ក្រសួងមហាផ្ទៃទទួលស្គាល់សមាជគណបក្សអំណាចខ្មែរ ប្ដូរឈ្មោះទៅជា គណបក្សខ្មែរឈ្នះ

2019-03-29 03:47:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងមហាផ្ទៃ បានទទួលស្គាល់សមាជវិសាមញ្ញរបស់គណបក្សអំណាចខ្មែរ កាលពីថ្ងៃទី១៥ ខែមីនា ឆ្នាំ២០១៩ ដោយអនុម័តក្នុងការប្ដូរឈ្មោះទៅជាគណបក្សខ្មែរឈ្នះ។ នេះបើយោងតាមលិខិតរបស់សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ផ្ញើជូនលោក សួង សុភ័ណ្ឌ ប្រធានគណបក្សអំណាចខ្មែរ កាលពីថ្ងៃទី២៦ ខែមីនា ឆ្នាំ២០១៩។

នៅក្នុងលិខិតរបស់ក្រសួងមហាផ្ទៃ បានបញ្ជាក់ថា ក្រសួងមហាផ្ទៃទទួលស្គាល់ នូវលទ្ធផលសមាជវិសាមញ្ញរបស់គណបក្សអំណាចខ្មែរ ដែលបាន ប្រារព្ធធ្វើកាលពីថ្ងៃទី១៥ ខែមីនា ឆ្នាំ២០១៩ ដែលបានសម្រេចអនុម័តក្នុងការប្ដូរឈ្មោះគណបក្សអំណាចខ្មែរ មកជាគណបក្សខ្មែរឈ្នះ និងការធ្វើវិសោធនកម្មរបស់គណបក្សនោះហើយ។

សូមជម្រាបថា គណបក្សអំណាចខ្មែរ បានធ្វើសមាជកាលពីទី១៥ ខែមីនា ឆ្នាំ២០១៩ ដើម្បីប្តូរឈ្មោះគណបក្ស។ ការប្តូរឈ្មោះគណបក្សនេះ គឺបន្ទាប់ពីក្រសួងមហាផ្ទៃ បានឲ្យគណបក្សអំណាចខ្មែរ ប្តូរឈ្មោះ ដោយសារតែមានការប្តឹងជំទាស់ពីអតីតសមាជិកស្ថាបនិក និងអតីតថ្នាក់ដឹកនាំជាន់ខ្ពស់គណបក្សអំណាចខ្មែរ។

គួរបញ្ជាក់ថា កាលពីថ្ងៃទី២៦ ខែកុម្ភៈ ឆ្នាំ២០១៩ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានធ្វើលិខិតជម្រាបទៅលោកសួង សុភ័ណ្ឌ ប្រធានគណបក្សអំណាចខ្មែរ ធ្វើការពិនិត្យ និងសម្រេចប្តូរឈ្មោះ គណបក្សអំណាចខ្មែរ ឡើងវិញ ដោយសារតែក្រសួងមហាផ្ទៃបានទទួលនូវលិខិតរបស់អតីតសមាជិកស្ថាបនិក និងអតីតថ្នាក់ដឹកនាំជាន់ខ្ពស់គណបក្សអំណាចខ្មែរ ដែលបានសំណូលមពរមកក្រសួងមហាផ្ទៃ ធ្វើការហាមឃាត់បុគ្គល ឬក្រុមផ្សេងៗទៀត ដែលមិនមែនជាស្ថាបនិកគណបក្សអំណាចខ្មែរ បន្តប្រើប្រាស់ឈ្មោះគណបក្ស ដោយផ្អែកតាមច្បាប់ស្តីពីគណបក្សនយោបាយ និងលក្ខន្តិកៈ របស់គណបក្សអំណាចខ្មែរ ដែលបានតម្កល់ទុកនៅក្រសួងមហាផ្ទៃមាពេលកន្លងមក៕

អត្ថបទ៖ សោភា