះទៀត តាមរយៈភស្តុតាងរកឃើញក្នុងរណ្តៅកំណាយ គេក៏អាចស្មានបានថា អគារវាំងដំបូងទី សង់ពីឈើប្រក់ក្បឿង និងមានការរៀបចំជាបន្តបន្ទាប់ពីអង្គក្សត្រមួយទៅអង្គក្សត្រមួយទៀត។ ភស្ដុតាងសំខាន់គួរឱ្យចាប់អារម្មណ៍ និងជាទិន្នន័យបញ្ជាក់ពីរឿងព្រេងទាក់ទងនឹងព្រះថោង និងនាងនាគ គឺការរកឃើញដើមធ្លក និងគ្រាប់ធ្លក ដែលបានបញ្ចុះនៅបាតប្រាសាទភិមានអាកាស។

បន្តបន្ទាប់មកទៀត លោក Jacque Gaucher និងលោកសាស្រ្តាចារ្យ អាំង ជូលាន បានប្រាស្រ័យផ្លាស់ប្តូរ និងពិភាក្សាគ្នាអំពីទិន្នន័យដែលបានមកពីការស្រាវជ្រាវនៃវិជ្ជាទាំងពីរដែលទាក់ទងនឹងដើមធ្លកនៅបាតប្រាសាទភិមានអាកាស។ ដូច្នេះភស្តុតាងនៃវិជ្ជាទាំងនរវិទ្យានិងបុរាណវិទ្យា មានទិន្នន័យដូចគ្នា ដែលជាមូលដ្ឋានក្នុងការពិចារណាថា រឿងព្រេងព្រះថោង និងនាងនាគ ឬក៏ថា រឿងនគរគោកធ្លក ដែលជារឿងកំណើតនៃពង្សខ្មែរ មានកំណើតនៅអង្គរធំ។ នេះជាការបញ្ជាក់បន្ថែមរបស់អ្នកស្រាវជ្រាវនៃអាជ្ញាធរជាតិអប្សរា៕

អត្ថបទ និងរូបថត៖ AKP

ប្រភព៖ AKP ប្រែសម្រួល៖ សំភី