ថៃ៖ បក្ស៥ ប្រកាសប្រឆាំងនឹងការបន្តធ្វើនាយករដ្ឋមន្រ្តីរបស់ ប្រាយុទ្ធ ក្រោយការបោះឆ្នោត

2019-03-22 08:17:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណបក្សចំនួន៥ នៅក្នុងប្រទេសថៃ កាលពីថ្ងៃទី២១ ខែមីនា ឆ្នាំ២០១៩ បានប្រកាសគោលជំហរប្រឆាំងនឹងការបន្តធ្វើជានាយករដ្ឋមន្រ្តីរបស់លោក ប្រាយុទ្ធ ចាន់អូចា ក្រោយការបោះឆ្នោតនាថ្ងៃទី២៤ ខែមីនាខាងមុខនេះ។ គណបក្សទាំងនោះរួមមាន៖ គណបក្ស Grin, គណបក្ស Moderate, គណបក្ស Green, គណបក្ស Commoners' Party និងគណបក្ស Commoner Party of Thailand។

រូបថត៖ The Nation

ជាមួយគ្នានេះ គណបក្សទាំង៥ ក៏បានសន្យាធ្វើវិសោធនកម្មរដ្ឋធម្មនុញ្ញរបស់រដ្ឋាភិបាលយោធាថៃផងដែរ និងបានទាមទារឱ្យសមាជិកព្រឹទ្ធសភាចំនួន២៥០រូប ដែលជ្រើសរើសដោយក្រុមប្រឹក្សាជាតិសម្រាប់សន្តិភាព និងសណ្តាប់ធ្នាប់ (NCPO) របស់លោកប្រាយុទ្ធ ត្រូវគោរពឆន្ទៈប្រជាជន ដោយអនុញ្ញាតឱ្យគណបក្សដែលឈ្នះអាសនៈច្រើនបំផុត បង្កើតរដ្ឋាភិបាលបាន។

លោក Lertsak Kamkongsak មេដឹកនាំគណបក្ស Commoner's Party បាននិយាយថា ការធ្វើវិសោធនកម្មរដ្ឋធម្មនុញ្ញ គឺពាក់ព័ន្ធទៅនឹងអំណាចរបស់ព្រឹទ្ធសភា ដោយលើកឡើងថា ច្បាប់បច្ចុប្បន្នគឺអយុត្តិធម៌ និងមិនប្រជាធិបតេយ្យ។ «យើងមិនចូលដៃជាមួយលោកប្រាយុទ្ធ នៅពេលសភាបោះឆ្នោតរើសនាយករដ្ឋមន្រ្តីថ្មីមួយ ពីព្រោះគាត់បានលួចអំណាចពីប្រជាជនថៃ និងរក្សាអំណាចបាន៥ឆ្នាំមកហើយ។ ឥឡូវ វាជាពេលដែលត្រូវបញ្ចប់របបរបស់គាត់ហើយ»។

រូបថត៖ Twitter លោកប្រាយុទ្ធ

ចំណែកលោក Tanaporn Sriyakool មេដឹកនាំគណបក្ស Commoner Party of Thailand បានអំពាវនាវឱ្យគណបក្សទាំងអស់គោរពគោលការណ៍នូវការរៀបចំជារដ្ឋាភិបាលចម្រុះណាមួយដែលនឹងអាចកើតឡើង នៅពេលទទួលបានការគាំទ្រច្រើនជាងពាក់កណ្តាលនៃអាសនៈក្នុងសភា។

លោកអះអាងថា ការបន្តអំណាចរបស់លោកប្រាយុទ្ធ គឺមានតែការបង្កើតជម្លោះតែប៉ុណ្ណោះ។ «យើងត្រូវតែបញ្ឈប់គាត់»។ លោកក៏បានថ្កោលទោសដល់គណបក្សដែលមាននិន្នាការទៅខាងរដ្ឋាភិបាលយោធា ចំពោះការព្រមានធ្វើរដ្ឋប្រហារយោធាជាថ្មី ឬបាតុកម្មតាមផ្លូវ នៅពេលដែលក្រុមគណបក្សប្រជាធិបតេយ្យឈ្នះឆ្នោតផងដែរ៕

ប្រភព៖ Bangkokpost ប្រែសម្រួល៖ សំភី