ក្រសួងបរិស្ថាន ថ្កោលទោសអំពើឃោរឃៅរបស់ក្រុមជនល្មើស ដែលកាប់មកលើក្រុមអ្នកអភិរក្ស

2019-03-20 06:36:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងបរិស្ថាន បានបង្ហាញការសោកស្តាយ និងថ្កោលទោសចំពោះអំពើអមនុស្សធម៌ សាហាវឃោរឃៅរបស់ក្រុមជនល្មើសប្រឆាំងនឹងក្រុមអ្នកការពារ និងអភិរក្សធនធានធម្មជាតិអំឡុងពេលចុះបំពេញបេសកកម្មក្នុងបុព្វហេតុបរិស្ថាន និងធនធានធម្មជាតិ។

លោក នេត្រ ភក្ត្រា មន្ត្រី រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានឲ្យដឹងថា នៅថ្ងៃទី១៩ ខែមីនា ឆ្នាំ២០១៩ កម្លាំងមន្ត្រីឧទ្យានុរក្សប្រចាំការនៅច្រករបៀងអភិរក្សជីវចម្រុះព្រៃអង់តែនចំនួន០៥នាក់ បានចុះល្បាតនៅតំបន់អូរដើមថ្កូវ ក្នុងភូមិសាស្ត្រ ឃុំក្រយា ស្រុកសន្ទុក ខេត្តកំពង់ធំ បានជួបប្រទះជនល្មើសចំនួន ២នាក់ ដែលកំពុងធ្វើសកម្មភាពប្រព្រឹត្តបទល្មើសកាប់ឆា្ករព្រៃទន្ទ្រានយកដីព្រៃធ្វើចម្ការ។ ពេលនោះមន្ត្រីឧទ្យានុរក្សបានដេញចាប់ជនល្មើស តែបានទាក់ជើងដួលហើយត្រូវជនល្មើសតដៃ ដោយបានកាប់ត្រូវកម្លាំងមន្ត្រីឧទ្យានុរក្សម្នាក់ឈ្មោះ ចក់ សុជាតិ ត្រូវចំនួន ០៥កាំបិតផ្គាក់ ត្រូវចំក្បាល កញ្ចឹងក និងកដៃ បណ្តាលឱ្យរងរបួសធ្ងន់។ ចំណែកមន្ត្រីឧទ្យានុរក្ស ៤នាក់ផ្សេងទៀត មិនមានរងរបួសអ្វីឡើយ។ ចំណែកជនល្មើសបានរត់គេចខ្លួនបាត់។

លោកបានបន្តថា បច្ចុប្បន្នមន្ត្រីឧទ្យានុរក្សដែលមានរបួសមានស្ថានភាពធ្ងន់ធ្ងរផែ្នកលលាដ៏ក្បាល ត្រូវបានក្រុមគ្រូពេទ្យ បញ្ជូនទៅកាន់មន្ទីរពេទ្យកាល់ម៉ែត្រ រាជធានីភ្នំពេញ។ លោករដ្ឋលេខាធិការ បានឱ្យដឹងថា មន្ត្រីសមត្ថកិច្ចបាននឹងកំពុងស៊ើបអង្កេត ធ្វើកំណត់ហេតុ និងដាក់ពាក្យបញ្ជូនរឿងទៅកាន់តុលាការដើម្បីវែកមុខរកជនល្មើសមកផ្តន្ទាទោស។

លោក ចក់ សុជាតិ គឺជាមន្ត្រីឧទ្យានុរក្សទី២ ដែលត្រូវបានរងរបួសដោយការតដៃរបស់ជនល្មើស ក្នុងបទល្មើសធនធានធម្មជាតិ ក្នុងរយៈពេល ២ខែចុងក្រោយនេះ។ កាលពីចុងខែមករា ឆ្នាំ២០១៩ មន្ត្រីឧទ្យានម្នាក់ឈ្មោះ ចេង ចាន់ធី ត្រូវបានក្រុមព្រានព្រៃបំពាក់ដោយកាំភ្លើងបាញ់ប្រហារមកលើ ធ្វើឱ្យរបួស ចំភ្លៅ អំឡុងពេលនៃការចុះបង្ក្រាបបទល្មើសសត្វព្រៃ ក្នុងភូមសាស្ត្រនៃដែនជម្រកសត្វព្រៃស្រែពក ក្នុងខេត្តមណ្ឌលគិរី។

បច្ចុប្បន្ននេះ ក្រសួងបរិស្ថានមានមន្ត្រីឧទ្យានុរក្សចំនួន ១២២១នាក់ ដែលកំពុងតែការពារ និងអភិរក្សតំបន់ការពារធម្មជាតិ និងរបៀងអភិរក្សជីវចម្រុះចំនួនជិត ៦០ ដែលមានទំហំប្រមាណ ៧,៥លានហិកតា។

លោករដ្ឋលេខាធិការក្រសួងបរិស្ថាន បានថ្លែងថា មន្ត្រីឧទ្យានុរក្សដែលមានតួនាទីជាមន្ត្រីយុត្តិធម៌ មានតួនាទីការពារ និងអភរិក្សធនធានធម្មជាតិ និងអភិរក្ស ជីវចម្រុះនៅតាមតំបន់ការពារធម្មជាតិនានាក្នុងប្រទេសកម្ពុជា បានលះបង់សព្វបែបយ៉ាងរួមនឹងអាយុជីវិត ដើម្បីការពារធនធានធម្មជាតិ ឱ្យបានគង់វង្សសម្រាប់មនុស្សរាប់ជំនាន់តទៅមុខទៀត។

លោកក៏បានអំពាវនាវថា មិនត្រូវយកមន្ត្រីឧទ្យានុរក្សធ្វើជាសត្រូវឡើយ ព្រោះពួកគាត់បានឆ្លងកាត់ការលំបាក ព្យុះភ្លៀង និងប្រឈមការគំរាមកំហែងនានាពីជនល្មើសច្បាប់ ដើម្បីការពារធនធានធម្មជាតិ និងបរិស្ថាន៕

អត្ថបទ៖ សោភា