អ៊ីស្រាអែល គ្រោងទារសំណង ២៥០ពាន់លានដុល្លារ ពីប្រទេសដែលបង្ខំឱ្យជនជាតិជ្វិសចាកចេញ

2019-04-13 01:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសអ៊ីស្រាអែល កំពុងរៀបចំការទាមទារសំណងជំងឺចិត្តសរុប ២៥០ពាន់លានដុល្លារ ពីប្រទេសចំនួន៨ ដែលបានបង្ខំឱ្យជនជាតិជ្វិស ចាកចេញពីប្រទេសទាំងនេះ ក្រោយការបង្កើតរដ្ឋអ៊ីស្រាអ៊ែល នៅឆ្នាំ១៩៤៨។ ប្រទេសទាំង៨នោះរួមមាន ម៉ារ៉ុក, អ៊ីរ៉ាក់, ស៊ីរី, អេហ្ស៊ីប, យេមែន, ទុយណេស៊ី, លីប៊ី និងអ៊ីរ៉ង់។

ជនជាតិជ្វិសនៅយេមែន ដែលត្រៀមជម្លៀសទៅកាន់អ៊ីស្រាអែល ក្នុងឆ្នាំ១៩៤៩

លោក Gila Gamliel រដ្ឋមន្រ្តីក្រសួងសមធម៌សង្គមនៃប្រទេសអ៊ីស្រាអែល បាននិយាយកាលពីពេលថ្មីៗនេះថា ពេលវេលាបានមកដល់ហើយ ក្នុងការកែតម្រូវភាពអយុត្តិធម៌ក្នុងប្រវត្តិសាស្រ្តនៃកម្មវិធី (ប្រឆាំងនឹងជ្វិស) នៅក្នុងប្រទេសអារ៉ាប់ទាំង៧ និងអ៊ីរ៉ង ហើយស្តារឡើងវិញនូវសិទ្ធិស្របច្បាប់របស់ប្រជាជនជ្វិសរាប់ម៉ឺននាក់ ដែលបានបាត់បង់ទ្រព្យសម្បត្តិរបស់ពួកគេ។

បើតាមតួលេខដែលចុះផ្សាយតាមទូរទស្សន៍អ៊ីស្រាអែល Hadashot TV ឱ្យដឹងថា ការទាមទារសំណងនោះ នឹងធ្វើឡើងចំពោះប្រទេស២មុនគេ គឺ ទុយណេស៊ី ប្រមាណ ៣៥ពាន់លានដុល្លារ និងលីប៊ី ប្រមាណ ១៥ពាន់លានដុល្លារ។

យោងតាមអង្គការយុត្តិធម៌សម្រាប់ជនជាតិជ្វិស មកពីប្រទេសអារ៉ាប់ ហៅកាត់ថា JJAC បានប៉ាន់ស្មានថា ជនជាតិជ្វិសប្រមាណ ៨៥,៦ម៉ឺននាក់ មកពីប្រទេសអារ៉ាប់ចំនួន១០ (ប្រទេស៨ខាងលើ + អាល់ហ្សេរី និងលីបង់) បានរត់គេច ឬត្រូវបានបង្ខំឱ្យចាកចេញ ក្នុងឆ្នាំ១៩៤៨ ខណៈដែលកើតមានកុប្បកម្មហិង្សារបស់ជនជាតិអារ៉ាប់ បានធ្វើឱ្យជនជាតិជ្វិស ស្លាប់និងរបួសអស់ជាច្រើន៕