មេគយកម្ពុជា ដាក់ចេញវិធានការទប់ស្កាត់ការនាំចេញ-នាំចូល ភ្លុកដំរី និងកុយរមាស

2019-03-21 03:44:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកគយ និងរដ្ឋាករកម្ពុជា បានដាក់ចេញនូវវិធានការ ដើម្បីរឹតបន្តឹងការងារទប់ស្កាត់ និងបង្ក្រាបការនាំចូលការនាំចេញ និងការឆ្លងកាត់នូវភ្លុកដំរីកុយរមាសគ្រឿងចម្លាក់កែច្នៃពីភ្លុកដំរី និងកុយរមាសខុសច្បាប់។

យោងតាមលិខិតរបស់លោក គុណ ញឹម ជម្រាបទៅប្រធាននាយកដ្ឋានសាខា និងការិយាល័យគយ និងរដ្ឋាករទាំងអស់ កាលពីថ្ងៃទី១៨ ខែមីនា បានឲ្យដឹងថា ការនាំចូលការនាំចេញ និងការឆ្លងកាត់នូវភ្លុកដំរីកុយរមាសគ្រឿងចម្លាក់កែច្នៃពីភ្លុកដំរី និងកុយរមាសជាអំពើខុសច្បាប់។

លោកបន្តថា ការកើតមាននូវសកម្មភាពទាំងនេះនៅលើទឹកដីនៃព្រះរាជាណាចក្រកម្ពុជា និងជះឥទ្ធិពលអវិជ្ជមានចំពោះកិច្ចខិតខំប្រឹងប្រែងរបស់រាជរដ្ឋាភិបាល ក្នុងនាមជារដ្ឋសមាជិកនៃអនុសញ្ញាស្តីពីការធ្វើពាណិជ្ជកម្មអន្តរជាតិលើប្រភេទសត្វព្រៃ និងរុក្ខជាតិកំពុងរងគ្រោះ ក៏ដូចជាធ្វើឲ្យខូចកិត្តិយសរបស់ព្រះរាជាណាចក្រកម្ពុជា លើឆាកអន្តរជាតិ។

ក្នុងន័យនេះអគ្គនាយកដ្ឋានគយ និងរដ្ឋាករកម្ពុជា បានណែនាំប្រធាននាយកដ្ឋានសាខា និងការិយាល័យគយ និងរដ្ឋាករ ក្រោមឱវាទទាំងអស់ឲ្យរឹតបន្តឹងការងារទប់ស្កាត់ និងបង្ក្រាបការនាំចូល ការនាំចេញ និងការដឹកឆ្លងកាត់នូវភ្លុកដំរីកុយរមាស គ្រឿងចម្លាក់កែច្នៃពីភ្លុកដំរី និងកុយរមាស សត្វនិងរុក្ខជាតិ ងាយរងគ្រោះ និងបំណែករបស់វាដ៏ទៃទៀតដែលច្បាប់ហាមឃាត់ ឲ្យកាន់តែមានប្រសិទ្ធភាពដូចខាងក្រោម៖

១- ពង្រឹងការសិក្សាវិភាគតម្លៃព័ត៌មានដែលមាននៅលើនិវេទន៍បណ្ណ អញ្ញត្តិកម្ម វិក្ក័យបត្រ និង/ឬបញ្ជីវេចខ្ចប់ ដើម្បីកំណត់មុខសញ្ញានៃការនាំចូល ការនាំចេញ និងការឆ្លងកាត់ខុសច្បាប់ និងទំនិញហាមឃាត់ដូចរៀបរាប់ខាងលើ ឲ្យបានច្បាស់លាស់ប្រកបដោយជំនាញវិជ្ជាជីវៈខ្ពស់។

២-ចាត់តាំង និងកសាងបណ្តាញសម្ងាត់គយ ដើម្បីទទួលបានព័ត៌មានអំពីការរត់ពន្ធនូវទំនិញហាមឃាត់ ដូចរៀបរាប់ខាងលើ ដើម្បីចាត់វិធានការបង្ក្រាបឲ្យមានប្រសិទ្ធភាពខ្ពស់ និងទទួលបានលទ្ធផល។

