សម្តេច ហ៊ុន សែន ជាមេដឹកនាំបរទេសទី១ ដែលទទួលបានសញ្ញាបត្របណ្ឌិតកិត្តិយសផ្នែកទំនាក់ទំនងនយោបាយពីសាកលវិទ្យាល័យ Krirk
- 2019-03-19 07:49:35
- ចំនួនមតិ 0 | ចំនួនចែករំលែក 0
សម្តេច ហ៊ុន សែន ជាមេដឹកនាំបរទេសទី១ ដែលទទួលបានសញ្ញាបត្របណ្ឌិតកិត្តិយសផ្នែកទំនាក់ទំនងនយោបាយពីសាកលវិទ្យាល័យ Krirk
ចន្លោះមិនឃើញ
សម្តេចនាយករដ្ឋមន្រ្តី ហ៊ុន សែន នាព្រឹកថ្ងៃទី១៩ ខែមីនា ឆ្នាំ២០១៩ បានទទួលសញ្ញាបត្របណ្ឌិតកិត្តិយស ផ្នែកទំនាក់ទំនងនយោបាយពីសាកលវិទ្យាល័យគ្រើក (Kirik University) ប្រទេសថៃ។ ការណ៍នេះ បានធ្វើឱ្យសម្តេចក្លាយជាមេដឹកនាំបរទេសទី១ ដែលបានទទួលសញ្ញាបត្រនេះ ពីសាកលវិទ្យាល័យគ្រើក។ ពិធីនេះ ធ្វើឡើងនៅវិមានសន្តិភាព។
សាកលវិទ្យាល័យដ៏ល្បីក្នុងប្រទេសមួយនេះ មានអាយុកាល ៦៧ឆ្នាំមកហើយ។
លោកសាស្រ្ដាចារ្យ ក្រាស៊ែ ឆាណាវង្ស (Krasae Chanawongse) ប្រធានសាកលវិទ្យាល័យគ្រើក បានលើកឡើងថា សម្តេចតេជោនាយករដ្ឋមន្ត្រី គឺជាមេដឹកនាំដែលពោរពេញទៅដោយចំណេះដឹង បទពិសោធ និងសមត្ថភាព ដែលបានប្រើប្រាស់ជំនាញផ្នែកទំនាក់ទំនងនយោបាយ ធ្វើឱ្យកម្ពុជា បានបង្រួបបង្រួម មានសុខសន្តិភាព និងរីកចម្រើនជាមួយកំណើនសេដ្ឋកិច្ចរឹងមាំមកទល់សព្វថ្ងៃ។
លោកសាស្រ្តាចារ្យ Krasae Chanawongse បានបញ្ជាក់ឡើងវិញថែមទៀតផងដែរថា គឺនៅឆ្នាំ១៩៧០ ដែលពេលនោះ សម្តេចតេជោ មានអាយុទើបតែ១៨ឆ្នាំ ដែលបានស្ម័គ្រចិត្តចូលធ្វើទាហាន រំលត់ភ្លើងសង្រ្គាម និងរំដោះប្រទេសពីរបបប៉ុលពតប្រល័យពូជសាសន៍ ដែលទទួលបាននូវការគាំទ្រយ៉ាងច្រើនពីពលទាហាន ក៏ដូចជាពលរដ្ឋទូទៅ រហូតដល់ប្រទេសកម្ពុជា ត្រូវបានរំដោះរួចផុតពីរបបប្រល័យពូជសាសន៍នៅឆ្នាំ១៩៧៩។ ដោយសារភាពវៃឆ្លាតនៃការទំនាក់ទំនងទាំងក្នុងជួររដ្ឋាភិបាល និងក្នុងចំណោមសាធារណជន គឺសម្តេច ហ៊ុន សែន ដែលពេលនោះអាយុទើបតែ ៣២ ឆ្នាំ (១៩៨៥) បានក្លាយជានាយករដ្ឋមន្រ្តីដែលមានវ័យក្មេងជាងគេបំផុតនៅលើពិភពលោក។
លោកបន្តថា តាមរយៈការប្រើប្រាស់នូវទំនាក់ទំនងនយោបាយ គឺសម្តេចតេជោ បានកសាងនូវទំនុកចិត្តជាមួយ សមាជិកគណបក្ស សមាជិករដ្ឋាភិបាល និងជាមួយប្រជាពលរដ្ឋ ដែលបានធ្វើឱ្យ គណបក្សប្រជាជនកម្ពុជា ឈ្នះឆ្នោត ភ្លូកទឹកភ្លូកដីនៅក្នុងថ្ងៃបោះឆ្នោត ថ្ងៃទី ២៩ កក្កដា ឆ្នាំ២០១៨ ដែលបានធ្វើឱ្យ សម្តេចបន្តកាន់តំណែងនាយករដ្ឋមន្រ្តី មានរយៈពេល៣៤ឆ្នាំហើយ មកទល់ឆ្នាំ ២០១៩នេះ។
សូមជម្រាបថា សម្តេចនាយករដ្ឋមន្រ្តី ក៏ធ្លាប់បានទទួលមេដាយ និងសញ្ញាបត្របណ្ឌិតកិត្តិយជាច្រើនមកហើយ ពីបណ្តាប្រទេសមួយចំនួនដូចជា ប្រទេសចិន, កូរ៉េ, វៀតណាម, រុស្សី, អ៊ឺរ៉ុប និងសហរដ្ឋអាមេរិកជាដើម។
ប្រមុខរាជរដ្ឋាភិបាល បានថ្លែងបញ្ជាក់ថា សញ្ញាបត្របណ្ឌិតកិត្តិយសដែលសម្តេចទទួលបានថ្ងៃនេះ គឺជាមោទនភាពសម្រាប់ប្រជាជនកម្ពុជាទាំងមូល ដែលបានចូលរួមនៅក្នុងបុព្វហេតុជាតិមាតុភូមិ ហើយដែលតែងតែគំាំទ្រ និងជឿជាក់លើការដឹកនាំរបស់សម្តេច និងគណបក្សប្រជាជនកម្ពុជា។ ទន្ទឹមនេះ កិត្តិយសដែលសម្តេចតេជោ ទទួលបានថ្ងៃនេះ គឺបានឆ្លុះបញ្ចាំងអំពីចំណងមិត្តភាពកាន់តែរឹងមាំរវាងប្រជាជន និងប្រទេសទាំងពីរ តាមរយៈកិច្ចសហប្រតិបត្តិការលើគ្រប់វិស័យ ដែលកំពុងរីកធំធាត់ទៅមុខជាលំដាប់ ទាំងផ្នែកនយោបាយ សេដ្ឋកិច្ច ពាណិជ្ជកម្ម វប្បធម៌ និងការអភិវឌ្ឍធនធានមនុស្ស៕
អត្ថបទ និងរូបថត៖ ហ្វេសប៊ុកសម្តេច ហ៊ុន សែន