យន្តហោះ F-35 របស់ជប៉ុន ធ្លាក់ក្នុងមហាសមុទ្រ ខណៈប្រទេសនេះ គ្រោងទិញបន្ថែម ៨៧គ្រឿងទៀត

2019-04-10 03:26:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមស្រាវជ្រាវ និងសង្គ្រោះ បានរកឃើញបំណែកយន្តហោះចម្បាំង F-35 មួយគ្រឿង ដែលបានបាត់ខ្លួនកាលពីថ្ងៃអង្គារម្សិលមិញ នៅមហាសមុទ្រប៉ាស៊ីហ្វិក ជិតភាគខាងជើងជប៉ុន។ នេះបើតាមអ្នកនាំពាក្យកងទ័ពស្វ័យការពារជើងអាកាសរបស់ជប៉ុន នៅថ្ងៃទី១០ ខែមេសា ឆ្នាំ២០១៩នេះ។

យ៉ាងណាមិញ អ្នកនាំពាក្យរូបនោះ បន្ថែមថា អាកាសយានិកនៃយន្តហោះនេះ នៅតែបន្តបាត់ខ្លួនរកមិនទាន់ឃើញនៅឡើយទេ។

យន្តហោះនេះ បានបាត់ខ្លួនចេញពីរ៉ាដា នៅពេលហោះហើរបានប្រមាណជាង ១៣៥គីឡូម៉ែត្រ ឆ្ពោះទៅភាគខាងកើតនៃមូលដ្ឋានទ័ពអាកាស Misawa ក្នុងខេត្ត Aomori កាលពីយប់ថ្ងៃទី៩ ខែមេសា។

រូបតំណាង (រូបថត៖ Reuters)

បើតាមកងទ័ពស្វ័យការពារជើងអាកាសជប៉ុន បានឱ្យដឹងថា យន្តហោះ F-35 ដែលធ្លាក់នេះ គឺទើបតែត្រូវបានប្រើប្រាស់មិនទាន់បាន១ឆ្នាំផង ពោលគឺត្រូវបានដាក់ចូលក្នុងជួរកងទ័ពកាលពីខែឧសភា ឆ្នាំ២០១៨។ នេះជាយន្តហោះដំបូង ដែលត្រូវបានដាក់ឱ្យប្រតិបត្តិការនៅក្នុងមូលដ្ឋានទ័ព Misawa ខណៈដែលរដ្ឋាភិបាលជប៉ុន គ្រោងទិញយន្តហោះ F-35 នេះពីអាមេរិកចំនួន៨៧គ្រឿងថែមទៀត ដើម្បីធ្វើទំនើបកម្មក្នុងជួរកងទ័ពអាកាសរបស់ខ្លួន ដើម្បីទប់ទល់នឹងអំណាចយោធារបស់ចិន ដែលកំពុងកើនឡើងខ្លាំង។

ការធ្លាក់យន្តហោះ F-35 នេះ គឺជាឧបទ្ទវហេតុលើកទី២ បន្ទាប់ពីយន្តហោះប្រភេទនេះ ចាប់ផ្តើមហោះហើរជិត ២ទស្សវត្សកន្លងទៅ។ វាក៏ជាការធ្លាក់លើកទី១ផងដែរ របស់យន្តហោះ F-35 ជំនាន់ទី៥ ដែលត្រូវបានផលិតឡើងក្នុងការវាយលុកប្រព័ន្ធការពាររបស់សត្រូវ ពោលគឺវាអាចគេចចេញពីរ៉ាដារបស់សត្រូវបាន៕

ប្រភព៖ Reuters ប្រែសម្រួល៖ សំភី