ថៃ រៀបចំការបោះឆ្នោតឡើងវិញនៅក្រុងបាងកក និងខេត្ត៤ផ្សេងទៀត
- 2019-04-05 09:12:21
- ចំនួនមតិ 0 | ចំនួនចែករំលែក 0
ថៃ រៀបចំការបោះឆ្នោតឡើងវិញនៅក្រុងបាងកក និងខេត្ត៤ផ្សេងទៀត
ចន្លោះមិនឃើញ
គណៈកម្មការរៀបចំការបោះឆ្នោតថៃ បានបញ្ជាឱ្យរៀបចំការបោះឆ្នោតឡើងវិញ នៅមណ្ឌលបោះឆ្នោតចំនួន៦កន្លែង ក្នុងក្រុងបាងកក និងខេត្ត៤ទៀតរួមមាន Lampang, Phetchabun, Phitsanulok និង Yasothon doy បន្ទាប់ពីរកឃើញថា ចំនួនអ្នកបោះឆ្នោត មិនស៊ីគ្នាជាមួយចំនួនសន្លឹកឆ្នោតដែលគូស ក្នុងប្រអប់ឆ្នោត ក្នុងមណ្ឌលបោះឆ្នោតទាំងនេះ។
ការសម្រេចចិត្តឱ្យបោះឆ្នោត និងរាប់សន្លឹកឆ្នោតខាងលើនេះ គឺបន្ទាប់ពីមានកិច្ចប្រជុំគណៈកម្មការរៀបចំការបោះឆ្នោត កាលពីថ្ងៃទី៤ ខែមេសា ឆ្នាំ២០១៩។ នេះបើតាមការបញ្ជាក់របស់លោក Sawaeng Boonmee អគ្គលេខាធិការរងនៃគណៈកម្មការរៀបចំការបោះឆ្នោតថៃ។
លោកបានថ្លែងថា កាលបរិច្ឆេទនៃការបោះឆ្នោតឡើងវិញនៅក្នុងមណ្ឌលទាំង៦កន្លែង នឹងធ្វើឡើងបន្ទាប់ពីថ្ងៃសង្ក្រាន្ត។
ការបោះឆ្នោត និងរាប់សន្លឹកឆ្នោតឡើងវិញនេះ គឺមានការពាក់ព័ន្ធនឹងចំនួនសន្លឹកឆ្នោតដែលកំពុងប្រដេញគ្នារវាងគណបក្សធំៗផងដែរ។ យោងតាមលទ្ធផលបណ្តោះអាសន្នរបស់គណៈកម្មការរៀបចំការបោះឆ្នោតថៃ លោក Thitipat Chotedechachainan ដែលជាបេក្ខជនគណបក្ស Palang Pracharath ប្រចាំក្រុងបាងកក បានឈ្នះសំឡេងឆ្នោត ដោយទទួលបាន ២៧ ៤៨៩សំឡេង តាមពីក្រោយដោយលោក Treerat Sirichantharophas បេក្ខជនគណបក្សភឿថៃ (Pheu Thai) ទទួលបាន ២៣ ៩១២សំឡេង និងទី៣ បានទៅលើលោក Nicha Boonlue បេក្ខជនគណបក្ស Future Forward ទទួលបាន ២៣ ៧០៧សំឡេង៕
រូបថត៖ ផ្តល់សិទ្ធិដោយ Reuters