កម្ពុជា ស្នើឱ្យកេនយ៉ា មកបណ្តាក់ទុនលើវិស័យកសិកម្ម ឧស្សាហកម្ម ទេសចរណ៍ និងដឹកជញ្ជូន

2019-04-12 06:56:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មន្រ្តីជាន់ខ្ពស់កម្ពុជា បានស្នើឱ្យប្រតិភូកេនយ៉ា ជួយកៀងគរធុរជនរបស់ខ្លួន ចូលមកបណ្តាក់ទុនលើវិស័យសំខាន់ៗមានដូចជា៖ កសិកម្ម និងកសិ-ឧស្សាហកម្ម, ឧស្សាហកម្មកែច្នៃផលិតផលម្ហូបអាហារ, ទេសចរណ៍ និងបដិសណ្ឋារកិច្ច, ការដឹកជញ្ជូន និងឡូជីស្ទិក, បច្ចេកវិទ្យាព័ត៌មាន, រ៉ែ និងថាមពល, ការអប់រំ និងបណ្តុះបណ្តាលធនធានមនុស្សជាដើម។

សំណើខាងលើនេះ ធ្វើឡើងដោយលោក ថៅ សុខមុនី អនុរដ្ឋលេខាធិការក្រសួងពាណិជ្ជកម្ម និងលោក សួន វិជ្ជា ប្រធាន TTRI ក្នុងកិច្ចប្រជុំជាមួយប្រតិភូមកពីមហាវិទ្យាល័យការពារជាតិកេនយ៉ា ដែលជាប្រទេសធំមួយនៅក្នុងទ្វីបអាហ្វ្រិក ដឹកនាំដោយលោកឧត្តមសេនីយ៍ A.K Ikenye កាលពីរសៀលថ្ងៃទី៩ ខែមេសា ឆ្នាំ២០១៩។

មន្រ្តីទាំង២រូប បានជម្រាបគណៈប្រតិភូអំពីយុទ្ធសាស្ត្រចតុកោណរបស់រាជរដ្ឋាភិបាល និងយុទ្ធសាស្ត្រសមាហរណកម្មពាណិជ្ជកម្មកម្ពុជា (CTIS) ព្រមទាំងកិច្ចប្រឹងប្រែងរបស់ក្រសួង ក្នុងការលើកកម្ពស់បរិយាកាសធុរកិច្ច និងកិច្ចសម្រួលពាណិជ្ជកម្មនៅកម្ពុជា។

ក្រៅពីនេះ មន្រ្តីកម្ពុជា ក៏បានលើកឡើងអំពីកំណើនសេដ្ឋកិច្ច និងសក្តានុពលនៃទីតាំងភូមិសាស្ត្រប្រទេសកម្ពុជា, កាលានុវត្តភាពធុរកិច្ច, គោលនយោបាយវិនិយោគ និងគោលការណ៍លើកទឹកចិត្តផ្សេងៗ ផ្តល់ជូនដោយរាជរដ្ឋាភិបាល, តំបន់សេដ្ឋកិច្ចពិសេស និងគម្រោង Plus One, ស្ថិរភាពរូបិយបណ្ណជាតិ ព្រមទាំងភាពអនុគ្រោះពន្ធ (EBA និងMFN/GSP) លើនាំការចូលទំនិញ ដែលកម្ពុជាទទួលបានពីប្រទេសជាដៃគូចំនួន ៣២ នៅក្នុងពិភពលោក។

ជាការឆ្លើយតប លោកឧត្តមសេនីយ៍ A.K Ikenye និងប្រតិភូ បានថ្លែងអំណរគុណមន្ត្រីកម្ពុជា ដែលបានចែករំលែកនូវព័ត៌មានសំខាន់ៗ ស្តីពីបទពិសោធន៍របស់កម្ពុជា លើការអភិវឌ្ឍវិស័យសេដ្ឋកិច្ច និងពាណិជ្ជកម្ម ព្រមទាំងកាលានុវត្តភាពធុរកិច្ច និងវិនិយោគនៅក្នុងប្រទេសកម្ពុជា។ ប្រតិភូកេនយ៉ា បានបង្ហាញជំនឿថា តាមរយៈដំណើរទស្សនកិច្ចមកកម្ពុជាលើកនេះ នឹងជួយពង្រឹងទំនាក់ទំនងពាណិជ្ជកម្ម និងសេដ្ឋកិច្ច រវាងប្រទេសទាំងពីរ ឱ្យកាន់ស្អិតរមួតថែមទៀត៕