ចិន ចង់ទិញដីថៃ១៦០០ហិកតា ដើម្បីបង្កើតសហគមន៍ និងពង្រីកខ្សែសង្វាក់ផ្គត់ផ្គង់ នៅអាស៊ាន
- 2019-03-15 07:03:36
- ចំនួនមតិ 0 | ចំនួនចែករំលែក 0
ចិន ចង់ទិញដីថៃ១៦០០ហិកតា ដើម្បីបង្កើតសហគមន៍ និងពង្រីកខ្សែសង្វាក់ផ្គត់ផ្គង់ នៅអាស៊ាន
ចន្លោះមិនឃើញ
អាជ្ញាធរគ្រប់គ្រងតំបន់ឧស្សាហកម្មនៃប្រទេសថៃ បានឲ្យដឹងថា រដ្ឋាភិបាលចិន គ្រោងចំណាយថវិកាដ៏ច្រើន ដើម្បីទិញដីទំហំ ១៦០០ ហិកតា នៅក្នុងតំបន់ឧស្សាហកម្ម ច្រករបៀងសេដ្ឋកិច្ចភាគខាងកើត (EEC) សំដៅបង្កើតសហគមន៍អ្នកវិនិយោគចិន និងពង្រីកខ្សែសង្វាក់ផ្គត់ផ្គង់របស់ខ្លួន នៅក្នុងតំបន់អាស៊ាន។
ប្រធានអាជ្ញាធរគ្រប់គ្រងតំបន់ឧស្សាហកម្មថៃ លោក Somchint Pilouk បានប្រាប់ថ្មីៗនេះថា រដ្ឋាភិបាលចិន និងវិស័យឯកជន បានចរចាជាមួយអាជ្ញាធរ អស់ជាច្រើនសប្ដាហ៍មកហើយ ពាក់ព័ន្ធនឹងទិញដីនេះ។ លោកបន្តថា រដ្ឋាភិបាលថៃ កំពុងជួបការលំបាក ក្នុងការស្វែងរកដីទំនេរទំហំ ១៦០០ ហិកតា សម្រាប់លក់ឲ្យចិន។
ប្រធានអាជ្ញាធរគ្រប់គ្រងតំបន់ឧស្សាហកម្មថៃ បានបន្ថែមថា ខេត្ត ៣ កំពុងទាក់ទាញការវិនិយោគពីចិន រួមមាន ខេត្ត Rayong, Chon Buri និងខេត្ត Chachoengsao ។ លោករំពឹងថា ក្រុមហ៊ុនជាង ៥០០ នឹងបោះទុនវិនិយោគនៅច្រករបៀងសេដ្ឋកិច្ចភាគខាងកើតនេះ។
សូមជម្រាបថា ច្រករបៀងសេដ្ឋកិច្ចភាគខាងកើត ជាតំបន់សេដ្ឋកិច្ចកំពុងអភិវឌ្ឍ ដែលដើរតួយ៉ាងសំខាន់សម្រាប់សេដ្ឋកិច្ចថៃ និងជាច្រកនាំចេញដ៏សំខាន់។ តំបន់នេះ មានខេត្ត៤ ដូចជា Rayong, Chon Buri, Chachoengsao និង Samut Prakan ។
ប្រធានអាជ្ញាធរគ្រប់គ្រងតំបន់ឧស្សាហកម្មថៃ ឲ្យដឹងទៀតថា រដ្ឋាភិបាលថៃ បានបង្កើតតំបន់ឧស្សាហកម្មចំនួន ១០ នៅទូទាំងប្រទេស ដើម្បីចូលរួមអភិវឌ្ឍន៍សហគមន៍៕