EDC ប្រកាសកាត់បន្ថយការផ្គត់ផ្គង់ភ្លើងខ្លះ រយៈពេល ៧២ថ្ងៃ
- 2019-03-18 06:50:12
- ចំនួនមតិ 0 | ចំនួនចែករំលែក 0
EDC ប្រកាសកាត់បន្ថយការផ្គត់ផ្គង់ភ្លើងខ្លះ រយៈពេល ៧២ថ្ងៃ
ចន្លោះមិនឃើញ
អគ្គិសនីកម្ពុជា បានប្រកាសកាត់បន្ថយការផ្គត់ផ្គង់ភ្លើងខ្លះ រយៈពេល ៧២ថ្ងៃដល់ចុងខែឧសភា ក្នុងពេលដែលកម្ពុជា កំពុងខ្វះថាមពលប្រើប្រាស់ក្នុងរដូវក្តៅនេះ។ នេះបើតាមសេចក្តីប្រកាសព័ត៌មានរបស់ EDC នៅថ្ងៃទី១៨ ខែមីនា ឆ្នាំ២០១៩នេះ។
EDC បញ្ជាក់ថា ខ្លួនបានទាក់ទងប្រទេសជិតខាងឱ្យជួយបង្កើនការផ្គត់ផ្គង់អគ្គិសនីបន្ថែមដល់កម្ពុជា។ ជាលទ្ធផល ប្រទេសថៃ បានជួយបង្កើនការផ្គត់ផ្គង់បន្ថែម ៨០មេហ្គាវាត់, ប្រទេសឡាវបន្ថែម ១០មេហ្គាវាត់ និងវៀតណាម បានជួយរក្សាការផ្គត់ផ្គង់ភ្លើងឱ្យនៅដដែល ទោះបីជាភាគខាងត្បូងវៀតណាម កំពុងជួបបញ្ហាខ្វះខាតអគ្គិសនីដូចគ្នាក៏ដោយ។ ទោះជាយ៉ាងនេះ ក៏កម្ពុជា នៅតែមានកង្វះថាមពលប្រមាណ ១៣% ដែលតម្រូវឱ្យ EDC ធ្វើការកាត់បន្ថយការផ្គត់ផ្គង់ខ្លះ រហូតរដូវវស្សាមកដល់។
EDC ពន្យល់ថា ការកាត់បន្ថយការផ្គត់ផ្គង់នេះ ធ្វើនៅពេលថ្ងៃតាមកន្លែងឆ្លាស់គ្នា ដើម្បីរក្សាការផ្គត់ផ្គង់នៅពេលយប់ ដែលជាពេលប្រជាពលរដ្ឋត្រូវការប្រើប្រាស់ចាំបាច់។ ជាមួយគ្នានោះ EDC ក៏បានគិតគូរឱ្យអស់លទ្ធភាពផ្គុំគ្នាជាមួយការជួយដំណើរការម៉ាស៊ីនភ្លើងផ្ទាល់ខ្លួនក្នុងការផ្គត់ផ្គង់ពេលថ្ងៃសម្រាប់ដំណើរការផ្នែកឧស្សាហកម្ម ការកិនស្រូវអង្ករសម្រាប់នាំចេញ មន្ទីរពេទ្យ រដ្ឋាករទឹក ស្ថានទូត និងស្ថាប័នរាជរដ្ឋាភិបាល។
សេចក្តីប្រកាសដដែលបន្ថែមថា ក្នុងរយៈពេលដែលមានការលំបាកនេះ ដោយឡែកថ្ងៃបុណ្យជាតិ រួមនឹងថ្ងៃអាទិត្យ ដែលជាថ្ងៃសម្រាកសរុប ២៣ថ្ងៃ EDC នឹងរក្សាការផ្គត់ផ្គង់ឱ្យមានជាធម្មតា។ ប្រសិនបើមានភ្លៀងធ្លាក់មកមុនចុងខែឧសភា ការផ្គត់ផ្គង់នឹងមានជាប្រក្រតីឡើងវិញ។
អគ្គិសនីកម្ពុជា បានឱ្យដឹងថា អាកាសធាតុក្តៅខ្លាំង និងការខ្វះទឹកខុសប្រក្រតី បានធ្វើឱ្យសមត្ថភាពផ្គត់ផ្គង់ចេញពីប្រភពវារីអគ្គិសនីថយចុះ មិនអាចធានាការផ្គត់ផ្គង់ថាមពលអគ្គិសនីពេញលេញទូទាំងប្រទេសដល់ចុងរដូវប្រាំងដូចសព្វមួយដងបានឡើយ៕