សង្រ្កានឆ្នាំនេះ ថៃលុបចោលកម្មវិធីបាញ់ទឹកលើផ្លូវល្បីមួយនៅបាងកក

2019-04-05 02:48:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្មវិធីសង្រ្កាននៅបាងកក ប្រទេសថៃឆ្នាំនេះ នឹងមានលក្ខណៈតូចជាងមុន ដោយសារចំពេលដែលប្រទេសនេះ កំពុងរៀបចំកម្មវិធីឡើងគ្រងរាជសម្បតិ្តជាផ្លូវការរបស់ព្រះមហាក្សត្រថៃ។

ជារៀងរាល់ឆ្នាំ ថៃតែងប្រារព្ធកម្មវិធីសង្រ្កានចូលឆ្នាំថ្មី ពីថ្ងៃទី១៣ ដល់ទី១៥ ខែមេសា ដោយមានមនុស្សម្នាចូលរួមបាញ់ទឹកលេងកម្សាន្តយ៉ាងកកកុញនៅបាងកក ជាពិសេសគឺនៅផ្លូវ Khaosan Road។

កម្មវិធីបាញ់ទឹកលេងកម្សាន្ត អំឡុងថ្ងៃសង្រ្កានកាលពីឆ្នាំមុន នៅបាងកក (រូបភាពផ្ដល់សិទ្ធិដោយ Reuters)

យ៉ាងណាក្ដី ដោយសារពិធីអភិសេកឡើងគ្រងរាជសម្បត្តិរបស់ព្រះមហាក្សត្រ Maha Vajiralongkorn នឹងធ្វើឡើងពីថ្ងៃទី៤ ដល់ទី ៦ ខែឧសភា ទើបកម្មវិធីបាញ់ទឹកនៅផ្លូវ Khaosan ត្រូវលុបចោលនៅឆ្នាំនេះ។

លោក Piyabutr Jiwaramonaikun ប្រធានសមាគមអាជីវកម្មប្រចាំផ្លូវ Khaosan បាននិយាយថា៖ "អាជ្ញាធរកំពុងរៀបចំកម្មវិធីឡើងគ្រងរាជសម្បត្តិ ដែលស្ថិតនៅចំកណ្ដាលនៃតំបន់ផ្លូវ Khaosan នេះតែម្ដង ដូច្នេះបើយើងរៀបចំកម្មវិធីសង្រ្កានដូចរាល់ឆ្នាំ វានឹងបង្កភាពរញ៉េរញ៉ៃ"។

រូបភាពផ្ដល់សិទ្ធិដោយ Reuters

លោកបន្ថែមថា ហាងនានានឹងនៅតែបើកលក់ជាធម្មតា តែមិនមានកម្មវិធីផ្ដល់ទឹក និងម្សៅប៉ាតដោយសេរីដល់សាធារណជននោះទេ។

លោក Piyabutr បានបញ្ជាក់ជាចុងក្រោយថា ព្រះរាជពិធីឡើងគ្រងរាជសម្បត្តិរបស់ព្រះមហាក្សត្រថៃ ជាព្រឹត្តិការណ៍ធំបំផុតសម្រាប់ប្រជាជនថៃ នាឆ្នាំ២០១៩ ដូច្នេះអ្នករកស៊ី និងប្រជាជនគ្រប់គ្នាសុខចិត្តលះបង់៕