ធនាគារអេស៊ីលីដា រំពឹងរកប្រាក់ចំណេញប្រមាណ១០០លានដុល្លារ នៅឆ្នាំ២០១៩នេះ

2019-04-09 02:01:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ធនាគារអេស៊ីលីដា បានរំពឹងថានឹងរកប្រាក់ចំណេញប្រមាណ១០០លានដុល្លារនៅឆ្នាំ២០១៩នេះ ដែលនឹងកើនឡើងលើសឆ្នាំ២០១៨ ដែលមានប្រមាណ៨៤លានដុល្លារអាមេរិក។ ការរំពឹងប្រាក់ចំណេញកើនឡើងខ្ពស់ជាងមុននេះ ដោយសារតែនៅដើមឆ្នាំ២០១៩នេះ ធនាគារអេស៊ីលីដា កត់សម្គាល់ឃើញពីកំណើនល្អខ្លាំងជាងឆ្នាំ២០១៨កន្លងទៅ។ នេះបើតាមការបញ្ជាក់របស់លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា នៅក្នុងពិធីពិធីជប់លៀងអបអរសាទរបុណ្យចូលឆ្នាំប្រពៃណីជាតិខ្មែរជូនបុគ្គលិកនិងអតិថិជនរបស់ខ្លួនកាលពីថ្ងៃទី៦ ខែមេសា ឆ្នាំ២០១៩ នៅទីស្នាក់ការកណ្តាលរបស់ខ្លួន។

លោកប្រធាននាយកប្រតិបត្តិធនាគារអេស៊ីលីដា បានឱ្យដឹងទៀតថា នៅឆ្នាំ២០១៨ កំណើនសេដ្ឋកិច្ចកម្ពុជាបានកើនខ្ពស់ខ្លាំង៧,៥ភាគរយ ហើយឆ្នាំ២០១៩នេះ រំពឹងថា នឹងនៅតែមានកំណើនជាង៧ភាគរយដដែល។ ក្នុងនោះ វិស័យធនាគារ ក៏មានសន្ទុះលូតលាស់ខ្លាំងដែរ ជាក់ស្ដែង នៅ៣ ខែដើមឆ្នាំនេះ ធនាគារអេស៊ីលីដា មានកំណើនប្រាក់ចំណូល និងទ្រព្យសកម្មខ្ពស់ជាងបីខែដើមឆ្នាំ២០១៨ ខ្លាំងគួរឲ្យចាប់អារម្មណ៍។ តាមការឆ្លុះបញ្ចាំងពីកំណើននៅដើមឆ្នាំនេះ ធនាគារអេស៊ីលីដា រំពឹងថា ប្រាក់ចំណេញរបស់ខ្លួន ពេញ១ឆ្នាំ២០១៩នេះ នឹងកើនឡើងដល់ ១០០លានដុល្លារអាមេរិក ខណៈឆ្នាំ២០១៨ មានត្រឹម៨៤លានដុល្លារអាមេរិក។

បើតាមលោកបណ្ឌិត អ៊ិន ចាន់នី បានគូសបញ្ជាក់ថា៖ ចំណូលធំៗ ដែលអេស៊ីលីដាទទួលបានសម្រាប់គាំទ្រដល់កំណើននៅរយៈពេល១ត្រីមាសឆ្នាំ២០១៩ គឺបានមកពីសេវាទូទៅ ពិសេស គឺសេវាអេស៊ីលីដា យូនីធីទាន់ចិត្ត ដែលបច្ចុប្បន្នមានអ្នកប្រើប្រាស់ប្រមាណ ១លាននាក់ និងចំណូលស្នូលដ៏សំខាន់មួយទៀតនោះ គឺបានមកពីសេវាឥណទាន។ ក្នុងនោះ ប្រាក់បញ្ញើអតិថិជនបានកើនឡើងជាង១៥ភាគរយ ដែលកើនឡើងទឹកប្រាក់សរុបដល់ប្រមាណ ជាង២២ពាន់លានដុល្លារអាមេរិក និងឥណទានបានកើនឡើងជិត១៩ភាគរយ ដែលមានទឹកប្រាក់សរុបដល់២៤,៥ពាន់លានដុល្លារ។ រីឯអ្នកផ្ញើប្រាក់នៅគ្រឹះស្ថានធនាគារ និងហិរញ្ញវត្ថុវិញ មានរហូតដល់៦លាន២សែនគណនីខណៈដែលអ្នកខ្ចីប្រាក់ មាន២លាន៦សែនគណនី៕

ប្រភព៖ រស្មីកម្ពុជា ប្រែសម្រួល៖ សំភី