រោងចក្រទឹកស្អាត តម្លៃជិត ៣០លានដុល្លារ នៅខេត្តកំពត នឹងត្រូវបើកសម្ពោធនាដើមខែក្រោយ
- 2019-03-29 02:24:28
- ចំនួនមតិ 0 | ចំនួនចែករំលែក 0
រោងចក្រទឹកស្អាត តម្លៃជិត ៣០លានដុល្លារ នៅខេត្តកំពត នឹងត្រូវបើកសម្ពោធនាដើមខែក្រោយ
ចន្លោះមិនឃើញ
រោងចក្រទឹកស្អាតថ្មី ដែលជាជំនួយរបស់រដ្ឋាភិបាលជប៉ុន តម្លៃជាង២៦លានដុល្លារ និងមានសមត្ថភាពផលិតទឹកបាន៧៥០០ម៉ែត្រគូបក្នុងមួយថ្ងៃ នឹងត្រូវសម្ពោធដាក់ឱ្យដំណើរការជាផ្លូវការនៅថ្ងៃទី២ខែមេសាឆ្នាំ២០១៩ក្រោមអធិបតីភាពសម្តេចនាយករដ្ឋមន្ត្រី ហ៊ុន សែន។ រោងចក្រនេះ មានទីតាំងស្ថិតនៅភូមិអូរតូច សង្កាត់កំពង់បាយ ក្រុងកំពត ខេត្តកំពត។ នេះបើតាមលោក ទី គាន ប្រធានអង្គភាពរដ្ឋាករទឹកខេត្តកំពត បានថ្លែងប្រាប់អ្នកកាសែតក្នុងកម្មវិធីទស្សនកិច្ចអ្នកសារព័ត៌មានលើគម្រោងហិរញ្ញប្បទានអភិវឌ្ឍផ្លូវការ(ODA)កាលពីរសៀលថ្ងៃទី២៨ខែ មីនា ឆ្នាំ២០១៩។
ផែនការយុទ្ធសាស្ត្រអភិវឌ្ឍជាតិឆ្នាំ២០១៤ ដល់ ២០១៨ បានកំណត់ថាប្រជាជនកម្ពុជានឹងទទួលបានទឹកស្អាតប្រើប្រាស់១០០%នៅឆ្នាំ២០២៥។ រដ្ឋាករទឹកស្វយ័តខេត្តកំពតបានជួបបញ្ហាប្រឈមជាច្រើនរួមមានសមត្ថភាពផលិតទឹកស្អាតអត្រាបាត់បង់ទឹកខ្ពស់គុណភាពទឹកមិនល្អដែលបណ្តាលមកពីបណ្តាញចែកចាយចាស់ខ្លាំងពេកដែលតម្រូវឲ្យមានការកែលម្អការផ្គត់ផ្គង់ទឹករបស់រដ្ឋាករទឹកស្វយ័តខេត្តជាបន្ទាន់។ជាមួយគម្រោងពង្រីកប្រព័ន្ធទឹកស្អាតនេះរោងចក្រផលិតទឹកថ្មីនឹងផលិតទឹកស្អាតបានល្អនិងធ្វើឲ្យបរិស្ថានរស់នៅរបស់ប្រជាពលរដ្ឋក្នុងក្រុងកំពតបានប្រសើរជាងមុន។
លោក ទី គាន បានឱ្យដឹងថា គម្រោងពង្រីកប្រព័ន្ធទឹកស្អាតនេះជាជំនួយហិរញ្ញប្បទានឥតសំណងរបស់រដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការជប៉ុនចៃកា(JICA)។ គម្រោងនេះត្រូវបានសិក្សាតាំងពីឆ្នាំ២០១២ ហើយចូលផ្លូវការនាឆ្នាំ២០១៥។ ដំណើរការសាងសង់នៅឆ្នាំ២០១៥ និងស្ថាបនារួចនៅខែសីហា ឆ្នាំ២០១៦។