៣-ក្នុងករណីការនាំចូលការនាំចេញ នឹងការឆ្លងកាត់នូវទំនិញហាមឃាត់ទាំងនោះ ត្រូវបានកំណត់មុខសញ្ញា អង្គភាពគយ និងរដ្ឋាករពាក់ព័ន្ធផ្ទាល់ ត្រូវចាត់ចែងត្រួតពិនិត្យរូបវន្តលម្អិត រួមទាំងការប្រើប្រាស់ឧបករណ៍ចាំបាច់ នានាជាជំនួយដូចជា X-RAY , SCANNER ជាដើម។ ក្នុងករណីរកឃើញទំនិញល្មើសត្រូវចាត់វិធានការ បង្ក្រាបដោយឃាត់ទុក និងកសាងកំណត់ហេតុល្មើសច្បាប់ គយ ជាបន្ទាន់ដោយគ្មានការបង្អែរបង្អង់ ឲ្យស្របទៅនឹងច្បាប់ស្តីពីគយ និងច្បាប់ពាក់ព័ន្ធនានាជាធរមាន។

៤-ក្នុងករណីរកឃើញដោយចៃដន្យនូវទំនិញល្មើសច្បាប់ទាំងនេះ នៅផ្ទៃក្នុងប្រទេស ដែលមិនមែននៅមាត់ច្រកព្រំដែនគោក កំពង់ផែ និងអាកាសយាដ្ឋានអន្តរជាតិ ត្រូវអនុវត្តកិច្ចសហប្រតិបត្តិការ ផ្ដល់ព័ត៌មានទៅអាជ្ញាធរដែនដី និងអង្គភាពសមត្ថកិច្ចជំនាញដើម្បីចាត់វិធានការតាមច្បាប់ និងចូលរួមអនុវត្តការងារត្រួតពិនិត្យ និងបង្ក្រាបតាមការចាំបាច់។

៥-បទល្មើសប្រភេទនេះត្រូវជាកម្មវត្ថុនៃចំណាត់ការតាមផ្លូវតុលាការ។ ក្នុងន័យនេះអង្គភាព គយនិងរដ្ឋាករជាម្ចាស់ករណីផ្ទាល់ ត្រូវចាត់ការដាក់ពាក្យបណ្ដឹងទៅតុលាការមានសមត្ថកិច្ចស្របតាមនីតិវិធី និងបទប្បញ្ញត្តិជាធរមាន។

៦-អង្គភាពគយនិងរដ្ឋាករ ដែលជាម្ចាស់ករណីផ្ទាល់ត្រូវធ្វើរបាយការណ៍លាយលក្ខណ៍អក្សរលម្អិត តាមឋានានុក្រមបែបបទរដ្ឋបាល និងស្របតាមខ្លឹមសារនៃលិខិតលេខ ១៦៧៦/១៦ អគរ ចុះថ្ងៃទី៩ ខែកញ្ញា ឆ្នាំ២០១៦។

យោងតាមតួលេខដែលទទួលបាន ចាប់ពីឆ្នាំ២០១៦ រហូតមកទល់នឹងចុងឆ្នាំ២០១៨ ភ្លុកដំរីជាច្រើនពាន់ដុំមានទម្ងន់សរុបប្រមាណ ៥តោន ត្រូវបានអាជ្ញាធរកម្ពុជាបង្ក្រាប និងរឹបអូសភ្លុកដំរីទម្ងន់ ១៣០០ គីឡូក្រាម នៅកំពង់ផែស្វយ័តខេត្តព្រះសីហនុ នៅអំឡុងឆ្នាំ ២០១៦។ ហើយការបង្ក្រាបទ្រង់ទ្រាយធំចុងក្រោយដោយអាជ្ញាធរកម្ពុជានៅខែធ្នូ ឆ្នាំ២០១៨ ដោយនាយកដ្ឋានគយ និងរដ្ឋាករកម្ពុជា បានរកឃើញ ភ្លុកដំរីជាង ១ពាន់ដុំ ទម្ងន់ ជិត ៣៥០០គីឡូក្រាម ទុកចោល ក្នុងទូកុងតឺន័រ នៅកំពង់ផែស្វយ័តភ្នំពេញ៕

អត្ថបទ៖ សោភា