ផ្លូវល្បឿនលឿនភ្នំពេញ-សីហនុ ជាគម្រោងដ៏ធំបំផុតមួយរបស់ក្រុមហ៊ុនចិន ដែលវិនិយោគនៅក្រៅប្រទេស

2019-03-21 08:03:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គម្រោងផ្លូវល្បឿនលឿន ពីរាជធានីភ្នំពេញ ទៅខេត្តព្រះសីហនុ ប្រវែងជាង ១៩០គីឡូម៉ែត្រ គឺជាគម្រោងដ៏ធំបំផុតមួយក្នុងចំណោមគម្រោង ១៥៥ ដែលក្រុមហ៊ុនសាជីវកម្មស្ពាន-ថ្នល់ចិន (CRBC) វិនិយោគនៅក្រៅប្រទេស។ នេះបើតាមការបង្ហោះនៅលើទំព័រហ្វេសប៊ុកសម្តេច ហ៊ុន សែន ស្តីពីជំនួបរវាងសម្តេច ហ៊ុន សែន និងលោក Weng Gang អនុប្រធានក្រុមហ៊ុន CRBC នាព្រឹកថ្ងៃទី២១ ខែមីនា ឆ្នាំ២០១៩ នៅវិមានសន្តិភាព។

រូបថត៖ ហ្វេសប៊ុកសម្តេច ហ៊ុន សែន

គម្រោងផ្លូវល្បឿនលឿនធំជាងគេទី១នៅកម្ពុជានេះ នឹងត្រូវចំណាយទឹកប្រាក់ ២ពាន់លានដុល្លារក្រោមរូបភាពវិនិយោគសាងសង់-ធ្វើអាជីវកម្ម-ផ្ទេរ (BOT) និងប្រើរយៈពេលសាងសង់ប្រមាណ ៤៨ខែ។

លោក Weng Gang បានជម្រាបជូនសម្តេច ហ៊ុន សែន ថាក្រុមហ៊ុនលោក បានចូលរួមចំណែកក្នុងការកសាងស្ពាន-ថ្នល់ និងហេដ្ឋារចនាសម្ព័ន្ធផ្សេងៗទៀតនៅកម្ពុជា ដែលរហូតមកដល់ពេលនេះ គឺបានសម្រេចកសាងថ្នល់ប្រវែង ១ពាន់គីឡូម៉ែត្ររួចហើយ។

សូមជម្រាបថា នៅថ្ងៃទី២២ ខែមីនាស្អែកនេះ សម្តេចនាយករដ្ឋមន្រ្តី នឹងអញ្ជើញជាអធិបតីភាពក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-សីហនុ ជាផ្លូវការ ដែលប្រព្រឹត្តធ្វើឡើងនៅក្នុងស្រុកសំរោងទង ខេត្តកំពង់ស្ពឺ។ ក្នុងថ្ងៃសម្ពោធនេះ ក្រុមហ៊ុន CRBC នឹងប្រគល់សម្ភារៈថែទាំ និងជួសជុលថ្នល់មួយចំនួនដល់រាជរដ្ឋាភិបាលកម្ពុជាផងដែរ។

រូបថត៖ ហ្វេសប៊ុកក្រសួងសាធារណការ និងដឹកជញ្ជូន

សម្តេចតេជោ ហ៊ុន សែន បានមានប្រសាសន៍កោតសរសើរ និងគាំទ្រនូវគម្រោងវិនិយោគទាំងឡាយរបស់ក្រុមហ៊ុន CRBCដែលភាគច្រើន គឺបានសាងសង់ស្ពានថ្នល់ធំៗជាច្រើននៅក្នុងប្រទេសកម្ពុជា។ គម្រោងសាងសង់ផ្លូវល្បឿនលឿនពីភ្នំពេញទៅព្រះសីហនុ គឺនឹងកាន់តែផ្តល់ផលប្រយោជន៍ជាច្រើនថែមទៀតដល់កម្ពុជា៕

អត្ថបទទាក់ទង៖

អត្ថបទ៖ សំភី