លោកបន្តថា គម្រោងពង្រីកប្រព័ន្ធទឹកស្អាតនេះ រួមមាន៖ ការសាងសង់រោងចក្រផលិតទឹកស្អាតដែលមានសមត្ថភាពផលិត ៧៥០០ម៉ែត្រគូបក្នុង១ថ្ងៃ, រោងចក្របូមទឹកឆៅដែលមានសមត្ថភាពផលិត៨២៥០ម៉ែត្រគូបក្នុង១ថ្ងៃ,ពង្រីកបណ្តាញចែកចាយទុយោ ៨៨,៩គីឡូម៉ែត្រក្នុងតំបន់សេវាផ្គត់ផ្គង់ទឹកខេត្តកំពតដែលមានប្រជាជន១៣១៣៥គ្រួសារមកពី៥សង្កាត់៦ឃុំ,សាងសង់បណ្តាញបញ្ជូនទឹកឆៅទៅកាន់រោងចក្រប្រព្រឹត្តិកម្មទឹក ៥,២គីឡូម៉ែត្រសាងសង់អគាររដ្ឋបាលនិងអគារចាំបាច់ និង ផ្សេងៗគម្រោងនេះ ក៏បានជួយការតបណ្តាញទឹកចូលផ្ទះប្រជាពលរដ្ឋក្រីក្រចំនួន៩០០គ្រួសារ។
លោកប្រធានអង្គភាពរដ្ឋាករទឹកខេត្តកំពត បានគូសបញ្ជាក់ថា៖ ក្រោយគម្រោងបានបញ្ចប់មានពលរដ្ឋ៨៨១៤គ្រួសារស្មើនឹង៦៧ភាគរយ បានទទួលបានទឹកស្អាតប្រើប្រាស់ហើយនៅឆ្នាំ២០២៣ យើងសង្ឃឹមថានឹងអាចផ្គត់ផ្គង់យ៉ាងហោចណាស់៩០ភាគរយនៃតំបន់សេវាផ្គត់ផ្គង់ទឹក។ ក្រោយគម្រោងនេះដាក់ឱ្យដំណើរការបានជួយប្រជាជនដែលអត់បណ្តាញប្រើប្រាស់បានមកសម្រុកដាក់ពាក្យតបណ្តាញ ដែលរហូតមកដល់ពេលនេះមានប្រជាជនជាង២០០០គ្រួសារមកតបណ្តាញ។
លោក ទី គាន បានបន្តថា៖ មុនគម្រោងដំណើរការឬមុនពេលរោងចក្រថ្មីចាប់ដំណើរការ ខេត្តកំពតជួបប្រទះបញ្ហាខ្វះទឹកខ្លាំងសម្ពាធទឹកចុងបខ្សោយឬអត់ចេញហើយផ្គត់ផ្គង់ទឹកបានតែ៦ពាន់ម៉ែត្រគូបក្នុងមួយថ្ងៃ។តែឥឡូវអាចផលិត៧៥០០ម៉ែត្រគូបក្នុង១ថ្ងៃ។សព្វថ្ងៃផ្គត់ផ្គង់បាន១០០០ម៉ែត្រគូបក្នុង១ថ្ងៃហើយសរុបទាំងរោងចក្រថ្មីនិងរោងចក្រចាស់អាចផលិតបាន១៣០០០គូបក្នុង១ថ្ងៃនិងផ្គត់ផ្គង់១ម៉ឺនម៉ែត្រគូបក្នុង១ថ្ងៃ។
យោងតាមចៃកាបានឱ្យដឹងថា៖ លទ្ធផលនៃគម្រោងនេះនឹងបង្កើនការទទួលបានទឹកស្អាតប្រើប្រាស់និងកែលម្អសេវាផ្គត់ផ្គង់ទឹកស្អាត, អត្រាផ្តល់សេវាផ្គត់ផ្គង់ទឹកស្អាតក្នុងតំបន់នឹងកើនពី ៤៧ភាគរយក្នុងឆ្នាំ២០១៣(មុនចាប់ផ្តើមគម្រោង) ដល់៩២ភាគរយក្នុងឆ្នាំ២០២១។
គិតត្រឹមឆ្នាំ២០២១ ចំនួនប្រជាជនដែលទទួលបានទឹកស្អាតប្រើប្រាស់ក្នុងក្រុងកំពតនឹងកើនឡើងពីចំនួន២៣ ៦៥៧នាក់(មុនចាប់ផ្តើមគម្រោង)ដល់៥៥ ៨៧៤នាក់។ សុខភាពសាធារណៈនិងអនាម័យផ្ទាល់ខ្លួននឹងត្រូវបានកែលម្អតាមរយៈការផ្លាស់ប្តូរទំលាប់ពីការប្រើប្រាស់ទឹកភ្លៀងនិងទឹកអណ្តូងមកប្រើប្រាស់ទឹកស្អាតដែលផ្គត់ផ្គង់ដោយរដ្ឋាករទឹក៕
រូបថត៖ រស្មីកម្ពុជា