iPhone នៅចិន នៅតែថ្លៃជាងទូរសព្ទគូប្រជែង ទោះ Apple ព្រមទម្លាក់ថ្លៃ

2019-04-04 01:47:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ឆ្លើយតបនឹងគោលនយោបាយកាត់បន្ថយពន្ធក្នុងទីផ្សារប្រទេសចិន ក្រុមហ៊ុន Apple ក៏សម្រេចទម្លាក់ថ្លៃទូរសព្ទ iPhone របស់ខ្លួន ដោយគិតមកទល់សព្វថ្ងៃមានការថយចុះជាងមុនប្រមាណ ៧៥ ដុល្លារសម្រាប់សេរ៊ីក្រោយ iPhone XR, iPhone XS និង iPhone XS Max។ ត្បិតអីជាការបន្ធូរបន្ថយ ប៉ុន្តែបើធៀបនឹងគូប្រជែងក្នុងស្រុកតម្លៃទូរសព្ទរបស់ក្រុមហ៊ុនយក្សអាមេរិក នៅតែខ្ពស់ជាងគេដាច់ឆ្ងាយដដែល។

អតិថិជនកំពុងមើលទូរសព្ទ iPhone ក្នុងហាង Apple មួយកន្លែងនៅចិន (រូបភាពផ្ដល់សិទ្ធិដោយ Reuters)

ហាងឆេងចុងក្រោយក្នុងទីផ្សារចិន iPhone XS តម្លៃ **៨ ១៩៩ យាន់ឬជាង ១ ២០០ ដុល្លារ** ធៀបនឹង Mate 20 Pro ប្រភេទ RAM 8GB និង ROM 256GB ដែលជាជំនាន់ក្រោយផុតលេខរបស់ Huawei ថ្លៃត្រឹម **៦ ២៩៩ យាន់ឬក្បែរ ៩៥០ ដុល្លារ** ។ ទោះបីតម្លៃ P30 Pro ដែលទើបបង្ហាញខ្លួនមិនទាន់បញ្ជាក់មែនពិត ក៏គេរំពឹងថានឹងមិនឡើងខ្ពស់ជាង Mate 20 Pro ប៉ុន្មាននោះដែរ។

Huawei ទូរសព្ទគូប្រជែងរបស់ iPhone នៅចិន

សញ្ញាអវិជ្ជមានសម្រាប់ផ្លែប៉ោមក្នុងទីផ្សារចិន ទំនងជាមិនអាចបញ្ចប់ត្រឹមនេះទេ ដោយយោងតាមរបាយការណ៍ពី MyDrivers កន្លងទៅបានចុះផ្សាយថា Huawei លក់ដាច់ Mate 20 បានច្រើន ជាង ១០ លានគ្រឿងត្រឹមរយៈពេល ៤ ខែកន្លះ ដែលជាកំណត់ត្រាផ្តួលសេរ៊ីចាស់ Mate 10 ទៀតផង ហើយក្នុងនោះអតិថិជនភាគច្រើនមានវ័យក្រោម ៣៥ ឆ្នាំ៕

ប្រភព៖ GSMarena ប្រែសម្រួល៖ កៅ រក្សា