កូរ៉េខាងត្បូង កំពុងតស៊ូនឹងគ្រោះធម្មជាតិភ្លើងឆេះព្រៃដ៏អាក្រក់បំផុត
- 2019-04-05 08:21:53
- ចំនួនមតិ 0 | ចំនួនចែករំលែក 0
កូរ៉េខាងត្បូង កំពុងតស៊ូនឹងគ្រោះធម្មជាតិភ្លើងឆេះព្រៃដ៏អាក្រក់បំផុត
ចន្លោះមិនឃើញ
ប្រទេសកូរ៉េខាងត្បូង នាថ្ងៃទី៥ ខែមេសានេះ បាននឹងកំពុងជួបហេតុការណ៍គ្រោះធម្មជាតិដ៏អាក្រក់បំផុត គឺភ្លើងឆេះព្រៃ ដែលបានរាលដាលដល់ទីក្រុងនៅតាមបណ្តោយឆ្នេរសមុទ្រភាគខាងកើត ហើយប្រកាសដាក់រដ្ឋក្នុងគ្រោះមានអាសន្នទៀតផង។ នេះបើតាមការចុះផ្សាយរបស់ Yonhap News។
មន្រ្តីសង្គ្រោះប្រមាណ ១៣០០០នាក់ នៅទូទាំងប្រទេស បានព្យាយាមពន្លត់ភ្លើងឆេះព្រៃនេះ ដែលវាចាប់ផ្តើមកើតឡើងនៅស្រុក Goseong ជាតំបន់ភ្នំ ស្ថិតនៅប៉ែកឦសានចម្ងាយ ១៦០គីឡូម៉ែត្រពីក្រុងសេអ៊ូល ហើយបានរាលដាលទៅកាន់ក្រុងដទៃទៀតជាបន្តបន្ទាប់។
បុរសម្នាក់បានស្លាប់ និង៣៥នាក់រងរបួស នៅក្នុងហេតុការណ៍នេះ ខណៈដែលមនុស្សរាប់ពាន់នាក់ បានចាកចេញពីទីលំនៅរបស់ខ្លួន។
ប្រធានាធិបតីកូរ៉េខាងត្បូង លោក ម៉ូន ចេអ៊ីន បានជំរុញឱ្យរដ្ឋាភិបាលរបស់លោក បង្កើតនូវកិច្ចប្រឹងប្រែងទាំងអស់ ដើម្បីពន្លត់អគ្គិភ័យនេះ ហើយជួយជនរងគ្រោះ។ ជាមួយគ្នានោះ លោកបានប្រាប់មន្រ្តីឱ្យបង្កើតតំបន់ដែលទទួលរងគ្រោះនេះ ជាតំបន់គ្រោះមហន្តរាយពិសេស ដែលនឹងជួយដល់ការផ្តល់ជំនួយនានាទៅកាន់ប្រជាជន។
ខណៈដែលភ្លើងឆេះព្រៃ បានកើតឡើងនៅជិតព្រំដែនកូរ៉េខាងជើង រដ្ឋាភិបាលកូរ៉េខាងត្បូង បញ្ជាក់ថា ខ្លួននឹងចែករំលែកព័ត៌មាននេះ ជាមួយកូរ៉េខាងជើង អំពីស្ថានភាពភ្លើងឆេះព្រៃ និងការសង្គ្រោះ ហើយថែមទាំងរកកិច្ចសហការទ្វេភាគីផងដែរ ប្រសិនបើចាំបាច់។
គិតត្រឹមព្រឹកម៉ោង ១១ព្រឹកថ្ងៃទី៥មេសា អគ្គិភ័យនេះ បានបំផ្លាញព្រៃឈើលើផ្ទៃដីប្រមាណ ៥២៥ហិកតា និងបំផ្លាញផ្ទះប្រមាណ និងអគារប្រមាណ ២០០៕
រូបថត៖ ផ្តល់សិទ្ធិដោយ Reuters