Solskjaer ត្រូវបានតែងតាំងជាអ្នកចាត់ការទូទៅក្លឹប Man Utd ហើយ

2019-03-28 09:43:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្លឹបបិសាចក្រហម Manchester United នៅថ្ងៃទី២៨ ខែមីនានេះ បានប្រកាសតែងតាំងលោក Ole Gunnar Solskjaer ជាអ្នកចាត់ការទូទៅក្លឹបនេះហើយ ជាមួយនឹងកុងត្រារយៈពេល ៣ឆ្នាំ។

រូបថត៖ ផ្តល់សិទ្ធិដោយ Reuters

សូមជម្រាបថា Solskjaer ត្រូវបានតែងតាំងជាអ្នកចាត់ការទូទៅបណ្តោះអាសន្នរបស់ក្លឹប Man Utd កាលពីថ្ងៃទី១៩ ខែធ្នូ ឆ្នាំ២០១៨។ ក្នុងនោះលោកបានដឹកនាំក្លឹប ឱ្យឈ្នះ៨ប្រកួតដំបូង។ គិតក្នុងចំណោម ១៩ប្រកួតដែលលោកដឹកនាំ គឺទទួលជ័យជម្នះ ១៤ដង និងស្មើ២ដង។ អ្វីដែលគួរឱ្យកត់សម្គាល់បំផុតនោះ គឺលោកបានដឹកនាំ Man Utd ឱ្យឈានដល់វគ្គ ៨ក្រុមចុងក្រោយនៃពានរង្វាន់ UEFA Champions League ទៀតផង។

Solskjaer បាននិយាយថា៖ «ចាប់តាំងពីថ្ងៃដំបូងដែលខ្ញុំមកដល់ ខ្ញុំមានអារម្មណ៍ថាដូចជានៅផ្ទះ ពេលនៅក្លឹបដ៏ពិសេសនេះ។ វាជាកិត្តិយសមួយ ដែលបានក្លាយជាកីឡាកររបស់ Man Utd ហើយបានចាប់ផ្តើមអាជីពជាគ្រូបង្វឹកនៅទីនេះ»។

រូបថត៖ ផ្តល់សិទ្ធិដោយ Reuters

លោកបន្តថា ក្នុងរយៈពេលប៉ុន្មានខែចុងក្រោយនេះ ដែលលោកដឹកនាំ Man Utd គឺជាបទពិសោធន៍ដ៏អស្ចារ្យ ដែលនេះគឺជាការងារដែលលោកស្រមៃជាយូរមកហើយ។ កាន់តែរំភើបទៀតនោះ គឺលោកមានឱកាសដឹកនាំក្លឹបក្នុងរយៈពេលវែង ហើយសង្ឃឹមថា នឹងនាំក្លឹបបន្តជ័យជម្នះដើម្បីអ្នកគាំទ្រ។

គួររំលឹកថា ក្នុងអំឡុងជាខ្សែប្រយុទ្ធក្លឹបបិសាចក្រហមនេះ ពីឆ្នាំ១៩៩៦ ដល់ ២០០៧ Solskjaer រកបាន ១២៦គ្រាប់ ក្នុងការបង្ហាញខ្លួនចំនួន ៣៦៦ដង៕

ប្រភព៖ manutd ប្រែសម្រួល៖ សំភី