ប្រធានាធិបតីតៃវ៉ាន់ ព្រមានពីមេរៀនរបស់ហុងកុង ហើយគ្រោងទិញយន្តហោះ F-16 និងរថក្រោះពីអាមេរិក

2019-03-28 08:41:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីតៃវ៉ាន់លោកស្រី Tsai Ing-wen បានប្តេជ្ញាការពារអធិបតេយ្យភាពកោះតៃវ៉ាន់ ដោយលោកស្រីបានព្រមានពីមេរៀនរបស់ហុងកុងថា ចិននឹងមិនអនុញ្ញាតឱ្យមានសេរីភាពនៅក្នុងដែនដីដែលគេគ្រប់គ្រងនោះទេ។ ការថ្លែងនេះ ធ្វើឡើងកាលពីថ្ងៃទី២៧ ខែមីនា ឆ្នាំ២០១៩ ក្នុងអំឡុងពេលប្តូរជើងហោះហើរនៅកោះហាវ៉ៃ ខណៈដែលលោកស្រីធ្វើទស្សនកិច្ចនៅប្រទេសកោះមួយចំនួនដែលជាសម្ព័ន្ធមិត្តរបស់តៃវ៉ាន់។

លោកស្រី Tsai ពេលធ្វើទស្សនកិច្ចនៅកោះ Honolulu ដែលជាសម្ព័ន្ធមិត្តមួយរបស់តៃវ៉ាន់ កាលពីថ្ងៃទី២៧ ខែមីនា ឆ្នាំ២០១៩។ រូបថត៖ Kyodo

លោកស្រីអះអាងថា សកម្មភាពរបស់ចិន បានធ្វើឱ្យតៃវ៉ាន់ដាច់ខាតត្រូវតែបង្កើនសមត្ថភាពការពារជាតិ។ «**ច្បាស់ណាស់ថា យើងស្វែងរកសន្តិភាព មិនមែនប្រទូស្តរាយទេ។ ប៉ុន្តែយើងត្រូវតែមានសមត្ថភាពការពារសេរីភាព ប្រជាធិបតេយ្យ និងវិធីនៃការរស់នៅរបស់យើង**»។

ប្រធានាធិបតីរូបនេះ បានក្រើនរំលឹកថា អ្នកនយោបាយតៃវ៉ាន់ គួរតែយកចិត្តទុកដាក់នឹងមេរៀនពីហុងកុង ដែលក្រុងប៉េកាំង បានគ្រប់គ្រង និងរឹតបន្តឹងលើក្រុមប្រឆាំង ក្នុងនោះរួមទាំងការហាមឃាត់គណបក្សដែលចង់បានឯករាជ្យហុងកុងផងដែរ។ «ហុងកុងគឺជាគំរូដ៏គួរឱ្យបារម្ភបំផុត។ វាគឺជាករណីសិក្សាដ៏ល្អមួយសម្រាប់តៃវ៉ាន់។ វាឆ្លុះបញ្ចាំងថា ប្រជាធិបតេយ្យ គឺមិនស្របជាមួយនឹងរបបដឹកនាំរបស់ចិននោះទេ»។

ជាមួយគ្នានោះ លោកស្រី Tsai ក៏បានលាតត្រដាងឱ្យដឹងផងដែរថា រដ្ឋាភិបាលរបស់លោកស្រី បានបញ្ជូនសំណើទៅអាមេរិក ដើម្បីទិញយន្តហោះចម្បាំង F-16V និងរថក្រោះ M1 Abrams ដើម្បីជំរុញសមត្ថភាពកងទ័ពជើងគោក និងអាកាសរបស់តៃវ៉ាន់ និងបង្ហាញចំពោះពិភពលោកអំពីការតាំងចិត្តរបស់អាមេរិក ក្នុងការការពារតៃវ៉ាន់៕