ជប៉ុន-អាមេរិក រួមគ្នាអភិវឌ្ឍប្រព័ន្ធរ៉ាដាថ្មីសម្រាប់នាវាចម្បាំង ត្រៀមទប់ទល់នឹងមីស៊ីលរបស់រុស្ស៊ី និងចិន
- 2019-03-18 03:38:23
- ចំនួនមតិ 0 | ចំនួនចែករំលែក 0
ជប៉ុន-អាមេរិក រួមគ្នាអភិវឌ្ឍប្រព័ន្ធរ៉ាដាថ្មីសម្រាប់នាវាចម្បាំង ត្រៀមទប់ទល់នឹងមីស៊ីលរបស់រុស្ស៊ី និងចិន
ចន្លោះមិនឃើញ
ជប៉ុន និងសហរដ្ឋអាមេរិក កំពុងធ្វើការរួមគ្នាអភិវឌ្ឍប្រព័ន្ធរ៉ាដាថ្មីមួយសម្រាប់នាវាចម្បាំងរបស់អាមេរិក ដែលនេះគឺជាផ្នែកមួយក្នុងការជំរុញសមត្ថភាពយោធាប្រទេសទាំងពីរ។ នេះបើតាមការចុះផ្សាយរបស់សារព័ត៌មានជប៉ុន Kyodo ដោយដកស្រង់ចេញពីមន្រ្តីរដ្ឋាភិបាលកាលពីថ្ងៃទី១៧ ខែមីនា ឆ្នាំ២០១៩។
ប្រភពខាងលើនេះ បានអះអាងថា គោលបំណងនៃការអភិវឌ្ឍប្រព័ន្ធរ៉ាដាថ្មីនេះ គឺដើម្បីទប់ទល់នឹងអាវុធទំនើបថ្មីៗរបស់រុស្ស៊ី និងចិន ជាពិសេសគឺមីស៊ីលលឿនជាងសំឡង។
ប្រព័ន្ធរ៉ាដាថ្មីនេះ នឹងផ្តល់នូវការអាចឈ្លបមើលបានដល់ ៣៦០ដឺក្រេ និងមានរយៈកម្ពស់ខ្ពស់ ពោលគឺមិនចាំបាច់បង្វែរ៉ាដា ដូចប្រព័ន្ធចាស់នោះទេ។ វានឹងក្លាយជំនួយដ៏មានប្រសិទ្ធភាពសម្រាប់ខែលមីស៊ីល Aegis ដែលត្រូវបានបំពាក់នៅលើនាវាចម្បាំង។
បើយោងតាម Kyodo ប្រព័ន្ធរ៉ាដាចាស់ (AN/SPQ-9B) គឺមានតម្លៃ ៤,១លានដុល្លារក្នុងមួយគ្រឿង ចំណែកឯប្រព័ន្ធរ៉ាដាថ្មី នឹងមានតម្លៃថ្លៃជាងនេះ។
ជប៉ុន ដែលកំពុងប្រឈមមុខនឹងការគំរាមកំហែងមីស៊ីល និងនុយក្លេអ៊ែររបស់កូរ៉េខាងជើងដែរនោះ បានមានក្តីសង្ឃឹមក្នុងការពង្រឹងនូវសន្តិសុខរបស់ខ្លួន តាមរយៈការអភិវឌ្ឍប្រព័ន្ធរ៉ាដានេះ។ ប៉ុន្តែការចូលរួមរបស់ជប៉ុន អាចនឹងបណ្តាលឱ្យមានការបារម្ភពីការប្រកួតប្រជែងរត់ប្រណាំងសព្វាវុធរវាងប្រទេសមហាអំណាចផងដែរ។ នេះបើតាមការលើកឡើងរបស់អ្នកវិភាគមួយចំនួន៕