សម្តេច ហ៊ុន សែន ប្រកាសថា ចាប់ពីឆ្នាំ២០២០ទៅ ថ្ងៃឈប់សម្រាកនឹងត្រូវកាត់បន្ថយ ៧ថ្ងៃវិញ

2019-03-29 04:25:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានប្រកាសថា ចាប់ពីឆ្នាំ២០២០ទៅ ថ្ងៃឈប់សម្រាកនឹងត្រូវកាត់បន្ថយចំនួន ៧ថ្ងៃវិញ ដើម្បីលើកទឹកចិត្តដល់អ្នកវិនិយោគ និងជំរុញកំណើនសេដ្ឋកិច្ច។ ការប្រកាសនេះ ធ្វើឡើងក្នុងវេទិការាជរដ្ឋាភិបាល-ផ្នែកឯកជនលើកទី១៨ នៅវិមានសន្តិភាព នាព្រឹកថ្ងៃទី២៩ ខែមីនា ឆ្នាំ២០១៩។

សម្តេច ហ៊ុន សែន ថ្លែងនាពេលកន្លងមក

សម្តេចបញ្ជាក់ថា ការកាត់បន្ថយថ្ងៃឈប់សម្រាកនេះ មិនមែនមានន័យថា ពិធីបុណ្យ ឬការប្រារព្ធទិវា ដែលតែងតែធ្វើឡើងជារៀងរាល់ឆ្នាំនោះ ត្រូវលុបចោលវិញនោះទេ។ សម្តេចក៏បានឱ្យដឹងបន្ថែមដែរថា ពិធីបុណ្យចូលឆ្នាំខ្មែរ បុណ្យភ្ជុំបិណ្ឌ និងបុណ្យអុំទូក គឺត្រូវរក្សាទុក ថ្ងៃឈប់សម្រាកចំនួន៣ថ្ងៃដដែល។ ដោយឡែកបុណ្យចម្រើនព្រះជន្ម ដែលតែងតែឈប់សម្រាក ៣ថ្ងៃ គឺត្រូវកាត់បន្ថយ ២ថ្ងៃ ដោយឈប់តែ១ថ្ងៃប៉ុណ្ណោះ គឺនៅថ្ងៃទី១៤ ខែឧសភា ដែលជាថ្ងៃព្រះមហាក្សត្រប្រសូត្រ។

សម្តេចបានលើកឡើងសារជាថ្មីដែរថា កម្ពុជា ជាប្រទេសក្រីក្រ ប៉ុន្តែមានថ្ងៃឈប់សម្រាកច្រើនជាងប្រទេសអ្នកមានទៅទៀត។

ជាមួយគ្នានោះ ប្រមុខរាជរដ្ឋាភិបាល ក៏បានស្នើសុំការយោគយល់ពីមន្រ្តីរាជការ និងកម្មករផងដែរ ចំពោះការកាត់បន្ថយថ្ងៃឈប់សម្រាកនេះផងដែរ។

ទន្ទឹមនឹងការប្រកាសខាងលើនេះដែរ សម្តេចតេជោ ក៏បានផ្តល់អនុសាសន៍ណែនាំដល់កម្មករ-និយោជិតថា គួរកុំឈប់នៅថ្ងៃបុណ្យឈប់សម្រាកដែលមានតែ១ថ្ងៃ ពោលគឺត្រូវសន្សំទុកឈប់សរុប នៅថ្ងៃបុណ្យធំៗដូចជា បុណ្យចូលឆ្នាំខ្មែរ និងបុណ្យភ្ជុំបិណ្ឌជាដើម ដើម្បីអាចទៅលេងស្រុកកំណើតបានយូរថ្ងៃ។

យោងតាមអនុក្រឹត្យ ស្តីពីប្រតិទិនឈប់សម្រាកការងាររបស់មន្ត្រីរាជការ និយោជិត កម្មករ ប្រចាំឆ្នាំ២០១៩ ចុះថ្ងៃទី៤ខែតុលា ឆ្នាំ២០១៨ បានឲ្យដឹងថា ថ្ងៃឈប់សម្រាកការងារ ក្នុងឆ្នាំ២០១៩នេះ មានចំនួន ២៨ថ្ងៃ៕

អត្ថបទ៖ សំភី