ឆេះផ្សារ Central World កណ្តាលក្រុងបាងកក ស្លាប់និងរបួស ១៧នាក់

2019-04-11 01:31:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យ៉ាងហោចណាស់មនុស្ស២នាក់បានស្លាប់ និង១៥នាក់របួស ក្នុងហេតុការណ៍ឆេះផ្សារទំនើប Central World នៅកណ្តាលក្រុងបាងកក ប្រទេសថៃ កាលពីល្ងាចថ្ងៃទី១០ ខែមេសា ឆ្នាំ២០១៩។ ក្នុងចំណោមជនរងគ្រោះ គឺបានលោតចេញពីជាន់ទី៨នៃផ្សារ ដែលជាកន្លែងចាប់ផ្តើមកើតមានអគ្គិភ័យនេះ។

រូបថត៖ ប៉ូលិសថៃ

លោក Aswin Kwangumang អភិបាលក្រុងបាងកក បាននិយាយថា ភ្លើងបានចាប់ផ្តើមឆេះក្នុងបន្ទប់ដាក់ឯកសារនៅជាន់ទី៨ នៃផ្សារទំនើបដែលមានកម្ពស់ ១៦ជាន់នេះ។ អាជ្ញាធរបានបិទផ្សារនេះ ដើម្បីបើកការស៊ើបអង្កេតរកមូលហេតុនៃអគ្គិភ័យ ដែលចាប់ផ្តើមធ្វើឡើងនៅថ្ងៃព្រហស្បតិ៍នេះ។

លោកបញ្ជាក់ថា អគារផ្សារទំនើបនេះ នឹងត្រូវបិទរហូតទាល់តែមានការបញ្ជាក់សុវត្ថិភាពពីអាជ្ញាធរ។

បើតាមទំព័រហ្វេសប៊ុករបស់ Central World បានឱ្យដឹងថា អគ្គិភ័យនេះ ត្រូវបានគ្រប់គ្រងទាំងស្រុងប្រហែល ៣០នាទីក្រោយវាបានចាប់ផ្តើមកើតឡើង។

ផ្សារទំនើប Central World ត្រូវបានគេចាត់ទុកថា ជាគោលដៅទេសចរទំនិញដ៏ធំបំផុតនៅក្រុងបាងកក ហើយក៏ជាផ្សារដ៏ធំបំផុតលំដាប់ទី១១ ក្នុងពិភពលោកផងដែរ៕

ប្រភព៖ Bangkokpost ប្រែសម្រួល៖ សំភី