កុំភ្លេចលេខនេះ ពេលកើតមានគ្រោះអគ្គីភ័យ ខណៈអាកាសធាតុនៅកម្ពុជាក្តៅខ្លាំង
- 2019-03-19 07:19:27
- ចំនួនមតិ 0 | ចំនួនចែករំលែក 0
កុំភ្លេចលេខនេះ ពេលកើតមានគ្រោះអគ្គីភ័យ ខណៈអាកាសធាតុនៅកម្ពុជាក្តៅខ្លាំង
ចន្លោះមិនឃើញ
ក្រសួងមហាផ្ទៃបានណែនាំទៅប្រជាពលរដ្ឋថា នៅពេលមានគ្រោះអគ្គីភ័យកើតឡើង ត្រូវផ្តល់ព័ត៌មានជាបន្ទាន់ទៅអាជ្ញាធរមូលដ្ឋានដែលនៅជិតបំផុត ឬទាក់ទងមន្រ្តីនគរបាលបង្ការពន្លត់អគ្គីភ័យ តាមរយៈទូរសព្ទលេខ៖ ១១៧ ឬលេខ ៦៦៦ (សម្រាប់រាជធានីភ្នំពេញ)។ នេះបើតាមសេចក្តីអំពាវនាវរបស់ក្រសួងមហាផ្ទៃ នៅថ្ងៃទី១៩ ខែមីនា ឆ្នាំ២០១៩នេះ។
ការចេញសេចក្តីអំពាវនាវនេះ ធ្វើឡើងខណៈដែលអាកាសធាតុនៅកម្ពុជា នឹងឡើងកម្តៅរហូតដល់លើស ៤០អង្សារសេ ចាប់ពីពេលនេះតទៅ រហូតដល់រយៈពេលប្រមាណពីរខែទៅមុខទៀត។ ការណ៍នេះ នឹងធ្វើឱ្យអាកាសធាតុក្តៅ ស្ងួត ហួតហែង ងាយនឹងបណ្តាលឱ្យកើតគ្រោះអគ្គីភ័យ ជាយថាហេតុ។
ជាមួយគ្នានេះ ក្រសួងមហាផ្ទៃ បានអំពាវនាវ និងដាក់ចេញវិធានការមួយចំនួនរួមមាន៖
-ត្រូវបង្កើនការប្រុងប្រយ័ត្នគ្រប់ពេលចំពោះដើមចម ដែលអាចបង្កើតឱ្យមានគ្រោះអគ្គីភ័យ ដូចជា ភ្លើងចង្ក្រាន ភ្លើងចង្កៀង ភ្លើងធូប-ទៀន ការដុតសំរាម ដុតព្រៃ-ចម្ការ-វាលស្រែ ការបោះចោលកន្ទុយបារីផ្តេសផ្តាស ការតភ្ជាប់ ឬប្រើចរន្តអគ្គិសនីមិនត្រឹមត្រូវតាមបច្ចេកទេស ការទុកដាក់ប្រេងឥន្ធនៈ ឧស្ម័នចំហេះ វត្ថុងាយឆេះ ឬងាយផ្ទុះឆេះ។ល។ ដោយត្រូវពិនិត្យឱ្យបានហ្មត់ចត់ បង្ការកុំឱ្យមានការឆេះរាលដាលបង្កើតជាគ្រោះអគ្គីភ័យ។
-អាជ្ញាធរមូលដ្ឋានត្រូវយកចិត្តទុកដាក់រៀបចំសណ្តាប់ធ្នាប់បណ្តាញអគ្គិសនី និងផ្លូវសាធារណៈនៅតំបន់ងាយរងគ្រោះ ដើម្បីបង្កលក្ខណៈងាយស្រួលដល់ការចុះអន្តរាគមន៍សង្គ្រោះ បានទាន់ពេលវេលា។
-អង្គភាពនគរបាលបង្ការពន្លត់អគ្គីភ័យនៅតាមបណ្តារាជធានី-ខេត្ត និងនៅតាមបណ្តាស្ថានីយរថយន្តអគ្គីភ័យក្រុង-ស្រុក ត្រូវបន្តយកចិត្តទុកដាក់អប់រំណែនាំប្រជាពលរដ្ឋ អំពីវិធានការបង្ការអគ្គីភ័យ ព្រមទាំងត្រូវពង្រឹងការងារប្រចាំការ ២៤/២៤ម៉ោង និងត្រូវត្រៀមជាស្រេចនូវរថយន្តពន្លត់អគ្គីភ័យ ឧបករណ៍សម្ភារៈ ប្រេងឥន្ធនៈ ទឹកស្តុក និងប្រភពយកទឹកឱ្យគ្រប់គ្រាន់ បម្រើឱ្យការងារពន្លត់ និងសង្គ្រោះ ដើម្បីធានាដល់កិច្ចអន្តរាគមន៍ឆាប់រហ័ស និងមានប្រសិទ្ធភាព៕