កម្ពុជា ទទួលបានអគ្គិសនីជាង ៩,៦ពាន់លានគីឡូវ៉ាត់ម៉ោង ពីវារីអគ្គិសនី និងរោងចក្រដុតធ្យូងថ្ម

2019-04-09 08:21:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅក្នុងឆ្នាំ២០១៨កន្លងទៅ បរិមាណផ្គត់ផ្គង់ដោយវារីអគ្គិសនី និងរោងចក្រអគ្គិសនីដុតធ្យូងថ្ម ដែលជាប្រភពថាមពលផ្ទាល់របស់កម្ពុជា សម្រេចបានជាង ៩,៦ពាន់លានគីឡូវ៉ាត់ម៉ោង កើនឡើងប្រមាណ ២៤,៨៩% បើប្រៀបធៀបនឹងឆ្នាំ២០១៧។ នេះបើតាមខ្លឹមសារក្នុងសារលិខិតរបស់សម្តេចនាយករដ្ឋមន្រ្តី ហ៊ុន សែន ផ្ញើរទៅកាន់ប្រជាពលរដ្ឋខ្មែរ ក្នុងឱកាសបុណ្យចូលឆ្នាំខ្មែរ ចុះហត្ថលេខាកាលពីថ្ងៃទី៣ ខែមេសា ឆ្នាំ២០១៩។

រូបថត៖ ហ្វេសប៊ុកសម្តេច ហ៊ុន សែន

ក្នុងសារលិខិតនេះបញ្ជាក់ថា ការតភ្ជាប់ខ្សែបណ្តាញចរន្តឱ្យដល់ប្រជាពលរដ្ឋជាអ្នកប្រើប្រាស់ថាមពលអគ្គិសនីរហូតមកដល់ឆ្នាំ២០១៨នេះ ចំពោះគេហដ្ឋានប្រជាពលរដ្ឋសុទ្ធសាធ បានកើនដល់ប្រមាណ ២,៥៥លានខ្នងផ្ទះ ត្រូវជាប្រមាណ ៧២,១៦% នៃចំនួនផ្ទះសរុបប្រមាណ ៣,៣៨លានខ្នង និងគ្របដណ្តប់ដល់ភូមិប្រមាណ ៨៧% នៃចំនួនភូមិសរុប ១៤ ៣៨៣ភូមិ នៅទូទាំងប្រទេស។

កាលពីឆ្នាំមុននេះដែរ រាជរដ្ឋាភិបាលបានដាក់ឱ្យដំណើរការវារីអគ្គិសនីសេសានក្រោម២ មានអានុភាព ៤០០មេហ្គាវ៉ាត់ នៅស្រុកសេសាន ខេត្តស្ទឹងត្រែង។

កាលពីថ្ងៃទី៤ ខែមេសា ឆ្នាំ២០១៩កន្លងទៅ កម្ពុជា បានទទួលថាមពលអគ្គិសនីចំនួន ២០មេហ្គាវ៉ាត់ជាលើកដំបូង ចេញពីស្ថានីយអគ្គិសនីដើរដោយពន្លឺព្រះអាទិត្យ។ ស្ថានីយនេះ មានអនុភាព ៦០មេហ្គាវ៉ាត់ មានទីតាំងនៅតាមបណ្តោយផ្លូវជាតិលេខ៥១ ក្បែរសាលានាយទាហានសកម្មត្មាតពង ក្នុងស្រុកឧដុង្គ ខេត្តកំពង់ស្ពឺ។

ដោយឡែកនៅថ្ងៃទី៥ ខែមេសា ឆ្នាំ២០១៩ គណៈរដ្ឋមន្រ្តី បានសម្រេចលើគម្រោងសាងសង់ស្ថានីយវារីអគ្គិសនីស្ទឹងពោធិ៍សាត់១ នៅស្រុកវាលវែង ខេត្តពោធិ៍សាត់ មានអនុភាព៨០មេហ្គាវ៉ាត់ និងគម្រោងវិនិយោគស្ថានីយអគ្គិសនីដើរដោយពន្លឺព្រះអាទិត្យ ២កន្លែង ដោយ១កន្លែងនៅស្រុកក្រគរ ខេត្តពោធិ៍សាត់ មានអនុភាព ៦០មេហ្គាវ៉ាត និង១កន្លែងទៀតនៅស្រុកទឹកផុស ខេត្តកំពង់ឆ្នាំង មានអនុភាព ៦០មេហ្គាវ៉ាត់៕

អត្ថបទ៖ សំភី