វៀតណាម ប្រឆាំងនឹងការធ្វើសមយុទ្ធបាញ់គ្រាប់ពិតរបស់តៃវ៉ាន់ នៅសមុទ្រចិនខាងត្បូង

2019-03-22 03:52:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

វៀតណាម បានជំទាស់នឹងការធ្វើសមយុទ្ធបាញ់គ្រាប់ពិតរបស់តៃវ៉ាន់ នៅជុំវិញកោះ Itu Aba ក្នុងប្រជុំកោះ Spratly នៅសមុទ្រចិនខាងត្បូង ដែលវៀតណាមអះអាងថា ជាដែនអធិបតេយ្យរបស់ខ្លួន។ នេះបើតាមការបញ្ជាក់របស់លោក លោកស្រី Le Thi Thu Hang អ្នកនាំពាក្យក្រសួងការបរទេសវៀតណាម កាលពីថ្ងៃទី២១ ខែមីនា ឆ្នាំ២០១៩។

រូបថត៖ វិបសាយ VoV World

ជាមួយគ្នានេះ វៀតណាម បានទាមទារឱ្យតៃវ៉ាន់ បញ្ឈប់ការធ្វើសមយុទ្ធបែបនេះទៀត នាពេលអនាគត ដោយលោកស្រីអះអាងថា វៀតណាមមានមូលដ្ឋានច្បាប់ និងភស្តុតាងប្រវត្តិសាស្រ្ត ដើម្បីបញ្ជាក់ពីអធិបតេយ្យរបស់ខ្លួន ដោយស្របតាមច្បាប់អន្តរជាតិ។

វៀតណាម បានចាត់ទុកការធ្វើសមយុទ្ធបាញ់គ្រាប់ពិតនៅក្នុងដែនទឹកនេះ ថាជាការបំពានយ៉ាងធ្ងន់ធ្ងរមកលើអធិបតេយ្យខ្លួន និងជាការគំរាមកំហែងដល់សន្តិភាព ស្ថិរភាព និងសន្តិសុខ សុវត្ថិភាពតាមផ្លូវសមុទ្រ ព្រមទាំងបណ្តាលឱ្យមានភាពតានតឹងក្នុងតំបន់ទៀតផង។

រូបថត៖ Google Map

សូមជម្រាបថា ឆ្មាំសមុទ្រតៃវ៉ាន់ បានធ្វើសមយុទ្ធបាញ់គ្រាប់ពិតនៅជុំវិញកោះ Itu Aba ពីថ្ងៃទី២០ ដល់ ២១ ខែមីនា ឆ្នាំ២០១៩ ដោយប្រើប្រាស់កាំភ្លើងត្បាល់ចំនួន ១២០គ្រឿង, កាំភ្លើងការពារដែនអាកាស និងកាំភ្លើងប្រឆាំងរថក្រោះ ចំនួន៤០គ្រឿង៕

ប្រភព៖ Vietnam Express ប្រែសម្រួល៖ សំភី